Eindilo molwetungululo laIsrael
Epsalome lehepaululo laAsaf, la pewa enyakwa lolwiimbo oku li imba mongovela yeimbilo eli: ‘Eenhemo domado’.
1 Akutu Omufita waIsrael, pwilikina!
Ou ho endifa Josef ngaashi oufita weedi,
noho kala omutumba kombada yovakerubi, limonikifa.
2 Holola eenghono doye,
kuEfraim naBenjamin naManasse.
Ove, ila u tu kwafe.
3 Akutu Kalunga, kwafa, tu yambuke vali,
Ove, minikilifa oshipala shoye,
fye tu hangwe kexupifo loye.
4 Akutu Omwene Kalunga weengudu dovakwaita,
fiyo onaini to kala wa handukila omaindilo oshiwana shoye?
5 Owe va pa va lye omungome womahodi,
nowe va nwefa omahodi omaholo e yadi.
6 Ove we tu yandja, tu ninge oshituwa
sheemhata kovashiinda shetu,
novatondi vetu ove tu ninga oiyolifa yavo.
7 Akutu Kalunga keengudu dovakwaita,
kwafa, tu yambuke vali,
Ove minikilifa oshipala shoye,
fye tu hangwe kexupifo loye!
8 Omuti womuviinyu owe u kufa mo muEgipiti,
wa dudile mo oiwana yovapaani,
ndele to u twike mo.
9 Ove owe u ningilile onhele yokutandavela kokule,
u shiive okuninga omidi,
ndele wa yadifa oshilongo;
10 eemhunda okwa li da tuvikilwa komudile wao,
nomisederi daKalunga okeexulo doitai;
11 owa tandavelifa oitai yao fiyo okomeva Efuta Lopokati,
neenyapi dao fiyo okomulonga waEufrat.
12 Molwashike hano wa panuna ongubu yao,
naaveshe ava tava ende po, otava fola ko?
13 Onguluve yondume otai u tunauna po,
noifitukuti yomofuka otai u li ko.
14 Akutu Kalunga keengudu dovakwaita, aluka nee!
Meulu loye tala poshi u shi tale,
Ove u tekule omuti ou womuviinyu,
15 onhwika ei ya twikwa keke loye,
nomona ou we mu likulifila Ove mwene.
16 Oshi li po sha pya komundilo, sha tetwa ko;
kenyenyeto loshipala shoye otava pu po.
17 Yelulila eke loye omulumenhu wokolulyo loye,
u mu amene,
omona womunhu, ou we likulifila.
18 Opo nee fye inatu hala nande okutukuka kwoove.
Tu diinina tu kale nomwenyo,
fye tu shiive okutanga edina loye.
19 Akutu Omwene Kalunga keengudu dovakwaita,
kwafa, tu yambuke vali;
oshipala shoye nashi yele,
fye tu hangwe kexupifo loye!
© Oshikwanyama Bible Revised © Bible Society of Namibia, 2008, 2012.
