Elondwelolongo mokukala kwonale kwOvaisraeli
Ounongoimbilo waAsaf.
1 Oshiwana shange, pwilikina omalongo ange;
endekeleni omatwi eni keendjovo domokanya kange.
2 Onda hala okumakula okanya kange,
ndi popye omayele,
onda hala okutomona eetumbutumbu domafiku onale.
3 Eshi twa uda, naashi twa mona,
notwe shi hepaululilwa kootate,
4 osho inatu hala oku shi holeka ovana vetu,
ndelenee ohatu hepaululile ovatekulululwa
oilonga ya fimana yOmwene,
neenghono daye, noikumwifa e i longa.
5 Osheshi muJakob okwa dika mo ehepaululo,
nomuIsrael okwa yandja mo omhango,
e i lombwela ootate,
vo ve i udifile ounona vavo,
6 opo i shiivike komapupi aa taa shikula,
kounona ava, tava ka dalwa,
vo va fikame yo, ve i hepaululile ovana vavo;
7 navo ve lineekele Kalunga,
vaha dimbwe oinenelonga yaye,
ndelenee va diinine oipango yaye;
8 vo vaha kale ngaashi ooxe,
ava va li va lundakana,
nova xuma, oludi li nomutima u neteke,
nomhepo yalo ihe kwete okutekuka kuKalunga.
9 Ovana vaEfraim,
ava va li ovakwataiti mokushiiva okuyasha,
efiku loita eshi le uya, ova ya onhapo.
10 Inava kwatelelela mehangano laKalunga
nova anya okweenda pamhango yaye,
11 ndelenee ova dimbwa oinenelonga yaye
noikumwifalonga e i va monifile.
12 Okwa li a longa oilonga yoixuna
monhanaisho yooxe
momahenene aSoan,
moshilongo shaEgipiti.
13 Okwa tukula omeva, ndele te va pitifa mo,
okwe a dika ngaashi ohote.
14 Omutenya okwe va endifa moshilemo,
noufiku aushe onomutemo womundilo.
15 Okwa panda omamanya mombuwa,
ndele te va nwefa mo momeva taa kunguluka.
16 Memanya okwa pitifa mo eedjo,
nokwa kungulukifa omeva a fa omilonga.
17 Ndelenee vo inava efa okunyona kuye,
ova handukifa ou wOkombadambada mombuwa.
18 Ova yeleka Kalunga momitima davo,
eshi va pula eendja pauhalu wavo,
19 ova twifa Kalunga eemhata, tava ti:
“Kalunga ota dulu tuu mbela
oku tu yalela oshililo mombuwa?
20 Heeno, okwa denga emanya,
ndele mwa dja omeva mahapu,
neefifiya da kunguluka;
ndelenee ota dulu tuu mbela okuyandja eendja
ile okukongela oshiwana shaye ombelela?”
21 Onghee hano, Omwene eshi e shi uda, okwa keshuka,
nomundilo owa xwamenena Jakob,
nehandu laye ola wila Israel,
22 osheshi inava itavela Kalunga,
vo inave lineekela ekwafo laye.
23 Opo okwa lombwela oilemo yokombada,
ndele ta yeulula oivelo yeulu,
24 ndele te va lokifile omanna,
va mone eshi tava li,
ndele te va pe oilya yeulu.
25 Ovanhu va lya omungome wovaengeli
va tuminwa eendja dihapu kuye.
26 Okwa pendula keulu omhepo yokoushilo,
nomeenghono daye okwa pepifa
omhepo yokoumbuwanhu.
27 Okwa lokifila ombelela ihapu ngaashi ondwi yedu,
eedila di fike pehekedu lopefuta.
28 Mokati komatwali avo okwe di wilifa
mo keembinga adishe deenhele davo.
29 Opo vo va lya, va kuta va kenywa,
Ye okwa mwenifa omalilila avo.
30 Ndelenee fimbo inava wanifa olwisho lavo,
neendja fimbo da li natango momakanya avo,
31 opo tuu ehandu laKalunga ole va wila,
ndele tali pondo po ovanaenghono mokati kavo,
novamati vomuIsrael okwe va denga poshi.
32 Ndele nande opa ningwa ngaha,
inava efa okunyona,
vo inava itavela oikumwifalonga yaye.
33 Onghee hano Ye okwa xulifa po omafiku avo
ngaashi okaulapepo,
nomido davo omeulumo letilifo.
34 Eshi e va yandja mefyo ngaha,
opo vo ove mu lipulaapulila ndele tave lialuka,
ndele tava kongo Kalunga,
35 ndele tava dimbulukwa,
nokutya Kalunga Oye emanya lavo,
naKalunga ou wOkombadambada
Oye Omukulili wavo.
36 Ndelenee efufyo alike la li momakanya avo,
ndele tave mu popile oipupulu
nomalaka avo;
37 osheshi omitima davo inadi dama shili kuye,
vo inava diinina nawa ehangano laye.
38 Ndelenee Ye okwa kala omunalukeno,
nowii wavo e u kufa po,
nokwa polifa luhapu ehandu laye melididimiko,
Ye ina pendula onya yaye aishe;
39 osheshi Ye e va dimbulukwa, ovo ombelela,
okaulapepo aka taka pepe po
ndele itaka aluka vali.
40 Omapa e fike peni, aa va twa ondubo naye mombuwa,
naa ve mu lilifa mofuka!
41 Ndele alushe ova li va shinda Kalunga,
nova handukifa Omuyapuki waIsrael.
42 Inava dimbulukwa eke laye leenghono,
nefiku olo, e va xupifile kovatondi vavo,
43 eshi a ningile oidimbulukifo yaye muEgipiti
noikumwifalonga yaye muSoan.
44 Oye a shitukifa omilonga davo ohonde,
nomomifima davo inava dula okunwa mo;
45 omawashe e va tuminine, e va lye,
nomafuma aa tae va nyono po.
46 Noimeno yavo aishe e i efele
i like po kokanakalombo,
naashishe eshi va longele, okoshipaxu.
47 Omiviinyu davo okwe di teyaulifile po keemhawe,
nomikwiyu onoshikungulu shinene.
48 Oimuna yavo okwe i dipaifile keemhawe,
nomaufita avo oneembadi.
49 Okwe va kupulile nomundilo wehandu laye,
nokufula onya, nonyanya noudjuu,
ndele te va tumine ongudu yovaengeli vomupya.
50 Ehandu laye okwe li pitifa mo ine li kelela,
neemwenyo davo ine di kufa mefyo,
okwe di yandja moudu womuku;
51 okwa dipaifile oiveli aishe yomuEgipiti,
oiveli oyo yeenghono davo momatwali aHam.
52 Opo nee a pitifile oshiwana shaye ngaashi eedi,
ndele te shi endifa mofuka ngaashi oufita weedi,
53 te va endifa, e va kelela nawa, vo vaha tile sha,
ndelenee ovatondi vavo ote va tuvikile nefuta.
54 Osho ngaha okwa li e va twala konhele yaye iyapuki,
komhunda ei, okwe i likongelele nolulyo laye.
55 Komesho yavo okwa taataele ko oiwana yovapaani,
noshilongo shavo okwe shi va taulila efyuululo,
nokwa nangeka omapata aIsrael momaumbo avo.
56 Ndelenee vo ova yelekela
Kalunga ou wOkombadambada,
va twa ondubo naye,
ndele itava diinine omahepaululo aye.
57 Ove mu pa ombuda,
nove mu ninga oukululufi va fa ooxe,
va shuna lwanima ngaashi outa wa yululuka.
58 Otave mu handukifa momiulu davo, omo va fiyawila,
ndele tave mu shindifa oikalunga yavo.
59 Kalunga eshi e shi udite, okwa keshuka,
ndele ta ekeleshi shili Ovaisraeli.
60 Okwa efa ongulu yaye muSilo,
outulilo waye, omo a kalele mokati kovanhu.
61 Okwa yandja eenghono daye moukwatwa,
noshifimanekwa shaye omomake ovatondi.
62 Ovanhu vaye okwe va yandja momukonda,
ovafyuululifwa vaye okwe va umanena.
63 Ovamati vaye ova lafwa po komundilo,
novafuko vaye ova lumbulwa omaimbilo omhoko.
64 Ovapristeli vavo ova dipawa nomukonda,
novafiyekadi vavo inava lila nande eenghali.
65 Opo nee Omwene okwa duduluka,
ngaashi ou kwa li a kofa,
nongaashi ofule, ou kwa li a kolwa komaviinyu.
66 Ovakondjifi vaye okwe va denga noku va taataa,
nokwe va tula melengwa laalushe.
67 Ndelenee etulilo laJosef okwe li efa,
nepata laEfraim ine li hoolola vali,
68 ndele okwe lihoololela epata laJuda,
omhunda yaSion e i hokwa po;
69 ndele ta tungu ouyapuki waye,
u fike poule wevalelwa,
owa fa edu, eli a shita okukala po fiyo alushe.
70 Opo nee okwe lihoololela omupiya waye David,
ou a kufa moyuunda yeedi;
71 ote mu kufa meedi deenyali,
Ye a life Jakob, oshiwana shaye,
naIsrael efyuululo laye.
72 Oye tuu okwa li te va lifa nomutima wa yukilila,
ndele te va kwatele komesho neke lounghulungu.
© Oshikwanyama Bible Revised © Bible Society of Namibia, 2008, 2012.
