Okudimbulukwa omaendifo aKalunga mefimbo loudjuu
Epsalome laAsaf, la pewa enyakwa lolwiimbo Jedutun.
1 Ohandi ingida Kalunga mokule, heeno,
ohandi lili pombada,
ohandi ingida Kalunga mokule, opo Ye a ude nge.
2 Efiku lokuhangika koudjuu ohandi kongo Omwene;
eke lange onde li yelula oufiku, noinali loloka;
ndelenee omwenyo wange otau anye okuhekelekwa.
3 Ngeenge handi diladila Kalunga,
otashi kemifa nge,
ngeenge handi shipaashipa,
otashi fifa omhepo yange ounye. Sela
4 Eemhafu dange ito di pe eemhofi;
onda piyaana, ndele itandi dulu okupopya.
5 Ohandi shipulula omafiku onale,
omido edi da pita donalenale;
6 Oufiku ohandi dimbulukwa okaxumbafeta kange,
ohandi tetaateta momutima wange,
nomhepo yange otai dilonga ndele tai ti:
7 “Omwene oha ekelele nge fiyo alushe mbela,
Ye aha file nge vali onghenda nande?
8 Ouwanghenda waye owa oka nee fiyo alushe?
Omaudaneko aye itaa kala po nande vali?
9 Kalunga a dimbwa tuu mbela okufya onghenda,
ile olukeno laye la fitikwa kehandu laye?” Sela
10 Opo nee nde lipopila, nda tya:
“Otashi yehameke nge unene,
ou wOkombadambada eshi a lundulula
eke laye lokolulyo.”
11 Onda hala okudimbulukwa oinenelonga yOmwene,
heeno, okudimbulukwa oikumwifalonga yoye yonale,
12 onda hala ndi diladile okulonga kwoye
nokufekafeka oiningwa yoye inene.
13 Akutu Kalunga, ondjila yoye oiyapukielela,
Kalunga ke lipipo munene ke fike pwoove, Kalunga?
14 Oove tuu Kalunga, ho longo oikumwifa,
Oove ou wa shiivifa eenghono doye
mokati koiwana yoilongo.
15 Owa kulila oshiwana shoye
nokwooko kwa pama,
ovana ovamati vaJakob novaJosef. Sela
16 Omeva eshi kwa li e ku mona, Kalunga,
omeva eshi tae ku mono, oshe a kakamifa,
heeno, ekakamo la hanga omatondokelo omeva.
17 Oilemo oya lokifa odula ya pauka,
omaulu a pwalakatifa eembadi,
noikuti yoye oye liumba.
18 Engungumo londaka yoye ola udika mevalelwa,
nomaluvadi okwa minikila edu,
olo nola kakama la tengauka.
19 Ondjila yoye oya yukilila momeva efuta,
elila loye ola tavaulula omafuta manene;
ndelenee oshikoti sheenghatu doye
inashi monika nande.
20 Owa endifila oshiwana shoye ngaashi eedi,
keke laMoses naAron.
© Oshikwanyama Bible Revised © Bible Society of Namibia, 2008, 2012.
