Kalunga Oye omutokoli nomuxupifi
Epsalome laAsaf. Eimbilo la pewa enyakwa lolwiimbo oku li shika mouxumbafeta.
1 Kalunga okwa shiivika apeshe muJuda,
edina laye linene muIsrael.
2 Osheshi ondjuwo yaye oya tungwa muSalem,
ongulu yaye okukala mo komhunda yaSion.
3 Oko tuu oko a teyaula oikutiluvadi yomauta,
noshikelelifo, neongamukonda noiti yavo aishe. Sela
4 Ove wa dja moshinge nomeenghonopangelo
keemhunda doihakanwafindano.
5 Ovakwaita ovaladi ova nyekwa oiti,
ova li va kendjengelwa keemhofi didjuu,
novaladi aveshe ova fya oungonywe momaoko avo.
6 Eingido leaneko loye ola kambukifa
omatemba neenghambe, Kalunga kaJakob.
7 Heeno, Oove omutilifi,
olyelye ta dulu okukala koshipala shoye
fiku to handuka?
8 Keulu taku di eshiivifo letokolo loye,
opo edu la haluka la kanghwa,
9 eshi Kalunga a fikama okutokola,
a xupife ovafininikwa aveshe kombada yedu. Sela
10 Osheshi onyanya yovanhu
otai ku shitukifile efimaneko,
poxuuninwa eshi to lidike omitemo dehandu.
11 Tongeni omaudaneko
nye mu a wanifile Omwene, Kalunga keni!
Aveshe ovo tave mu kundukile,
ove nokweetela onakutilika omaano,
12 Oye tuu, ta xutula outuwalali wovakwananghali,
ndele ta tilifa eehamba dokombada yedu.
© Oshikwanyama Bible Revised © Bible Society of Namibia, 2008, 2012.
