Eimbilo lenangalo loshilongo
Epsalome laSalomo.
1 Akutu Kalunga, yandja kohamba
onghedi yokutokola kwoye,
nokomona wohamba ouyuki woye,
2 yo i pangele ovanhu voye nouyuki,
noi yukifile omapongo oye.
3 Eemhunda nadi etele oshiwana ombili
noikulundudu ouyuki.
4 Oyo nai pe eehepele domovanhu eyukifilo,
i xupife omapongo, noi lyataule omufininiki.
5 Ovo tave ku tila, etango manga tali minikile
nohani tai kala komapupi nomapupi.
6 Nai ehene poshi, ngaashi odula tai loko
kombada yomwiidi womaulifilo,
ngaashi omudimbi tau yovele edu.
7 Momafiku ayo omuyuki ta kala a temuna,
nombili oi yadi mo, fiyo ohani ya fya ko.
8 Oyo nai pangele kefuta limwe fiyo okulikwao,
okomulonga waEufrat fiyo okexulilo ledu.
9 Novakwananghali tave ke i twila eengolo,
novatondi vayo nava lafe ondwi koshipala shayo.
10 Eehamba domuTarsis nodomoilongo
yokomunghulo wefuta nadi i etele omilongelo.
Eehamba daSheba naSeba otadi kungudwa.
11 Heeno, oyo oi nokulinyongamenwa koshipala shaye,
noiwana yovapaani i noku ke i longela.
12 Osheshi otai ka xupifa epongo
eli tali kuu onghuwo li kwafwe,
nomukwanaluhepo ou ehe na omukwafi.
13 Otai ningile omuxupi nohepele olukeno,
notai xupifa eemwenyo deehepele;
14 ndele tai di kulile momafininiko nomomalwifo,
nohonde yado otai i tale i nondilo.
15 Oyo nai kale i nomwenyo.
Yo nai etelwe oingoldo yaSheba, yo i indililwe alushe;
nai nangekwe noupuna kuvo efimbo alishe.
16 Moshilongo namu kale oshishipo shoilya,
yo i mene fiyo okeexulo deemhunda;
omiti doiimati dasho nadi ime ngaashi Libanon,
nomoilando namu pimhuke mo ovanhu,
ngaashi omwiidi tau twiyuka medu.
17 Edina layo nali kale po fiyo alushe,
fimbo oku netango, edina layo nali twalwatwalwe,
opo oiwana aishe i nangekwe noupuna muyo
noku i pandula yo i nelao.
18 Kalunga Omwene, Kalunga kaIsrael na fimanekwe,
ou ha longo oikumwifalonga, Ye aeke!
19 Edina laye liwa la fimana nali pandulwe fiyo alushe,
nedu alishe nali yadifwe noshinge shaye!
Amen, heeno, Amen.
20 Apa opo opa xulila
omailikano aDavid, omona waIsai.
© Oshikwanyama Bible Revised © Bible Society of Namibia, 2008, 2012.
