Eilikanopandulo melineekelo lomuyuki
1 Kwoove, Omwene, oko handi kongo ouhondameno,
ino efa ndi fifwe ohoni nande fiyo alushe.
2 Kwafe nge, Ove u mangulule nge molwouyuki woye!
Ehenifa okutwi kwoye kwaame u xupife nge.
3 Kala emanya lokukala kwange,
nohote ya pama yokuningina mo.
Ove ou wa sheyela nge exupifo,
osheshi Oove emanya lange nohote yange.
4 Kalunga kange, mangulule nge meke lomuhenakalunga,
meengonyo domukolokoshi nomumonifi woixuna!
5 Osheshi Oove elineekelo lange, Omwene, Kalunga kange,
Oove omulineekelwa wange,
nghee nda dja mounona wange.
6 Oove omuyambididi wange, nghee nda dalwa;
Ove wa pitifa nge mekolo lameme.
Mefimbo alishe ohandi ku hambelele.
7 Vahapu ove wete nge ndi kumwifa;
ndelenee Ove u li po ehondamo lange la pama.
8 Okanya kange oke yadi ehambelelo loye,
nefimaneko loye omafiku aeshe.
9 Ino ekela nge shi mefimbo loukulupe wange,
Ove ino efa nge, ngee eenghono tadi fii nge po.
10 Osheshi ovatondi vange otava popi nge,
naava tava halele nge onhiko,
otava kundafanene nge,
11 ndele tava ti: “Kalunga okwe mu efa;
mu shikuleni, nye mu mu kwate,
osheshi ke na omupopili.”
12 Akutu, Kalunga, ino kala kokule naame!
Kalunga kange, endelela u kwafe nge!
13 Ava, tave lidengifa nge, nava fifwe ohoni, nava kombwe po.
Ava tava etele nge oixuna,
nava dikwe elengwa nodino.
14 Ndelenee ame onda hala okuteelela efimbo alishe,
nokutandavelifa efimano loye.
15 Okanya kange naka udife ouyuki woye,
nomafiku aeshe omadidiliko exupifo loye;
osheshi onda nyengwa oku a vala aeshe.
16 Onda hala okuhololela po oinenelonga yOmwene Kalunga,
ndi tange ouyuki woye, woye auke.
17 Akutu Kalunga, Oove, wa longa nge
okudja mounona wange fiyo onena,
nofiyo onena tuu eli onda hepaulula oikumwifa yoye,
18 nomokufika moukulupe wange,
ngeenge nda ninga eenghwakutoka,
Kalunga, Ove ino efa nge!
Ame opo nee ndi udifile epupi lokomesho
eenghono dokwooko kwoye.
19 Kalunga, ouyuki woye otau fiki fiyo pombada keulu;
Ove ou ho longo oinenenima,
Kalunga, olyelye e ku fa?
20 Ove we tu monifa omaudjuu mahapu nomahepeko;
ndelenee to ke tu ninga natango ovanamwenyo.
Nomomambolongodjelo edu, oto tu kufa mo vali.
21 Oto ka wedela nge nokuli koukulunhu wange,
ndele to hekeleke nge vali.
22 Hano, Kalunga kange, osho naame yo
nda hala ndi ku hambelelele oudiinini woye,
noku ku shikila eenyalilo,
ndi ku imbile nokushika okaxumbafeta,
Oove Omuyapuki waIsrael!
23 Omilungu dange nadi twe eenghalu
noku ku imbila kwange,
nosho yo omwenyo wange, ou wa kulila.
24 Nelaka lange nali udife ouyuki woye efiku alishe;
osheshi ava, va li va halela nge oudjuu,
ova fifwa ohoni ndele va ninipikwa.
© Oshikwanyama Bible Revised © Bible Society of Namibia, 2008, 2012.
