Eilikano lomuyuki mofina
Epsalome laDavid, la pewa enyakwa lolwiimbo mongovela yeimbilo eli: ‘Eenhemo domado’.
1 Kalunga, xupife nge,
osheshi omeva taa fiki nokuli pomwenyo wange;
2 ohandi ningine monhopo ihe na nande edu la pama,
onda hanga mokati koule wefuta,
nomakufikufi otaa tuvikile nge.
3 Onda loloka kokukuwa kwange,
omunino wange owa fita;
omesho ange okwa dinda kokulila kwange,
manga ndi li po nda teelela Kalunga kange.
4 Ava tava tondo nge epwanga, ovahapu,
ve dule omuvalu weexwiki dange,
ovatondi vange otava dulu nge eenghono,
tava kondjifa nge ndihe noushima,
vo tava ti, nandi fute, eshi inandi shi nyeka ko.
5 Akutu Kalunga, Ove to shiiva oushima wange,
nomanyono ange inae ku holekwa.
6 Ava tave ku teelele, ino efa,
va fifwe ohoni molwange,
Omwene Kalunga keengudu dovakwaita.
Molwange ino efa va lengifwe,
ava tave ku teelele, Kalunga kaIsrael.
7 Osheshi molwoye ohandi shekwa,
oshipala shange sha tuvikwa kohoni.
8 Ame nda ninga omunailongo kovamwameme,
itandi dimbulukiwa vali ovana ovamati vameme.
9 Osheshi ouladi wokukondjela ongulu yoye,
oo wa mana nge eenghono;
nomasheko aava have ku sheke, a wila nge.
10 Ame, omwenyo wange owa kwena
nokulidilika eendja,
ndele osha monifa nge ashike omatukano.
11 Onda djala omudjalo woluhodi,
ndele vo otava tale nge oshiyolifa shavo.
12 Ovanhu vomeendabo dokulandela
aame tava shashala,
neengholwe otadi imbile nge.
13 Ndele Omwene, ame ohandi ku ilikana
pefimbo eli le ku wapalela, Kalunga,
molwolukeno loye linene,
ude nge, molwounene wonghenda yoye.
14 Monhopo shile nge mo, ndiha ningine;
kwafa, ndi xupifwe kovatondi
nomoule womeva efuta,
15 omakufikufi opo aha ninginife nge,
noule womeva uha pone nge po,
nombwili iha umikile nge mo.
16 Omwene, ude nge,
osheshi onghenda yoye oiwa, inyenye;
molwefilonghenda loye linene liameka kwaame.
17 Nomupiya woye ino mu holeka oshipala shoye,
osheshi ndi li moudjuu. Ude nge diva.
18 Ehena komwenyo wange, u u kulile;
xupife nge molwovatondi vange.
19 Odino yange, nohoni yange nelengwa lange,
Ove u i shii;
ovafininiki vange aveshe ove shiivike kwoove.
20 Odino yange oya teya omutima wange,
nda ninga oshingone,
onda li kuteelela onghenda,
ndele inandi i mona,
onda li kuteelela ovahekeleki,
ndele inava holoka.
21 Ahowe, ova pa nge nokuli, ndi lye onyango,
naashi nda fya enota,
ova pa nge ndi nwe oshinuwa shilula.
22 Oshililo shavo nashi va shitukile elulo,
sho shi ninge oshiliwa shokukwata ovalineekeli muvo vene.
23 Wiwika omesho avo, vaha mone ko;
tifaukifa oiya yavo, i tifauke alushe.
24 Ehandu loye li tilashi kombada yavo,
va tikukila noupyu wonya yoye!
25 Eenhanda davo nadi ninge omaputu,
momatwali avo muha kale nande omunhu.
26 Osheshi otava taataa ou,
a dengwa kwoove mwene,
nouyehame weendjashe da yashwa kwoove,
otau va popyaanifa.
27 Weda ko oikolotimba koikolotimba yavo,
vo vaha hange kouyuki wokoshipala shoye.
28 Nava dimwe mo membo lomwenyo,
vaha kale va shangelwa pamwe novayuki voye.
29 Ndelenee aame omunamupya nomuyehami;
Kalunga, ekwafo loye nali hondameke nge.
30 Onda hala okutanga edina laKalunga neimbilo,
ndi mu tumbaleke pombada nehambelelo;
31 ondi shii lo otali pandwa kOmwene,
li dule eemhedi neehove,
edi da teyaula nodi nomakondo a makulwa!
32 Ovahepekwa ngeenge tave shi mono, otashi va hafifa.
Nye ovo, tamu kongo Kalunga,
omitima deni nadi penduke po!
33 Osheshi Omwene ota udu eehepele,
Ye ita dini ovakwatwa vaye.
34 Eulu nedu nali mu fimaneke, nomafuta,
naashishe eshi tashi linyenge mo.
35 Osheshi Kalunga ota xupifa Sion,
ndele ta tungululifa oilando yaJuda,
opo ovanhu va tule mo, ve shi nangale.
36 Noludalo lovapiya vaye otave shi fyuululifwa,
naava ve hole edina laye,
ovo tava kalelele mo.
© Oshikwanyama Bible Revised © Bible Society of Namibia, 2008, 2012.
