Eimbilopandulo molwefindano
Epsalome, eimbilo laDavid, la pewa enyakwa lolwiimbo.
1 Kalunga ota fikama; novatondadi vaye otave lihane ashike,
novatondi vaye otava i onhapo yoshipala shaye.
2 Ngaashi omwifi tau i omhepo ngeenge tai pepe,
nongaashi edi leenyiki tali dilulwa komundilo,
osho yo ovakolokoshi otava hanauka po
koshipala shaKalunga.
3 Ndelenee ovayuki otava hafe nokunyakukwa
koshipala shaKalunga,
ehafo otali va kalukifa eenghalu.
4 Imbileni Kalunga, imbileni edina laye ehambelelo.
Mu paleleni ondjila, ou ta taulula neulumo meefuka,
Omwene olo edina laye;
nyakukweni koshipala shaye!
5 Oye xe yeefiye nomuyukifi wovafiyekadi,
Kalunga moukalelo waye uyapuki.
6 Kalunga ota dikile omawilandjila eumbo,
neenghwate ote di pitifile moulinawa;
ndelenee ovanandubo ove nokutulwa
moshilongo shi nonghange.
7 Akutu Kalunga, eshi wa endifa mo ovanhu voye,
nowe va tetekelela, ndele tamu taulula eefuka. Sela
8 Opo nee edu ola kakama, neulu la tika omeva
koshipala shaKalunga,
naSinai ya kakama koshipala shaKalunga,
Kalunga kaIsrael.
9 Kalunga, odula iwa wa shamina efyuululo loye;
ngeenge la loloka, Ove owe li pameka vali.
10 Eengudu doye oda mona mo onhele;
molwouwa woye owe li longekidila omapongo.
11 Omwene okwa yandja ondjovo,
ongudu inene yovakainhu tai twala ondaka yefindano:
12 “Eehamba doikulo oda ya onhapo, da ya onhapo,”
nomukainhu ota tukula oihakanwa.
13 Tamu fyaala mokati koyuunda yoimuna?
Omavava onghuti otaa vema,
a vaekwa noshisiliveli,
nomalwenya ayo taa twima ngaashi oshingoldo.
14 Omunaenghono adishe eshi a halakanifa eehamba,
opo nee eemhawe da paukila kombada yaSalmon.
15 Omhunda yaBasan, omhunda oove yaKalunga,
omhunda yaBasan, oove ou, u na eexulo dihapu.
16 Eemhunda nye, ava mu neexulo dihapu,
oshike tamu talele nondubo
omhunda ei ya hoololwa kuKalunga
a kale ko omutumba?
Heeno, Kalunga oko ta kala alushe.
17 Omatemba oita aKalunga,
oo omayovi omulongo eyovi lweyovi;
Omwene ota kala mokati kavo,
moukalelo waye, ngaashi kuSinai.
18 Ove wa londa pombada
neenghwate we di twaalela ko,
owa pewa omilongelo kovanhu,
nande ihava dulika,
opo Omwene Kalunga a kale ko.
19 Omwene na pandulwe!
Efiku nefiku ohe tu humbata;
Kalunga Oye exupifo letu. Sela
20 Fye otu na Kalunga, Oye Kalunga Omuxupifi,
nOmwene, Omwene ou ha shiiva okuxupifa mefyo.
21 Heeno omitwe dovatondi vaye,
Kalunga ote di mbwangaula eembole,
neexwikiluwewe da handala dovaanyeni momanyono.
22 Omwene okwa tya:
“MuBasan nda hala ndi va alule mo,
heeno, ohandi va kufa moule womeva, ndi va shunife,
23 Oove, u koshe eemhadi doye mohonde,
nomalaka eembwa doye a mone po shao movatondi voye.”
24 Akutu Kalunga, otaku talwa
nhumbi oyeendo yoshivilo shoye tai ende,
oyeendo yoshivilo yaKalunga kange
noyohamba yange otai ende mouyapuki.
25 Ovaimbi otava tetekele, novashiki
vouxumbafeta otava shikula ko,
nomokati kavo otamu ende oukadona tava shiki oungoma.
26 Nye veengudu adishe, hambeleleni Kalunga,
nye vomofifiya yaIsrael, hambeleleni Omwene.
27 Kwinya taku ende Benjamin, ou onghelo,
te va kwatele komesho,
oko otaku ende omalenga aJuda nongudu yavo
noidale yaSebulon naava vaNaftali.
28 Kalunga koye e ku sheyela eenghono doye.
Akutu Kalunga, shi diinina,
eshi we tu ningila!
29 Molwotembeli yoye muJerusalem,
eehamba otadi ke ku etela omilongelo.
30 Hanyena oshilyani, shi li mokati komanenge,
nongudu yeemhedi noyoutana, vo oiwana yoilongo.
Lyataula po ava ve hole oisiliveli,
oiwana yoilongo, oyo i hole oita, i shinauna po.
31 Otaku uya ovatumwa tava di muEgipiti;
nOvaetiopia tava ka yelula omake okwiindila Kalunga.
32 Akutu omauhamba nye kombada yedu, imbileni Kalunga,
imbileni Omwene ehambelelo. Sela
33 Oye ou ta uluma momaulu omokulekule alushelushe!
Pwilikineni ondaka yaye, ondaka i neenghono.
34 Peni Kalunga eenghono daye!
Oshinge shaye otashi kala kombada yaIsrael,
neenghono daye omoilemo.
35 Kalunga omutilifi, mouyapuki waye otamu di etilifo.
Akutu Israel! Kalunga kaIsrael,
Oye ta yandje eenghono nepangelo koshiwana shaye.
Kalunga na hambelelwe!
© Oshikwanyama Bible Revised © Bible Society of Namibia, 2008, 2012.
