Engungumano koshipala shaKalunga
Eimbilo laDavid, la pewa enyakwa lolwiimbo oku li imba mongovela yeimbilo eli: ‘Jedutun’.
1 Kalunga Oye aeke omwenyo wange
tau mu teelele mengungumano,
kuye otaku di ekwafo lange;
2 Oye aeke emanya lange, nehepuluko lange,
nohote yange; ame ihandi tengauka unene.
3 Fiyo onaini mwa hala nye amushe,
okukondjifa omulumenhu umwe,
mu mu nyonaune po,
a fe ekuma la endama
nongaashi ohote tai teka po?
4 Otava kundafana ashike omolwounene waye,
nhumbi ve mu undule ko,
ova hokwa oipupulu;
momakanya otava punike,
nomomitima otava fingaele. Sela
5 Lota, muKalunga amuke, omwenyo wange,
osheshi kuye otaku di eteelelo lange;
6 Oye aeke emanya lange, nehepuluko lange,
nohotemanya yange;
ame itandi tengauka nande.
7 Exupifo lange nefimano lange oli li muKalunga;
emanya lange la pama
nouhondameno wange Oye Kalunga.
8 Akutu, oshiwana, mu lineekeleni alushe!
Mu mbubulileni omitima deni.
Kalunga Oye ouhondameno wetu. Sela
9 Ovanhu omuku wongaho,
vo aveshe ngee otava yelekwa,
aveshe vapu, ve dulike komuku.
10 Inamu lineekela omunyeka,
inamu liwewelekela oitinhwa yeni;
nemona ngeenge tali hapupala,
inamu mangela mo omitima deni!
11 Kalunga okwa popya lumwe nde shi uda luvali;
nokutya, eenghono odaKalunga.
12 Nosho yo, Omwene, ouwanghenda owoye;
nomunhu keshe Ove to mu ningile
shi fike pailonga yaye.
© Oshikwanyama Bible Revised © Bible Society of Namibia, 2008, 2012.
