Eilikano molwetewatewo
Eimbilo laDavid, la pewa enyakwa lolwiimbo oku li imba mongovela yeimbilo eli ‘Onghuti yomomiti dokokule’; kefimbo eli a kwatelwe kOvafilisti muGat.
1 Kalunga, file nge onghenda,
osheshi ovanhu otava fulile nge meemhanda,
ovakwaita alushe otava fininike nge.
2 Ovatondi vange itava fuda okufulila nge meemhanda;
osheshi vahapu ve li po mokulitumba kwavo
otava ningile nge ondubo.
3 Efiku eli handi tilifwa,
Ove handi lineekele nokuli.
4 Kalunga ota tangifa nge ondjovo yaye;
ohandi lineekele Kalunga, itandi tila nande.
Ovanhu otava ningi nge shike!
5 Alushe otava hetekele okweendameka eendjovo dange;
omadiladilo avo aeshe otava diladilile nge owii.
6 Otava shivafana, va hondjaunine nge,
va nangele eenghatu dange,
osheshi va hala omwenyo wange.
7 Mowii wavo aushe otava ka xupifwa tuu?
Kalunga, mehandu loye undula po oiwana yoilongo!
8 Omafiku ange omupya, Ove we a vala,
omahodi ange, we a pimhila moshimbudju shoye,
heeno, shili, owe a nyolela membo loye.
9 Hano mokwiifana kwange Kalunga,
opo tuu ovatondi vange tava shuna monima.
Ondi shi shii shili:
Kalunga okwa ama kwaame.
10 Kalunga ou ta kwafa nge okufimaneka eendjovo daye,
Omwene ou ta kwafa nge okufimaneka eendjovo daye,
11 Oye handi mu lineekele ndele ihandi tila.
Ovanhu otava ningi nge shike!
12 Kalunga, ndi na eudaneko oku ku wanifila.
Onda hala ndi ku etele eyambo lehambelelo.
13 Osheshi Ove wa xupifa omwenyo wange mefyo,
neemhadi dange mokupunduka,
ame ndi ende koshipala shaKalunga
omouyelele wovanamwenyo.
© Oshikwanyama Bible Revised © Bible Society of Namibia, 2008, 2012.
