Ekemo molwookaume ve nomakoto
Ounongoimbilo waDavid; wa pewa enyakwa lolwiimbo, oku u shika mouxumbafeta.
1 Kalunga, uda eilikano lange,
Ove ino hondama okweehela kwange!
2 Pwilikine nge, u nyamukule nge.
Moluhodi lange ohandi pumauka,
nohandi tu omadima 3 omolweuyaano lovatondi
nomolwelundakano lovadinikalunga;
osheshi otava undwile nge oixuna,
nomokutonda nge tava kala nehandu.
4 Omutima wange otau litonyo monhulo yange,
noshinyongi shefyo osha wila nge.
5 Etilo nekakamo ola hanga nge,
la tumaukifa nge omaxwilili.
6 Opo handi popi, handi ti:
“Ngeno onda li nomavava ngaashi onghuti,
ngeno handi tuka po, ndi mone etulumuko.
7 Heeno, ngeno ndi tukile kokule ndi ka kale mofuka. Sela
8 Ngeno ohandi endelele ndi likongele
onhele yokuhondama,
ndi ye onhapo yoshikungulu shidjuu
sha handuka noyeembadi.
9 Omwene, va hanauna po, u tumhakanife omalaka avo!
Osheshi moshilando onda mona mo
oukolokoshi nolwoodi.”
10 Omutenya noufiku ohava ende keehote dasho,
nowii noudjuu ou li meni lasho.
11 Ehanauno li li musho, nomafininiko nomakotokelo
itaa pu mo moshilandelo shasho.
12 Osheshi hamutondi wange ta sheke nge;
ngeno oye, ngeno haxwe;
haumwe womovayelani te litadele nge;
ngeno oye, ngeno nda hondama;
13 ahowe, oove omukwetu, oove tuu ou,
okaume kange nomulineekelwa wange,
14 twa kalafana pamwe nombili iwa
notwa ya mongulu yaKalunga
pamwe nongudu yoshivilo.
15 Efyo nali va kwate!
Nava mbolokotele moshovafi ve nomwenyo.
Shaashi owii wa kala
mokukalamwenyo kwavo nomeni lavo.
16 Ndelenee ame ohandi lalekida Kalunga,
ndele Omwene ota xupifa nge.
17 Onguloshi nongula nomutenya
ohandi lili nokunyemata,
opo Ye ota udu ondaka yange.
18 Omwenyo wange ote u kulile,
u mone ombili, opo vaha hange nge;
osheshi ovo ve nondubo naame ovahapu.
19 Kalunga ota udu, ndele te va xupipike,
Oye ou a kala omutumba
kolukalwapangelo laye, a dja nalenale,
shaashi itave lidilulula, vo itava tila Kalunga. Sela
20 Eke laye okwe li kwatifa ava va li nombili naye
ndele ta nyonauna po ehangano lavo naye.
21 Eendjovo dokanya kaye oda fa di nomulyo,
mboli momutima waye omu noita.
Elaka laye oliwa, li nomufenhu ngaashi omaadi,
ndelenee olo omikonda da pweywa mo.
22 Omutengi woye u undulila kOmwene,
Ye ote ku kalele noshisho.
Oye ita efa nande omuyuki a kale alushe nokutengauka.
23 Heeno, Kalunga, oto ke va undulila mombwili yehanauno;
ovadipai novanekonda,
omafiku avo tave a xulifile ondjilakati.
Ndelenee ame ohandi ku lineekele.
© Oshikwanyama Bible Revised © Bible Society of Namibia, 2008, 2012.
