Eilikano lomulidilululi
Epsalme la imbwa kuDavid eshi omuxunganeki Natan e ile kuye, molwaashi e ile kuBatseba; la pewa enyakwa lolwiimbo.
1 Akutu, Kalunga, file nge onghenda
molwouwanghenda woye.
Molwefilonghenda loye linene dima po omatimba ange.
2 Koshe nge owii wange, ndi koshoke,
Ove u fete po etimba lange.
3 Osheshi enyono lange, ame mwene ondi li shii nawa,
nomatimba ange alushe e li momesho ange.
4 Kwoove akuke nda nyona,
nonda ninga eshi shii momesho oye,
opo u kale omuyuki meendjovo doye,
nouhenombedi mokutokola kwoye.
5 Tala, ame onda dalwa moulunde,
nameme okwa dala nge moulunde.
6 Ove wa hala oshili i kale meni momutima,
nomoule womwenyo ho shiivifa nge ounongo.
7 Koshe nge naisopi, opo ndi yele;
koshe nge ndi yele, ndi dule outokele weemhawe.
8 Udife nge ehafo nenyakuko,
opo omakipa ange, aa we a teyaula, a nyakukwe.
9 Tuvika oshipala shoye, uha mone omatimba ange;
ove dima po owii wange aushe.
10 Kalunga, shitile nge omutima wa yela,
nomeni lange tula mo omhepo ipe i neenghono.
11 Ino ekela nge shi nande koshipala shoye,
nOmhepo yoye Iyapuki ino i kufulula nge.
12 Hafife nge vali, ndi hafele exupifo loye,
Ove yambidide nge nomhepo yeduliko.
13 Opo ava, va puka, ndi ke va longe eendjila doye,
ovalunde vo ve ku lialulukile.
14 Kalunga, Kalunga kexupifo lange,
kufe nge metimba lohonde,
elaka lange, lo li hambelele oudiinini woye.
15 Omwene, makukifa omilungu dange,
okanya ka udife efimano loye.
16 Osheshi omatomenoyambo ku na nao,
nomaxwikiloyambo Ove ino a hokwa.
17 Omayambo aa a halika kuKalunga,
oo omhepo ya teyauka.
Omutima, ou wa teyauka nowa alamekwa,
oo nee, Kalunga ito u dini.
18 Ningila Sion ouwa monghenda yoye.
Ove tungulula eehote daJerusalem.
19 Opo nee omayambo ouyuki, oto ke a hokwa vali,
omaxwikiloyambo nomayambo oiwana;
neemhedi otadi tenhekwa koaltari yoye.
© Oshikwanyama Bible Revised © Bible Society of Namibia, 2008, 2012.
