Okukalela Kalunga kwa yuka
Epsalme laAsaf.
1 Kalunga, ou Kalungeelela, Omwene,
Oye ta popi, ndele ta ifana edu
kepito letango fiyo okoku, tali ka ningina,
2 muSion, mewano lewapalelo,
Kalunga omo nee te liholola mefimano.
3 Kalunga ketu ote uya, Ye ita mwena;
omundilo wokulungwinifa po,
otau mu pitile komesho,
nokafudaela kanene otake mu dingilile.
4 Eulu nedu ote li ifana,
opo Ye a tokole oshiwana shaye, ta ti:
5 “Ongeleleni nge ovakoshoki vange,
ava twa hangana navo nomayambo.”
6 Eulu opo nee ola udifa ouyuki waye,
osheshi Kalunga Oye tuu omutokoli ou. Sela
7 “Oshiwana shange, pwilikineni nge, ndi mu popife,
Israel, ove ndi ku londwele neaneko:
Aame Kalunga, Kalunga koye.
8 Eshi handi ku vele eembedi,
hamolwomatomenoyambo oye
nomaxwikiloyambo oye
alushe oo e li koshipala shange.
9 Shimwe ashike, eshi inandi hala
okutambula eemhedi deumbo loye
noikombo yomoshuunda shoye;
10 osheshi oifitukuti aishe oyange,
osho yo oinamwenyo ei i li kombada yeemhunda
omayovi nomayovi, oyange;
11 keshe tuu odila i li kombada yeemhunda, ondi i shii,
naashishe eshi tashi linyenganyenga moixwa,
oshi li meke lange.
12 Ngeno okwa li ndi nondjala,
ngeno itandi shi ku lombwele;
osheshi edu alishe nouyadi walo olange.
13 Ou shii, ohandi li mbela ombelela
yeemhedi doye,
ile ohandi nu ohonde yoikombo yoye?
14 Hano etela Kalunga olupandu, olo tuu eyambo loye,
ou wOkombadambada
u mu wanifile omaudaneko oye;
15 nomefiku loudjuu woye ifane nge,
nonda hala oku ku kwafa,
ndele ove oto ka fimaneka nge.”
16 Ndelenee omudinikalunga,
Omwene ota ti kuye: “Eenghedimhango dange,
ove to di tongele shike mbela,
nehangano letu nanye
to li tumbulile shike hano mokanya koye?
17 Ove mwene manga to dini outeku wange,
neendjovo dange oto di pe ombuda;
18 ngeenge to mono oshimhulu, oto litula pusho,
nou nomhangela novanyoni vohombo.
19 Okanya koye oto ka fulukifa owii keshe
ou tau uya mo,
nelaka loye otali kunu oipupulu.
20 Apa to kala omutumba,
omumwanyoko to mu tongele mowii,
nomona wanyoko oto mu shade.
21 Eshi osho ho ningi,
ndele Ame onde shi mwenena ngaho;
opo nee ove wa diladila,
Ame ondi li ngaashi ove.
Eshi ohandi shi ku velele eembedi,
ove u lipulapule nasho.
22 Shi didilikeni nye, hamu dimbwa Kalunga!
Opo Ame ndihe mu payaule po mokuxupifa.
23 Ou ta yambe olupandu,
oye tuu omufimaneki wange,
naau ehe na oshipo mokweenda kwaye,
oye tuu ou handi monifile exupifo laKalunga.”
© Oshikwanyama Bible Revised © Bible Society of Namibia, 2008, 2012.
