Eilikano longula
Epsalme laDavid; la pewa onghulungu yomalwiimbo oku li shika nonyalilo.
1 Omwene, endekela okutwi kwoye keendjovo dange.
Koneka okuhefa kwange.
2 Akutu, Ohamba yange naKalunga kange,
uda elilo lange lopombada,
osheshi kwoove oko handi eta eindilo lange.
3 Omwene, ongula inene to ka uda ondaka yange;
ongula inene ohandi ku lilongekidile efiyawilo
nohandi liameke kwoove.
4 Osheshi Ove ku fi Kalunga ha hokwa oulunde.
Omunawii ke nokukala pwoove.
5 Ovalitumbaleki itava ka dula komesho yoye;
ovanyoni aveshe oho va tondo.
6 Ovapopi voipupulu oto va nyonauna po;
ovalumenhu ovadipai novanekonda
oho va tondo.
7 Ndelenee ame molwefilonghenda loye
onda pewa omhito yokuuya meumbo loye,
ndi liwitike poshi,
nda taalela kotembeli yoye iyapuki moku ku tila.
8 Omwene, endife nge
pauyuki woye molwovatondi vange;
palele nge ondjila yoye komesho yange.
9 Osheshi momakanya avo
kamu na okulineekelwa,
meni lavo otava dutu enyonauko;
ominino davo odo eembila da yeuluka;
nomalaka avo oku na omufenhu.
10 Kalunga, va tokolela owii.
Eemhangela davo nadi va pilukile.
Va undula po
molwouhapu womanyonauno avo;
osheshi vo ove ku lundalalela.
11 Opo nee aveshe ava ve ku lineekela,
nave ku hafele; alushe nava kuwilile,
molwaashi to va amene,
notave ku tanhele ava ve hole edina loye.
12 Osheshi omuyuki
Ove to mu nangeke noupuna, Omwene,
to mu dingilile nohokwe yoye
ngaashi oshikelelifo.
© Oshikwanyama Bible Revised © Bible Society of Namibia, 2008, 2012.
