Sion oshilando shohamba inene
Epsalme la imbwa kOvakora.
1 Omwene Oye omunene, oku nokufimanekwa shili
moshilando shaKalunga ketu, omhunda yaye iyapuki.
2 Moumbangalanhu omhunda yaSion
otai litumbu pombada mewapalo,
oyo ehafo ledu alishe,
oyo oshilando shohamba inene.
3 Kalunga okwe limonikifa meengulu dasho,
nokutya Oye ohote ya pama.
4 Tala hano, eehamba da li de lipaka kumwe,
da ile oku i totela.
5 Ndele eshi de i mona, da kumwa nokuhaluka
ndele tadi i onhapo.
6 Do oda li po da kakama, di kwetiwe ketilo,
ngaashi omufimba ta fetwa.
7 Eeskepa dokuTarsis,
Ove to di ninginifa nomhepo yokoushilo.
8 Hano ngaashi twa li twe shi uda,
paife osho otwe shi mona yo
moshilando shOmwene weengudu dovakwaita,
moshilando shaKalunga ketu,
nokutya Kalunga ote shi pameke fiyo alushe. Sela
9 Kalunga, ouwanghenda woye
ohatu u dimbulukwa motembeli yoye.
10 Kalunga, ngaashi shi li edina loye,
osho oshi li yo efimano loye:
otali udika fiyo okeexulo dedu:
eke loye lokolulyo oli yadi ouyuki.
11 Omhunda yaSion otai shi hafele,
noukadona vaJuda tava nyakukilwa omatokolo oye.
12 Dingilileni Sion, shi ningileni okalovolovo,
nye mu vale eengulu dasho.
13 Konakoneni eehote dasho,
mokweenda kweni didilikeni omapopilongulu asho,
opo mu shiive oku shi hepaululila ovatekulu veni,
14 nokutya: “Kalunga ou, Oye tuu Kalunga ketu
alushe fiyo alushe;
note tu endifa fiyo omokufya.”
© Oshikwanyama Bible Revised © Bible Society of Namibia, 2008, 2012.
