Oshivilo shehombolo lohamba
Ounongoimbilo wOvakora, wa pewa enyakwa lolwiimbo; mongovela yeimbilo eli: ‘Eenhemo domado’, eimbilohole.
1 Omutima wange ou yadi ndoondoo,
tau xunga eendjovo diwa.
Eimbilo lange ohandi li yapulile ohamba.
Elaka lange ola fopena yehamushanga ha endelele.
2 Ove, owa wapala u dule ovakwadu aveshe mouwa;
ewapalonyenye ola tilwa komilungu doye;
osho Kalunga e ku nangeka noupuna fiyo alushe.
3 Omuladi ove, mangela omukonda woye moshiya shoye;
limanga noshinge nounene woye.
4 Kala omunelao mokufinda.
Kondjela oshili nelininipiko nouyuki.
Okwooko kwoye kwokolulyo naku ku longe oilonga yoitilifa.
5 Oikuti yoye oi neememo.
Oiwana tai wile koshi yoye;
ovatondi vohamba otave i yashwa momitima.
6 Olukalwapangelo loye, Kalunga, otali kala po fiyo alushe
nodibo yoye youhamba oyo odibo youyuki.
7 Ove u hole ouyuki ndele to tondo oumbudi;
onghee hano Kalunga, Kalunga koye,
e ku vaeka nomaadi ehafo u dule oovakweni.
8 Omudjalo woye aushe ou nedimba liwa
lomirha naaloe naakassia;
neshiko lokaxumbafeta otali ku hafifa
meengulu da tungifwa ekipa leendjaba.
9 Ovana veehamba oukadona
ove li mokati kovakainhu voye, va fimana;
omumbada woye ota kala ofika kolulyo loye,
a djala oulenga woshingoldo shomuOfir.
10 Omona okakadona, pwilikina,
tala oku, ove endeka okutwi kwoye;
xupula oshiwana sheni novambuleni.
11 Ndele ohamba yoye, ngeenge ye ku hala,
osheshi oyo omwene woye,
opo nee ove linyongamena kuyo.
12 Ovanhu vomuTirus otave uya,
ve ku etele omilongelo,
novanenenhu otava kendabala okulihokwifa kwoove.
13 Okakadona kohamba,
aka ke li meni leumbo, kawa muko vene,
momudjalo wako omo mwa tungilwa oingoldo;
14 oka dikwa oikutu ya tungilwa omaluvala,
ndele taka twalwa kohamba;
oukadona, eengoleka dako,
nookahewa vako otave ka eta kwoove.
15 Otava endifwa nehafo neenghuwilili
tava i mongulu yohamba.
16 Ounona voye ovamati otava ka kala ponhele yooxo,
ndele to va ningi oidale moshilongo ashishe.
17 Edina loye nda hala oku li dimbulukifa
komapupi aeshe okomesho;
opo nee oiwana aishe yoilongo
otai ke ku fimaneka fiyo alushe.
© Oshikwanyama Bible Revised © Bible Society of Namibia, 2008, 2012.
