Onghuwo yeongalo leendobwedihonde
Ounongoimbilo wOvakora, wa pewa enyakwa lolwiimbo.
1 Kalunga, otwe shi uda nomatwi etu vene,
ootate eshi ve shi tu hepaululila,
eshi Ove wa longele oinenelonga
mounyuni wavo, momafiku onalenale.
2 Oove mwene neke loye wa tele mo ovapaani,
ndele ootate, Oove we va twika meenhele davo;
oiwana yoilongo owe i kombolola mo,
ndele vo we va hapupalifila mo.
3 Osheshi omikonda davo,
hado de va monififa oshilongo,
nomaoko avo, hao e va longela efindano,
ndelenee eke loye lokolulyo,
nokwooko kwoye nouyelele woshipala shoye,
oyo tuu, ye shi ninga;
osheshi Ove we va hokwa.
4 Oove auke ohamba yange, Kalunga!
Tumina Jakob ekwafo!
5 Nekwafo loye ohatu ka denga poshi
ovatondi vetu,
nomedina loye hatu ka lyataula
ovakondjifi vetu.
6 Osheshi hauta wange handi lineekele,
ndele hamukonda wange
tau va taataifa nge;
7 ndelenee Oove tuu, we tu xupifa
movakondjifi vetu,
ndele Ove wa lengaifile ovatondi vetu.
8 Kalunga, Oye elitango letu omafiku aeshe,
nedina loye ohatu li hambelele fiyo alushe. Sela
9 Ndelenee paife owe tu ekelashi nokuli,
nowe tu tula melengwa,
ndele ito ende vali nomatanga ovakwaita vetu.
10 Ove wa efa, tu shunifwe lwanima kovatondi vetu,
novatondi vetu ova hakana oihakanwa.
11 Owe tu yandja ko, ngaashi eedi tadi i koshidipaelo,
ndele to tu halakanifa mokati koiwana yovapaani.
12 Owa landifa po ovanhu voye oshimha,
nomoku va landifa po kwoye ino limonena mo sha.
13 Owe tu etelifa odino kovashiinda vetu,
nokwaava twa shaama navo,
otwa ninga oiyolifa novadinwa kuvo.
14 Owa efa, fye tu ningwe etewo leengano dii komaludi ovapaani,
nomokati koiwana ohatu pukapukilwa komitwe.
15 Alushe elengwa lange oli li komesho yange,
nohoni oya pembifa oshipala shange,
16 eshi handi udu eyeelo neendjovo domasheko,
naashi handi konenene omesho omutondi nomunanghone.
17 Ashishe eshi oshe tu hanga,
nande fye mboli inatu ku dimbwa,
noinatu enda nekonda mehangano loye.
18 Omitima detu inadi shuna monima,
neemhadi detu inadi kanduka mo mondjila yoye,
19 ngeno opo u tu denge twa alamekwa pomikwena douvandje,
ndele to tu dingililifa omulaulu wefyo.
20 Ngeno kwa li twa dimbwa shili edina laKalunga ketu,
ndele hatu nanene omake etu
kukalunga kamwe ke lili;
21 ngeno Kalunga ine shi tenheneka poluhaela mbela?
Osheshi Oye omukonakoni woiholekwa yomutima.
22 Ahowe, omolwoye tu li po hatu dipawa keshe efiku,
ndee hatu talwa twa fa eedi dokudipawa.
23 Duduluka po! Omwene, oshike to kofa ngaha?
Penduka! Ino tu ekelashi fiyo alushe.
24 Molwashike wa uvika oshipala shoye,
ndele to dimbwa oluhepo letu nokufininikwa kwetu?
25 Akutu, eemwenyo detu oda polimanena mondwi yedu,
nomalutu etu okwa shatwa po, a lyamininwa poshi.
26 Fikama u tu kwafe,
Ove, tu kulila molwefilonghenda loye!
© Oshikwanyama Bible Revised © Bible Society of Namibia, 2008, 2012.
