Elao lomuhenakalunga tali xulu po
Epsalme laDavid.
Omuyuki ta xupifwa
1 Ino handuka nande molwovanawii,
novanyonauni ino va ningila ondubo.
2 Vo ve li ngaashi omwiidi,
ou uhe kwete okukukuta,
otava lembe ngaashi oimeno italala.
3 Lineekela Omwene, u longe ouwa,
kala moshilongo, u diinine oshili!
4 Opo u hafele Omwene,
ndele Ye te ku pe, eshi sha wapalela omutima woye.
5 Ondjila yoye i tula meke lOmwene,
u mu lineekele; Oye note shi ningi,
6 ndele ta ka holola ouyuki woye ngaashi ouyelele,
neyukifilo loye ongaashi omutenya.
7 Omwenyo woye u lotifila mOmwene, u mu teelele;
ino mbilingwa molwaau,
ondjila yaye i nomholo,
nomolwomulumenhu ta wanifa oumbudi waye.
8 Efa ehandu, u dje mo monya.
Ino mbilingwa; opo uha longe owii.
9 Osheshi ovaningi vowii
otava ka kombololwa po,
ndelenee ava tava teelele Omwene,
otava ka nangala oshilongo.
10 Ngeenge pa pita okafimbo kaningholi,
omuhenakalunga ita kala po vali,
nongeenge to talatala onhele yaye,
ke po vali nande.
11 Ndelenee ovananheni
vo otava ka fyuulula edu,
ndele tava ka hafela ombili inene.
12 Omuhenakalunga ota dutile omuyuki owii,
ndele te mu kweshele omayoo;
13 ndelenee Omwene ote mu yolo,
eshi a mona efiku laye,
li li popepi noku mu hanga.
14 Ovahenakalunga otava pweya mo omikonda,
ndele tava shoneke omauta avo,
va wilife po omapongo nomawilandjila,
nova dipae ava, tava ende nouyuki.
15 Omikonda davo otadi va pilukile,
di va twe momitima davo vene,
nomauta otaa teyaulwa po.
16 Okaxupinima komuyuki okawa, ke dule
oupuna wovahenakonasha naKalunga vahapu.
17 Osheshi omaoko ovalunde otaa teyaulwa,
ndelenee ovayuki otava pamekwa kOmwene.
18 Omafiku ovayuki Omwene oku a shii,
efyuululo lavo otali kalelele po.
19 Itava fifwa ohoni mefimbo lii,
nomomafiku ondjala otava kutifwa.
20 Ndelenee ovalunde otava nyonauka po,
novatondi vOmwene otava pu po
ngaashi ewapalo loimeno yomomatunda,
tava di po ngaashi omwifi.
21 Omunawii ota li ongele, ndele ite i futu,
ndelenee omuyuki oku na onghenda,
ta dulu okuyandja oshali.
22 Osheshi ava va punikwa kOmwene,
otava fyuulula edu,
ndelenee ava va fingwa kuye,
otava kombwa po.
23 Omanha omulumenhu muwa
taa yukifwa kOmwene,
ndele ta hafele mondjila yaye.
24 Ngeenge ta punduka, ita wililile po,
osheshi Omwene ote mu yakele.
25 Nghee nda li omumati fiyo nda kulupa,
omuyuki inandi mu mona nande a efuwa,
ile oludalo laye tali ehela oshifima.
26 Alushe ye omunalukeno
ndele ta yandje oikolo;
oludalo laye otali eta enangeko noupuna.
27 Kala kokule nowii u longe ouwa,
opo to kala alushe meumbo loye,
28 osheshi Omwene oku hole ouyuki,
novadiinini vaye ite va efa nande.
Ovalunde otava nyonaunwa po fiyo alushe,
nodikwa yavo otai kombololwa po sheke.
29 Ovayuki, vo otava ka fyuulula oshilongo,
ndele tava kala mo alushe.
30 Okanya komuyuki otaka popi ounongo,
nelaka laye ouyuki.
31 Omhango yaKalunga kaye
okwe i tula momutima waye,
nomanha aye itaa ka tengauka.
32 Omuhenakalunga ota nangele omuyuki,
ndele ta kongo oku mu dipaa.
33 Ndelenee Omwene ite mu yandje momake aye,
ita efa nande, a pewe oushima metokolo.
34 Teelela Omwene, ove u lambalale ondjila yaye,
opo nee Ye ote ku lenge,
oshilongo shi ninge shoye,
ndele to hafifwa kekombololo lovahenakalunga.
35 Onda mona omuhenakalunga a fulakata,
te litandavelifa ngaashi omuti mutalala,
tau litwala ko mwene.
36 Opo nda enda po, ndele tala, ke po vali,
onde mu konga, ndele inandi mu mona.
37 Lilonga komuhaya, tala kovayuki,
osheshi efimbo lokomesho
tali ka kala lomulumenhu omunambili.
38 Ndelenee ovanyonauni otava hanaunwa po,
nefimbo lokomesho lovahenakalunga
otali ka tetwa po sheke.
39 Ekwafo lovayuki otali di kOmwene,
Oye ohotengulu yavo mefimbo lomaudjuu;
40 osheshi Omwene ote va kwafa,
ndele te va xupifa;
ote va xupifa movahenakalunga,
ote va xupifa molwaashi ve liyandja kuye.
© Oshikwanyama Bible Revised © Bible Society of Namibia, 2008, 2012.
