Ehambelelo kuKalunga
1 Ovayuki nye, nyakukilweni mOmwene!
Oshe mu wapalela, ovakoshoki nye,
mu mu imbile ehambelelo.
2 Panduleni Omwene, mu mu shikile oumbulumbubwa,
nye mu mu shikile onyalilo yeefenga omulongo.
3 Mu imbileni eimbilo lipe,
shikeni nawa neendaka denghuma.
4 Osheshi ondjovo yOmwene oya yuka,
nomudiinini moilonga yaye aishe;
5 Oku hole ouyuki netokolo la yuka;
edu oli yadi onghenda yaye.
6 Eulu ola shitifwa ondjovo yOmwene,
neengudi dalo adishe okomhepo yokanya kaye.
7 Omeva efuta ote a tumbifa ngaashi onduba,
momalimba aye ota tulike oulembwili.
8 Edu alishe nali tile Omwene.
Ovakalimo mounyuni aveshe
nava kakame koshipala shaye.
9 Osheshi Ye okwa popya, ndele sha ningwa,
okwa lombwela, ndele osha monika.
10 Omwene okwa hanauna po eemhangela doiwana,
nomadiladilo ovanhu okwe a xutula.
11 Omhangela yOmwene otai kalelele,
nomadiladilo omutima waye
okomapupi nomapupi.
12 Oshiwana oshinelao, osheshi
shi na Kalunga kasho Omwene,
e shi lihoololela, shi ninge efyuululo laye.
13 Omwene meulu ha tale poshi,
noku wete ovana aveshe vovanhu;
14 monhele yaye ota kevauka ovakwadu aveshe,
15 Oye tuu omuyandjilupe womitima davo adishe,
nomukoneki woilonga yavo aishe.
16 Ohamba itai xupifwa molwounenengudu wayo,
nofule itai likwafa keenghono dayo.
17 Onghambe itai kwafa sha mefindano
noitai xupifa keenghono dayo dinene.
18 Tala, eisho lOmwene otali taalele
kwaava have mu tila,
okwaava va teelela ouwanghenda waye,
19 a xupife eemwenyo davo mefyo,
Ye e va palule mondjala, vaha fye.
20 Eemwenyo detu otadi teelele kOmwene;
Oye ekwafo letu noshikelelifo shetu.
21 Heeno, omutima wetu otau hafele muye,
osheshi edina laye liyapuki olo twe lineekela.
22 Omwene, ouwanghenda woye
nau kale kombada yetu,
ngaashi fye yo tu li po, twe ku teelela.
© Oshikwanyama Bible Revised © Bible Society of Namibia, 2008, 2012.
