Panduleni Omwene, osheshi ouwanghenda waye otau kalelele
1 Panduleni Omwene, osheshi Oye omuwa!
Osheshi alushe ouwanghenda waye
tau kala po.
2 Panduleni Kalunga kookalunga,
osheshi alushe ouwanghenda waye
tau kala po.
3 Panduleni Omwene woovene,
osheshi alushe ouwanghenda waye
tau kala po.
4 Oye ou, ha longo oikumwifalonga, Oye aeke,
osheshi alushe ouwanghenda waye
tau kala po.
5 Oye tuu ou, a shita omaulu nounongo waye,
osheshi alushe ouwanghenda waye
tau kala po.
6 Oye tuu ou, a valela edu kombada yomeva,
osheshi alushe ouwanghenda waye
tau kala po.
7 Ou omushiti womaminikilo manene,
osheshi alushe ouwanghenda waye
tau kala po.
8 Etango li pangele omutenya,
osheshi alushe ouwanghenda waye
tau kala po.
9 Ohani neenyofi oyo i pangele oufiku,
osheshi alushe ouwanghenda waye
tau kala po.
10 Oye tuu, a denga oiveli yOvaegipiti,
osheshi alushe ouwanghenda waye
tau kala po;
11 nOvaisraeli okwe va pitifa mokati kavo,
osheshi alushe ouwanghenda waye
tau kala po;
12 neke la li li neenghono, nokwooko kwa tanganana,
osheshi alushe ouwanghenda waye
tau kala po;
13 Oye tuu, a taula Efuta Litilyana pokati,
osheshi alushe ouwanghenda waye
tau kala po;
14 novaIsraeli okwe va tokolifa mo mokati kalo,
osheshi alushe ouwanghenda waye
tau kala po;
15 ndele Farao nongudu yaye yovakwaita
okwe va undulila mo mEfuta Litilyana,
osheshi alushe ouwanghenda waye
tau kala po;
16 Oye tuu, a taululifa ovanhu vaye mombuwa,
osheshi alushe ouwanghenda waye
tau kala po;
17 Oye tuu, a denga eehamba dinene,
osheshi alushe ouwanghenda waye
tau kala po;
18 neehamba da li da tumbala okwe di dipaa,
osheshi alushe ouwanghenda waye
tau kala po.
19 Sihon, ohamba yOvaamori,
osheshi alushe ouwanghenda waye
tau kala po,
20 naOg, ohamba yomuBasan,
osheshi alushe ouwanghenda waye
tau kala po.
21 Noilongo yado okwe i yandja efyuululo,
osheshi alushe ouwanghenda waye
tau kala po;
22 i ninge efyuululo lomupiya waye Israel,
osheshi alushe ouwanghenda waye
tau kala po.
23 Oye tuu ou, e tu dimbulukwa mediniko letu,
osheshi alushe ouwanghenda waye
tau kala po.
24 Nokwe tu kulila kovafininiki vetu,
osheshi ouwanghenda waye
tau kala po alushe.
25 Oye ou, omupaluli woinamwenyo aishe,
osheshi alushe ouwanghenda waye
tau kala po.
26 Panduleni Kalunga komeulu!
Osheshi alushe ouwanghenda waye
tau kala po.
© Oshikwanyama Bible Revised © Bible Society of Namibia, 2008, 2012.
