Eimbilopandulo lomoshivilo
1 Hambeleleni Omwene, osheshi Oye omuwa,
ouwanghenda waye otau kala po alushelushe.
2 Israel osho na tye:
“Ouwanghenda waye otau kala po alushelushe!”
3 Vomeumbo laAron osho nava tye yo:
“Heeno, ouwanghenda waye
otau kala po alushelushe.”
4 Ava hava tila Omwene osho nava tye:
“Heeno, ouwanghenda waye
otau kala po alushelushe.”
5 Moudjuu wange onda ifana kOmwene,
opo Omwene okwa uda nge,
ndele a tula nge mokaalanga.
6 Omwene Oye e kwete nge, itandi tila sha.
Ovanhu otava ningi nge shike?
7 Omwene okwa ama nge, Oye ta kwafa nge.
Osho handi dulu okutala nehafo ovatondi vange.
8 Okulineekela Omwene oku dule okulineekela ovanhu.
9 Okulineekela Omwene
oku dule okulineekela ovapangeli.
10 Ovapaani aveshe ova kondekela nge;
medina lOmwene onde va hanauna po.
11 Ova li va kondekela nge, va li va dingilila nge;
medina lOmwene onde va hanauna po.
12 Ova li va kondekela nge ngaashi eenyiki,
va xula po ngaashi omundilo womakiya;
medina lOmwene onde va hanauna po.
13 Onda undwilwa nai kwoove ndi wile po,
ndelenee Omwene okwa kwafa nge.
14 Omwene Oye eenghono dange neimbilo lange,
Ye okwa ninga omuxupifi wange.
15 Okunyakukwa nokwiimbila efindano
otaku udika meenhanda dovayuki:
olulyo lOmwene otali longifa oilonga yeenghono:
16 “Olulyo lOmwene ola yeluka,
olulyo lOmwene ohali longifa oilonga yeenghono!”
17 Ame itandi fi, ndelenee ohandi kala nomwenyo,
ame ndi udife oinenelonga yOmwene.
18 Omwene okwa li a vyula nge noudjuu,
ndelenee Ye ina yandja nge ndi fye.
19 Yeululile nge oivelo youyuki,
onda hala okupita muyo,
ndi ka pandule Omwene.
20 Oshivelo shOmwene osheshi;
omu tamu iwa kovayuki.
21 Ohandi ku pandula, eshi wa uda nge,
naashi wa ninga omuxupifi wange.
22 Emanya olo ovatungi ve li ekelashi,
olo la ninga omutwe wokolonela.
23 Eshi osha dja mOmwene,
noshikumwifa momesho etu.
24 Efiku olo tuu eli, ola tulwa po kOmwene;
tu li nyakukilweni, fye tu li hafele.
25 Akutu, Omwene, tu xupifa!
Akutu, Omwene, tu pa elao!
26 Na nangekwe noupuna,
ou te uya medina lOmwene.
Ohatu mu punikile mongulu yOmwene.
27 Kalunga Oye Omwene, Oye e tu pa ouyelele.
Omayambo oshivilo a mangeni neengodi
a hange oaltari fiyo okeembinga dayo!
28 Oove Kalunga kange, onda hala ndi ku pandule.
Kalunga kange, nda hala ndi ku fimaneke.
29 Hambeleleni Omwene, osheshi Oye omuwa,
heeno, ouwanghenda waye otau kala po alushelushe.
© Oshikwanyama Bible Revised © Bible Society of Namibia, 2008, 2012.
