Oinenelonga yexupifo laKalunga muIsrael
1 Hambeleleni Omwene,
ifaneni edina laye!
Hepaululeni oinenelonga yaye
mokati koiwana yoilongo.
2 Mu imbileni, mu shikileni,
udifeni oikumwifalonga yaye aishe.
3 Tumbalekeni edina laye liyapuki.
Ava tava kongo Omwene,
omutima wavo nau kale wa hafa.
4 Lipuleni nOmwene neenghono daye,
efimbo alishe kongeni oshipala shaye.
5 Dimbulukweni oikumwifa oyo e i longa,
nomadidilikokumwifa aye
nomatokolo okanya kaye,
6 oludalo nye laAbraham, omupiya waye,
ovana vaJakob, ovahoololwa vaye.
7 Omwene Oye Kalunga ketu;
omatokolo aye otaa udika mounyuni aushe.
8 Diladileni alushe ehangano laye,
neendjovo daye edi
a dikila omaludalo omayovi,
9 ehangano olo e li udafanene naAbraham,
neano olo e li anenene Isak,
10 olo e li a pamekelele Jakob,
li kale omhangela yaye
nehangano laye naIsrael fiyo alushe,
11 eshi a tile: “Edu laKaanan, ohandi li ku pe,
lo li kale oshitukulwafyuululwa sheni.”
12 Vo eshi va li okangudu kanini,
ke vahapu nande,
ndele va li mo ovanailongo;
13 ovatembavaukili koshiwana noshiwana,
koshilongo noshilongo.
14 Ndelenee Ye ina efa nande umwe e va fininike,
nokwa li a handukila eehamba omolwavo,
15 ndele ta ti: “Inamu kuma nande ovavaekwa vange,
nye inamu hepeka ovaxunganeki vange.”
16 Opo nee eshi kwa li a undulila oilongo ondjala,
nokwa kufa mo oshishipo keshe sheendja,
17 okwe va tetekelifila nale omulumenhu,
Josef, ou a li a landwa po, a ninga omupika.
18 Eemhadi daye okwa li ve di tula meti,
ve mu twalele ko nomalyenge
19 fiyo okefiku eli, exunganeko laye la shakenifwa,
nondaka yOmwene ye mu tokolela.
20 Opo nee ohamba oya tumine, a ka mangululwe,
omupangeli woiwana okwe mu efa,
21 ndele te mu lenge, a ninge elenga lakula leumbo laye,
nomuyukifi woinima yaye aishe,
22 a pangele omalenga aye pahalo laye mwene,
ye a longe ovakulunhu vaye eendunge.
23 Osho tuu ngaha Israel okwa ile muEgipiti,
ndele Jakob a kala omunailongo medu laHam.
24 Opo Kalunga okwa hovela okuhapupalifa ovanhu vaye,
ndele te va pameke ve dule ovafininiki vavo eenghono.
25 Eemwenyo daavenya okwe di lundulula,
va tonde ovanhu vaye,
nova ninge ovapiya vaye ekonda.
26 Opo nee Ye a tuma Moses, omupiya waye,
naAron, ou a hoolola;
27 omadidiliko aye a longa mokati kavo,
noikumwifa medu laHam.
28 Okwa umbila mo omulaulu, wa laula fokofoko;
ndelenee eendjovo daye inave di anya.
29 Omeva avo okwe a shitukifa ohonde,
eeshi adishe di file mo.
30 Oshilongo shavo osha yada omayula,
a shituka nomeendjuwo deehamba davo.
31 Okwa tonga, ndele oihomo yeemwe ye uya,
noyomawashe medu lavo alishe;
32 e va lokifila eemhawe ponhele yodula,
nomitemo domundilo moshilongo shavo.
33 Omiviinyu nomikwiyu davo okwe di tetaula po,
nomiti domoshilongo shavo okwe di teyaula mo.
34 Okwa tonga, opo oshipaxu she uya
nokanakalombo, kehe shii kuvalwa.
35 Yo oya mana po oimeno aishe moshilongo,
noilya yomomapya ya lika po sheke.
36 Opo vali okwa dipaifa oiveli aishe moshilongo,
oiveli yeenghono davo aishe,
37 ndele ta tembukifa mo Ovaisraeli
ve noisiliveli noingoldo,
nomokati komapata avo
kamwa li nande oshingudu.
38 Ovaegipiti okwa li va fudifwa ketembu lavo,
osheshi ova li va kwatwa koumbada molwavo.
39 Ye okwe va uvikila noshilemo ngaashi onhanga,
nomundilo wokuminikila oufiku;
40 vo ova indila, opo Ye okwe va undulila oimote,
ndele te va palula nomungome tau di keulu;
41 okwa taula emanya, ndele tali di omeva
taa kungulukile poshi,
ndele taa tondokele momatunda ngaashi omulonga;
42 osheshi ye a dilakana ondjovo yaye iyapuki,
okwa dimbulukwa Abraham, omupiya waye.
43 Osho ngaha a pitifa mo ovanhu vaye nehafo,
novahoololwa vaye neenghalu;
44 opo nee e va pa oilongo yovapaani,
nolukongo loiwana yoilongo,
eli ye likongelele, vo ve li kwata,
45 opo vo va anyene moipango yaye,
nova shakenife eenghedi daye.
Halleluya!
© Oshikwanyama Bible Revised © Bible Society of Namibia, 2008, 2012.
