Panduleni Kalunga, Oye omufilinghenda
Epsalome laDavid.
1 Omwenyo wange, hambelela Omwene,
naashishe shomeni lange
nashi hambelele edina laye liyapuki!
2 Omwenyo wange, hambelela Omwene,
ove ino dimbwa ouwa, ou e ku ningila!
3 Oye tuu ou, ta dimi po owii aushe,
ndele te ku velula komaudu oye aeshe;
4 Oye tuu, ta xupifa oukalimwenyo woye melambo,
ndele te ku dike oshishani shouwanghenda nefilonghenda,
5 Oye tuu, ota wanifa omahalelo oye nouwa waye,
opo u alulilwe ounyasha woye
ngaashi ounyasha wonhwa.
6 Omwene oha longifa ouyuki,
novafininikwa aveshe ohe va longele eyukifilo.
7 Moses okwa li e mu shiivifa eendjila daye,
novamati vaIsrael oilonga yaye.
8 Omwene Oye omunefilonghenda nomunanghenda,
oku yadi onheni nouwanghenda munene.
9 Iha handuka alushe, nonya ihai kalelele muye.
10 Ye ite tu ningile eshi sha yeleka omatimba etu,
ndele ite tu alulile shi fike powii wetu;
11 ndelenee apa pe fike oule weulu kombada yedu,
opo ope fike yo ounene wouwanghenda
waye kombada yaava have mu tila;
12 ngaashi oushilo nouninginino u lili kokule,
osho Ye ha ehenifa omanyono etu kokule nafye;
13 ngaashi xe ta file ounona vaye onghenda,
Omwene osho ha file onghenda ava have mu tila.
14 Osheshi Oye ta shiiva oshitwe yetu, nhumbi tu li;
ota dimbulukwa, nokutya fye ondwi yedu.
15 Omunhu, omafiku aye okwa fa omwiidi,
ngaashi onhemo yomoixwa tai hape, osho ha kala;
16 omhepo, ngeenge tai i pepe po, yo kai po vali,
ndele onhele, apa ya kala, kape shiivike nande.
17 Ndelenee ouwanghenda wOmwene,
oo ohau kala alushe fiyo alushe
kombada yaava, have mu tila,
noudiinini waye koludalo noludalo,
18 kwaava, hava anyene mehangano lavo naye,
ndele tava dimbulukwa oipango yaye, ve i wanife.
19 Omwene meulu okwe li ningila mo olukalwa laye,
nouhamba waye otau pangele akushe.
20 Ovaengeli vaye nye,
hambeleleni Omwene,
ovaladi ovanaenghono nye,
oonakuwanifa ondaka yaye,
ava hamu dulika kelombwelo leendjovo daye!
21 Eengudu dovakwaita vaye amushe,
hambeleleni Omwene,
ovapiya vaye nye, ava hamu wanifa ehalo laye.
22 Oilonga yaye amushe nye,
hambeleleni Omwene
keenhele adishe depangelo laye.
Omwenyo wange,
hambelela Omwene!
© Oshikwanyama Bible Revised © Bible Society of Namibia, 2008, 2012.
