Eindilo letungululo laSion
Eindilo lepongo mokuloloka kwalo, noupongo walo ngeenge tali u mbululile koshipala shOmwene.
1 Omwene, uda eindilo lange,
nonghuwo yange nai fike kwoove!
2 Alushe ngeenge handi tila,
ino holeka nge oshipala shoye,
alushe ngeenge handi ifana,
endekela okutwi kwoye kwaame, u kwafe nge diva.
3 Akutu, omafiku ange taa hanauka po ngaashi omwifi,
nomakipa ange otaa pupyala a fa taa pi komundilo;
4 omutima wange owa kata nowa kukuta ngaashi omwiidi;
osha dimbwifa nge okulya omungome.
5 Mokukema kwange mokule,
eenhumba dange otadi kanyatele komakipa ange.
6 Onda fa oshikakalwa mombuwa,
onda ninga nda fa exuvi meputu.
7 Ihandi mono nande eemhofi,
ndele ondi li ngaashi okadila ke likalela konduda.
8 Efiku alishe ovatondi vange ohava yeele nge;
ava tava shivile nge olwoodi,
otava halele nge omupya.
9 Osheshi ohandi li omute ngaashi omungome hau liwa,
nomoshikunwa shange
ohandi shishifile mo omahodi
10 molwehandu loye nomolwonya yoye;
osheshi Ove wa yelula nge nowa shata nge poshi.
11 Omafiku ange okwa fa omudidimbe wa ya kokule,
ndele ame ohandi kukuta ngaashi ombidi.
12 Ndelenee Omwene, Ove ho pangele alushe,
nedina loye otali kala koludalo noludalo.
13 Ove to fikama nokuli, u ka file Sion onghenda,
osheshi efimbo loku shi fila onghenda
olo alike eli; okafimbo kaye oka monika.
14 Osheshi ovapiya voye ove hole
pomamanya aSion,
nomakulukuma asho tave a nyikile oufiye.
15 Opo nee opo ovapaani
otava ka tila edina lOmwene,
neehamba dokombada yedu efimano loye.
16 Heeno, Omwene ota ka tungulula Sion,
ndele ta monika moshinge shaye,
17 ote liameke komaindilo ovaefiwa,
ndele ita dini omakweno avo.
18 Eshi, osho nashi shangelwe oludalo olo tali uya,
ovanhu ovo opo tava shitwa,
vo va tange Omwene,
19 molwaashi e li moulembada waye uyapuki
a taalela pedu,
heeno, Omwene eshi e li meulu, ota tale pedu,
20 Ye a pwilikine eenghwate, nhumba tadi keme,
nokuxupifa ava va tokolelwa efyo,
21 vo va udife muSion edina lOmwene,
nefimano laye muJerusalem,
22 oiwana yoilongo, ngeenge tai liongele
aishe mumwe,
noilongo i longele Omwene.
23 Eenghono dange okwe di xutula ondjilakati,
nomuvalu womafiku ange okwe u ninipika.
24 Kalunga kange, ohandi ti:
“Ino vakula nge po
poshakati shomafiku ange, Oove ou,
u nomido hadi kala komaludalo aeshe.”
25 Nalenale Oove wa shita edu,
nomaulu oo oshilongwa shomake oye.
26 Oyo tai xulu po, Ove auke to kala po,
otai kulupa po aishe, ya fa oshikutu,
to i lidula ngaashi omudjalo u djale umwe,
oyo notai shitukifwa.
27 Ndelenee Ove to kala ngaho, ngaashi u li,
omido doye ihadi xulu po nande.
28 Ovana vovapiya voye otava kala ve li nawa,
noludalo lavo otali kala alushe koshipala shoye.
© Oshikwanyama Bible Revised © Bible Society of Namibia, 2008, 2012.
