Ounongo tau shivi koshivilo shao
1 Ounongo we lidikila eumbo, wa honga eengudi dao heyali; 2 Oo wa toma eenhomenawina dao, wa dunga omaviinyu ao ndele wa dika oshililo shao. 3 Oo wa tuma ko ovapiya vao ovakainhu, va shive kominghulo doikulundudu yoshilando: 4 “Omushima ne uye oku!” Ou ehe neendunge, ta lombwelwa kuo: 5 “Ileni, lyeni momungome wange ndele nweni momaviinyu nde a dunga. 6 Efeni oushima, opo nee tamu ka kala nomwenyo ndele endeni nondjila yeendunge.”
7 Ou ta kumaida omusheki, ote lietele ohoni, ndele ou ta hanyene omuhenakalunga, ta mono elopyolopyo lohoni. 8 Ino hanyena omusheki, opo ye ehe ku tonde. Hanyena omunandunge, ndele ye e ku hole. 9 Pa omunandunge, opo eendunge daye tadi ka hapupala; longa omuyuki, opo omayele aye taa ka hapupala.
10 Efina lounongo olo okutila Omwene. Okushiiva Omuyapuki okwo eendunge. 11 Osheshi omolwange omafiku oye taa hapupala, omido dokukalamwenyo kwoye tadi twikilwa. 12 Oove ngeenge omunongo, ounongo woye tau ku kwafa, ndele ngeenge ove omusheki, oove auke u noku shi humbata. 13 Oulai oo ngaashi omukainhu ehe netulumuko, oushima auke ndele ina shiiva sha nande. 14 Ndele ye ta kala omutumba ponhu yeumbo laye, koshipundi koikulundudu yoshilando, 15 a shiive ovo hava ende po nondjila, ovo hava ende va yuka nomalila avo: 16 “Omushima ne uye oku.” Ndele ta lombwele ou ehe neendunge ndele ta ti kuye: 17 “Omeva oulunga omanyenye, omungome wa holekwa omuwa.” 18 Ndelenee ou ke shi shii nokutya, oko oku na oilulu, novashivwa vakwao ve li mokule moshovafi.
© Oshikwanyama Bible Revised © Bible Society of Namibia, 2008, 2012.
