OMAYELETUMBULO 28 - Oshikwanyama Bible (OKYB)

1 Ovahenakalunga tava i onhapo nande kaku na ou te va taataa. Ndelenee ovayuki ve nouladi ngaashi onghoshi yonyasha. 2 Omolwetauluko oshilongo tashi mono omalenga mahapu, ndelenee molwomunhu umwe omunaendunge e neshiivo neenghediduliko tadi kala po. 3 Omulumenhu omukwanaluhepo ta fininike ovakwanaluhepo, oye e li ngaashi odula tai yelula, yo itai eta omungome. 4 Ovaliteeki vomhango tava tange ovahenakalunga, ndelenee ovawanifi vomhango otave va hanyene. 5 Ovanhu vali ihava udu ko ouyuki, ndelenee ava hava kongo Omwene, ve neshiivo laaishe. 6 Ohepele oyo tai ende ihe noshipo, i dule oshipuna tashi ende neendjila mbali. 7 Ou ta diinine omhango, ye omumati omunaendunge. Ndelenee ou ha kala movahanauni, ota fifa xe ohoni. 8 Ou ta hapupalifa emona laye noishoshela noifutifa, ota ongelele ou ta file eehepele onghenda. 9 Ou ta fitike okutwi kwaye aha ude omhango, neilikano laye nokuli oixuna. 10 Ou ta pukifa ovayuki kondjila yowii, ye mwene ota ka wila mo melambo laye, ndelenee ava vehe noshipo tava fyuulula elao. 11 Omulumenhu oshipuna oye omunaendunge momesho aye mwene. Ndelenee ohepele e neendunge ote mu konakona. 12 Ovayuki eshi tava kuwilile, elao li li po linene. Ndelenee ovahenakalunga eshi tava fikama ovanhu tava hondama. 13 Ou ta holeke omatauluko aye, ita ka mona elao. Ndelenee ou te a hepaulula ndele te a efa, ota ka filwa onghenda. 14 Omunelao omunhu ou ta kala alushe a lungama. Ndelenee ou ta kukutike omutima waye ota ka wila momupya. 15 Ngaashi onghoshi tai kumbu, nemwangha tali fi ondjala, osho yo omupangeli ou ta pangele ovanhu ve noluhepo. 16 Ohamba oyo ya hepa eendunge, otai futifa unene, ndelenee oyo tai tondo eliko loipupulu, otai hapupalifa omafiku ayo. 17 Omunhu ou ta fininikwa ketimba lohonde yomunhu e nokuhondama fiyo okefyo laye. Kape na nande umwe ou te mu amene. 18 Ou ha ende nouyuki ota ka kwafwa, ndelenee ou ta ende nokutengatenga neendjila, ota wile po. 19 Ou ta longo epya laye, ota ka mona omungome muhapu. Ndelenee ou ta lalakanene oinima yongaho, ota ka mona oluhepo linene. 20 Omulumenhu e shii kulineekelwa ta nangekwa noupuna shili. Ndelenee ou e nolwisho lokupunapala, ita kala ina handukilwa. 21 Okukala nokatongotongo keshiwa, osheshi omolwokapambu komungome nokuli omunhu ta nyono. 22 Onakufya efupa a hala okulikongela divadiva, ndele ke shi shii, nokutya oluhepo tali ke mu hanga. 23 Ou ta hanyene omunhu, ota ka hokiwa komesho yaau ta heke nelaka laye. 24 Ou ta nyeka xe ile ina ndele ta ti: “Kaku nenyono,” oye omukwao womuhanauni. 25 Omunalwisho weliko ta pendula eemhata, ndelenee ou te lineekele Omwene, ota ka hekelekwa. 26 Ou te lineekele omutima waye mwene, oye elai. Ndelenee ou ha ende neendunge ota xupifwa. 27 Ou ta pe ohepele, ita ka hepa, ndelenee ou ta fifikinine omesho aye ota ka tulwa omutima shili. 28 Ovahenakalunga eshi tava fikama, ovanhu tava hondama. Ndelenee venya ngeenge tava hanaunwa po, ovayuki tava hapupala.