Ovana oukadona vaSelofhad tava mono oitukulwafyuululwa
1 Opo nee ovakulunhu vomaludi epata lovana vaGilead yaMakir yaManasse vomepata lovana vaJosef va ehena, ve uya koshipala shaMoses noshovakulunhu, ovakulunhu vomaludi ovana vaIsrael ndee tava ti: 2 “Omwene okwa lombwela omwene wange edu li tukulilwe ovana vaIsrael efyuululo pashihoololifo. Nosho yo omwene wange a lombwelwa kOmwene okupa ovana oukadona vaSelofhad oshitukulwafyuululwa shamumwameme. 3 Vo ngeenge tava ka ninga ovalikadi vovalumenhu vomepata limwe laIsrael, opo nee oshitukulwafyuululwa shavo tashi ka kufwa mo moitukulwafyuululwa yatate, ndele tashi tulwa kumwe noshitukulwafyuululwa shepata olo tava i mo. Ndelenee oshitukulwafyuululwa shetu tashi ninipikwa. 4 Nomudo wekuwililo lovana vaIsrael ngeenge tau uya, opo nee oshitukulwafyuululwa tashi ka tulwa kumwe noshitukulwafyuululwa shepata olo mulo tava ka kala. Nosho ngaha hano oshitukulwafyuululwa shavo tashi kufwa mo moshitukulwafyuululwa shootate.”
5 Opo nee Moses palombwelo lOmwene okwa lombwela Ovaisraeli, ndee ta ti: “Epata lovana vaJosef tava popi da yuka. 6 Moshinima shovana oukadona vaSelofhad Omwene ta lombwele ngaha: Nava hombolwe kwaava ve va hala, ndelenee vo ve nokuhombolwa ashike moludi lomepata laxe. 7 Opo oshitukulwafyuululwa shomepata shiha ninge shomepata limwe. Osheshi ovana vaIsrael, keshe umwe, e nokudiinina oshitukulwafyuululwa shomepata looxe. 8 Momona keshe okakadona ou ta pewa oshitukulwafyuululwa shomomapata ovana vaIsrael, e nokuhombolwa kuumwe womoludi lomepata looxe, opo keshe umwe womovana vaIsrael a shiive okufyuulula oshitukulwafyuululwa shooxe. 9 Osho ngaha hano oshitukulwafyuululwa shomepata limwe itashi i kepata likwao. Osheshi keshe epata lomomapata ovana vaIsrael li nokudiinina oshitukulwafyuululwa shalo.”
10 Omwene ngaashi a lombwela Moses, osho ovana oukadona vaSelofhad va ninga. 11 Mahla naTirsa naHogla naMilka naNoa, ovana oukadona vaSelofhad ova hombolwa kovana ovamati vooxekulu. 12 Vo ova hombolwa kovakwanepata vovana vaManasse yaJosef. Osho ngaha hano oshitukulwafyuululwa shavo osha kala mepata loludi looxe.
13 Oyo oipango nomalombwelo Omwene a lombwela ovana vaIsrael mokanya kaMoses, momaluhaela aMoab puJordan monhele ya shaama naJeriko.
© Oshikwanyama Bible Revised © Bible Society of Namibia, 2008, 2012.
