Omayambo efiku omanghuma taa shikwa
1 “Ndele mohani onhiheyali mefiku lotete lohani nye mu nokwoongala moshiongalele sheni shiyapuki. Inamu longa sha shomoilonga yeni. Olo nali ninge kunye efiku lokushika enghuma. 2 Nye mu nokuyamba exwikiloyambo edimba liwa kOmwene: ongobe onyasha imwe yomhedi, odi imwe yomhedi, oudjona vaheyali vomudo umwe vehe noshipo, 3 neendjayambo deni: oufila wa nakwa mwa pilulilwa omaadi, eekilograma nhatu kongobe imwe yomhedi, eekilograma mbali kodi imwe, 4 nokilograma imwe kodjona keshe yomoudjona vaheyali. 5 Noshikombo shimwe oshipedi etimbayambo oku mu kwatakanifa, 6 ponho yexwikiloyambo lohani ipe neendjayambo dalo nexwikiloyambo lomafiku aeshe neendjayambo dalo, noikunwayambo yalo papukululomhango layo i ninge edimba liwa, omundiloyambo kOmwene.
Omayambo omefiku lekwatakanifo
7 “Ndele mefiku etimulongo lohani tuu ei onhiheyali mu nokwoongala moshiongalele sheni shiyapuki, ndele nye mu nokunyika oluhodi. Inamu longa sha. 8 Opo nee mu nokweetela Omwene exwikiloyambo edimba liwa: ongobe onyasha imwe yomhedi, odi imwe yomhedi, oudjona vaheyali vomudo umwe vehe noshipo kunye; 9 neendjayambo dado: oufila wa nakwa mwa pilulilwa omaadi eekilograma nhatu kongobe imwe yomhedi, eekilograma mbali kodi imwe, 10 nokilograma imwe kodjona keshe yomoudjona vaheyali. 11 Oshikombo shimwe oshipedi etimbayambo ponho yetimbayambo lekwatakanifo nexwikiloyambo lomafiku aeshe neendjayambo dalo, noikunwayambo yalo.
Omayambo omoshililo shomatwali
12 “Ndele mefiku etimulongo netitano lohani onhiheyali nye mu nokwoongala moshiongalele shiyapuki. Inamu longa sha shomoilonga yeni, ndelenee mu nokudana oshivilo koshipala shOmwene omafiku aheyali. 13 Ndele mu nokweetela Omwene exwikiloyambo, omundiloyambo wedimba liwa: eengobe eenyasha omulongo nanhatu deemhedi, eedi mbali deemhedi, oudjona omulongo navane vomudo umwe vehe noshipo. 14 Eendjayambo dado: oufila wa nakwa mwa pilulilwa omaadi weekilograma nhatu kongobe keshe yomeengobe omulongo nanhatu; eekilograma mbali kodi keshe yomeedi mbali. 15 Nokilograma imwe kodjona keshe yomoudjona omulongo navane. 16 Noshikombo oshipedi etimbayambo ponho yexwikiloyambo lomafiku aeshe, neendjayambo dao noikunwayambo yao.
17 “Ndelenee mefiku etivali: eengobe eenyasha omulongo nambali deemhedi, eedi mbali deemhedi noudjona omulongo navane vomudo umwe vehe noshipo. 18 Eendjayambo dado noikunwayambo yado keengobe, keedi nokoudjona pamuvalo wado papukululomhango. 19 Noshikombo shimwe oshipedi etimbayambo ponho yexwikiloyambo lomafiku aeshe, eendjayambo dalo noikunwayambo yalo.
20 “Ndele mefiku etitatu: eengobe omulongo naimwe deemhedi, eedi mbali deemhedi noudjona omulongo navane vomudo umwe vehe noshipo. 21 Eendjayambo dado, noikunwayambo yado keengobe, keedi nokoudjona pamuvalo wado papukululomhango. 22 Noshikombo shimwe oshipedi etimbayambo ponho yexwikiloyambo lomafiku aeshe neendjayambo dalo noikunwayambo yalo.
23 “Opo nee mefiku etine: eengobe omulongo deemhedi, eedi mbali deemhedi noudjona omulongo navane vomudo umwe vehe noshipo. 24 Eendjayambo dado noikunwayambo yado keengobe, keedi nokoudjona pamuvalo wado papukululomhango. 25 Noshikombo shimwe oshipedi etimbayambo ponho yexwikiloyambo lomafiku aeshe, eendjayambo dalo noikunwayambo yalo.
26 “Ndele mefiku etitano: eengobe omugoi deemhedi, eedi mbali deemhedi noudjona omulongo navane vomudo umwe vehe noshipo. 27 Eendjayambo dado noikunwayambo yado keengobe, keedi nokoudjona, pamuvalo wado papukululomhango. 28 Noshikombo shimwe oshipedi etimbayambo ponho yexwikiloyambo lomafiku aeshe, eendjayambo dalo noikunwayambo yalo.
29 “Ndelenee mefiku etihamano: eengobe hamano deemhedi, eedi mbali deemhedi, noudjona omulongo navane vomudo umwe vehe noshipo. 30 Eendjayambo dado noikunwayambo yado keengobe, keedi nokoudjona pamuvalo wado papukululomhango. 31 Noshikombo shimwe oshipedi etimbayambo ponho yexwikiloyambo lomafiku aeshe, eendjayambo dalo noikunwayambo yalo.
32 “Ndelenee mefiku etiheyali: eengobe heyali deemhedi, eedi mbali deemhedi, oudjona omulongo navane vomudo u mwe vehe noshipo. 33 Eendjayambo dado noikunwayambo yado keengobe, keedi nokoudjona pamuvalo wado papukululomhango. 34 Noshikombo shimwe oshipedi etimbayambo ponho yexwikiloyambo lomafiku aeshe, eendjayambo dalo noikunwayambo yalo.
35 “Mefiku etihetatu mu nokwoongala koshiongalele shoshivilo. Inamu longa sha shomoilonga yeni. 36 Ndele nye mu nokweetela Omwene exwikiloyambo, omundiloyambo wedimba liwa: ongobe imwe yomhedi, odi imwe yomhedi noudjona vaheyali vehe noshipo. 37 Eendjayambo dado noikunwayambo yado kongobe, kodi nokoudjona, pamuvalo wado papukululomhango. 38 Noshikombo shimwe oshipedi etimbayambo ponho yexwikiloyambo lomafiku aeshe, eendjayambo dalo noikunwayambo yalo.”
39 Oo mu noku a yambela okufimanekifa Omwene moivilo yeni ponho yomaudanekoyambo eni neeshaliyambo deni dehalo liwa, aa tamu a eta omaxwikiloyambo ile eendjayambo ile oikunwayambo ile omapanduloyambo.
40 Ndele Moses okwa lombwela ovana vaIsrael aishe naanaa ngaashi Omwene e mu lombwela.
© Oshikwanyama Bible Revised © Bible Society of Namibia, 2008, 2012.
