NUMERI 22 - Oshikwanyama Bible (OKYB)

Balak naBileam

1 Ndelenee ovana vaIsrael va dja po opo, ndele va ka onga onhanda pomaluhaela aMoab, koushilo waJordan, va shaama naJeriko.

2 Balak yaSippor, eshi a mona ashishe eshi Ovaisraeli va ningila Ovaamori, 3 Ovamoab ova tila unene ovanhu ava, osheshi va ninga vahapu. NOvamoab va kwatwa koumbada omolwovana vaIsrael. 4 Opo nee Moab okwa lombwela ovakulunhu vaMidian: “Paife eemhunga edi tadi ka lya ashishe eshi tashi di dingilile, ngaashi ongobe tai kunya omwiidi womoixwa.” Ndele Balak yaSippor okwa li ohamba yaMoab pefimbo olo. 5 Onghee hano ye okwa tuma ovatumwa kuBileam yaBeor muPetor sha kala puEufrat moshilongo shOmavite, oku mu ifana ndee ta ti: “Tala, ovanhu va dja muEgipiti. Tala ova pwipwikila oshilongo ashishe, ndele ve li meenhanda da yukilila nge. 6 Ila hano paife u lyangulile nge ovanhu ava, osheshi vo ove dule nge. Kashiimba handi dulu oku va denga noku va taataa mo moshilongo. Osheshi ondi shii ou ta nangekwa noupuna kwoove, ye ota nangekwa noupuna, ndee ou ta lyangulwa kwoove, ota kala a lyangulwa.”

7 Opo nee ovakulunhu vaMoab novakulunhu vaMidian ova ya ve nondjabi yomumonikokule, ndele ve uya kuBileam ndele ve mu hepaululila eendjovo daBalak. 8 Opo ye e va nyamukula ta ti: “Opo nee ame ohandi ke mu shiivifila ngaashi Omwene ta ka lombwela nge.” Opo nee ovakulunhu vaMoab va fyaala puBileam. 9 Ndele Kalunga e uya kuBileam ndee ta ti: “Ovalumenhu oolyelye ava ve li pwoove?” 10 Ndele Bileam okwa nyamukula: “Balak yaSippor, ohamba yaMoab, ya tumina nge ondaka: 11 Tala, ovanhu va dja kuEgipiti, ndele vo ova pwipwikila oshilongo. Ila hano paife u va lyangulile nge. Kashiimba ame ohandi dulu oku va denga noku va taataa mo.” 12 Opo nee Kalunga okwa lombwela Bileam: “Ino ya ko pamwe navo. Ino lyangula ovanhu venya, osheshi vo ovanangekwa noupuna.” 13 Opo nee Bileam okwa penduka ongula ndele ye ta ti kovakulunhu vaBalak: “Shuneni ko koshilongo sheni, osheshi Omwene okwa anyena nge okuya pamwe nanye.” 14 Ndele ovakulunhu vaMoab ova fikama ndele ve uya kuBalak, ndee tava ti: Bileam okwa anya okuya nafye. 15 Opo nee Balak okwa tuma ko vali ovakulunhu vahapu, ve dule venya, ndele va li va fimanekwa komesho yaavenya. 16 Ndele vo ove uya kuBileam, ndee tave mu lombwele: “Balak yaSippor osho ta ti: Ino anya okuya kwaame.” 17 Osheshi ame ohandi ke ku fimaneka unene, naashishe to lombwele nge, ame ohandi ke shi ninga. Onghee hano ila, lyangulile nge ovanhu ava. 18 Opo nee Bileam okwa nyamukula ndee ta ti kovapiya vaBalak: “Balak nande a pe nge oshisiliveli noshingoldo shi yadi eumbo laye, ame ihandi dulu okutauluka elombwelo lOmwene Kalunga kange nande moshinima shinini ile shinene. 19 Ndelenee kaleni ngeno natango oufiku wonena apa, opo ndi shiive eshi Omwene ta ka lombwela nge vali.” 20 Ndele Kalunga e uya kuBileam oufiku ndee ta ti kuye: “Ovalumenhu eshi ve uya oku ku ifana, fikama hano, inda navo. Ndelenee u nokuninga ashike eshi Ame handi ku lombwele.”

Ondongi yaBileam tai popi

21 Opo nee Bileam a meneka ongula nokwa tula ondongi yonghadi omutumba, ndele ye okwa ya pamwe novakulunhu vaMoab.

22 Ndelenee ehandu laKalunga la xwama, ye eshi a ya. Ndele omweengeli wOmwene okwa kala ofika mondjila oku mu kelela, eshi a londa ondongi yaye novapiya vaye vavali ve mu findikila. 23 Nondongi oya mona omweengeli wOmwene ta kala ofika mondjila e neongamukonda la pweywa mo meke laye. Onghee hano ondongi ya yapuka mondjila ndele ya ya mepya. Ndelenee Bileam okwa denga ondongi e i shunife mondjila. 24 Opo nee omweengeli wOmwene okwa ya ponhele yondjila ya finana pokati koikokola yomiviinyu pokati komakuma. 25 Ndele ondongi eshi ya mona omweengeli wOmwene, yo oye lifininika kekuma noya fenghenyena omhadi yaBileam kekuma. Onghee hano ye okwe i denga vali. 26 Ndele omweengeli wOmwene okwa ehena vali komesho, ndele a kala ofika ponhele ya finana, apa kapa li vali okuyapukila kolulyo ile kolumosho. 27 Ondongi eshi ya mona omweengeli, yo oya nangala fimbo Bileam e li kuyo. Onghee hano Bileam okwa handuka unene nokwa denga ondongi noshiti. 28 Ndelenee Omwene okwa makulifa okanya kondongi ndee tai ti kuBileam: “Ame nde ku ninga shike eshi wa denga nge lutatu nokuli?” 29 Opo nee Bileam okwa nyamukula ta ti kondongi: “Shaashi ove wa lundukila nge. Ngeno ndi kale ndi neongamukonda meke lange, ngeno onde ku dipaa.” 30 Ndele ondongi tai ti kuBileam: “Haame ondongi yoye, ho londo nge shito mokukala kwoye fiyo onena? Wa mona nge ndi neenghedi da tya ngaha kwoove?” Ndele ye okwa nyamukula: “Aaye.” 31 Opo nee Omwene okwa pashukifa omesho aBileam, opo a dule okumona omweengeli wOmwene e li ofika mondjila e neongamukonda la pweywa mo meke laye. Ndele ye okwe linyongamena nokwa wila eombe. 32 Nomweengeli wOmwene okwa pula kuye: “Omolwashike wa denga nokuli lutatu ondongi yoye? Tala, Ame mwene nda fikama nde uya oku ku kelela, osheshi ondjila ei yoye oi noiponga momesho ange. 33 Ndelenee ondongi ya mona nge ndele ya kanduka ko komesho yange lutatu. Oyo ngeno inai kanduka ko komesho yange, ngeno nde ku dipaa, ndelenee ondongi handi i efa i nomwenyo.” 34 Opo nee Bileam okwa nyamukula omweengeli ndee ta ti: “Ame nda nyona, osheshi inandi shiiva nokutya, ove ou li mondjila to kelele nge.” Ndelenee ondjila ei, ngeenge inai wapala momesho oye, ame ohandi shuna. 35 Nomweengeli wOmwene okwa lombwela Bileam: “Inda pamwe novalumenhu, ndelenee ondjovo ei aike, Ame handi ku lombwele, u noku i popya.” Opo nee hano Bileam okwa ya novakulunhu vaBalak. 36 Balak eshi a uda nokutya, Bileam te uya, ye okwa fikama e ke mu shakeneke muIr-Moab, osho shi li pongaba yaArnon, koxulo yoshilongo. 37 Ndele Balak ta ti kuBileam: “Inandi tumununa ko kwoove ovanhu, nde ku ifana? Omolwashike ino uya kwaame? Ame ohandi nyengwa mbela oku ku fimanekifa?” 38 Ndele Bileam okwa nyamukula Balak, ndee ta ti: “Heeno, ame nde uya kwoove paife. Ndelenee ame ndi nepangelo mbela okupopya sha? Ondjovo ei aike Kalunga te i tula mokanya kange ohandi ke i popya.” 39 Opo nee Bileam okwa ya pamwe naBalak, ndele ova fika kuKiriat-Husot. 40 Ndele Balak okwa yamba eengobe needi nokwa tumina Bileam novakulunhu ava va kala puye dimwe domudo.

41 Ndele ongula Balak okwa kufa Bileam nokwe mu twala koshikulundu shaBaal, oko ye a shiive okumona okambinga kamwe koshiwana.