Ohamba yaArad tai tewa
1 Ndelenee Omukaanan, ohamba yaArad, ei ya kala moshilongo shaumbuwanhu, eshi ya uda Israel te uya nondjila yokuAtarim, yo oye lidengifa Israel, ndele yo ya twala vamwe vomuvo eenghwate. 2 Opo nee Ovaisraeli, va udanekela Omwene ndee tava ti: “Ove ngeenge to yandje momake etu ovanhu ava aveshe, fye ohatu ka hanauna po oilando yavo.” 3 NOmwene okwa uda ondaka yOvaisraeli nokwa yandja Ovakaanan momake avo. Ndele vo noilando yavo ve i hanauna po, ndele va luka onhele oyo Horma.
Eyoka loshikushu
4 Opo nee ova dja po pomhunda yaHor ndele va enda nondjila yEfuta Litilyana, opo va dingilile oshilongo shaEdom. Ndelenee ovanhu va nyengwa okulidiinika mondjila. 5 Novanhu ova popya nokupa Kalunga naMoses oushima, ndee tava ti: “Omolwashike ove we tu kufa muEgipiti, fye tu file mombuwa? Osheshi muyo muhe nomungome nomuhe na nande omeva, neemwenyo detu tadi nyonyodola eendja edi dii.” 6 Opo nee Omwene okwa tuma mokati kovanhu omayoka oudiyo, aa a lumata ovanhu. Novanhu vahapu vomOvaisraeli ova fya. 7 Novanhu ove uya kuMoses ndee tava ti: “Fye otwa nyona eshi twa popya nokupa Kalunga naave oushima. Tu indilila kOmwene, Ye a kufe po pufye omayoka.” Ndele Moses okwa ilikanena ovanhu. 8 Opo nee Omwene okwa lombwela Moses, ndee ta ti: Liningila eyoka u li endjelelife koshiti. Opo nee keshe umwe ou a lika ndee te li tale, ota ka kala nomwenyo. 9 Opo nee Moses okwa ninga eyoka loshikushu, ndele e li tula koshiti. Ndele ou a lika keyoka ngeenge a tala eyoka loshikushu, okwa kala nomwenyo.
10 Novana vaIsrael va dja po, ndele va onga onhanda muObot.
Eenhanda dOvaisraeli mokweenda kwavo
11 Opo nee va dja po puObot, ndele va onga onhanda muIiye-Abarim mombuwa i li langhele lwokoushilo waMoab. 12 Va dja po opo ndele va onga onhanda mefilu laSered. 13 Va dja po opo ndele va onga onhanda kombada yomulonga Arnon, ou u li mombuwa ndele tau di moshilongo shOvaamori. Osheshi Arnon ongaba yaMoab pokati kaMoab nOvaamori. 14 Onghee tamu tiwa membo loita yOmwene:
“Vaheb muSufa, nomafilu aArnon,
15 Nomakuma aa omefilu,
a ya fiyo okonhele yaAr,
a shaamafana neengaba daMoab.”
16 Ndele ova dja po ndele va ya kuBeer. Oo omufima Omwene e u lombwela Moses ta ti: “Ovanhu nava ehene kumwe, ndele Ame ohandi va pe omeva.”
17 Opo Ovaisraeli va imba eimbilo eli:
“Fuluka omufima! Nau imbilwe eimbilo!
18 Omufima wa xupwa keehamba,
novakomesho vomoshiwana ve u pandifa
omapangelodibo avo, neenhaili davo!”
Ndele mokudja mombuwa vo ve uya kuMattana. 19 Nokudja kuMattana va ya kuNahaliel. Nokudja kuNahaliel va ya kuBamot. 20 Ndele okudja kuBamot va ya kefilu li li medu laMoab pomhunda yaPisga ya taalela omuulu.
Sihon, ohamba yOvaamori tai tewa
21 Ovaisraeli va tuma ovatumwa kuSihon, ohamba yOvaamori, ndee tava ti: 22 “Itavelele nge ndi taulule moshilongo shoye fye itatu ka endela nande momapya ile moikokola yomiviinyu. Fye itatu ka nwa omeva omomifima. Fye hatu ka diinina nokweenda melila linene lohamba fiyo twa taulula oshilongo shoye.” 23 Ndele Sihon ina itavelela Ovaisraeli okutaulula moshilongo shaye. Ndelenee Sihon ina itavelela Ovaisraeli okutaulula moshilongo shaye. Ndele Sihon okwa shiva omatanga aye aeshe ovakwaita nokwa ya kombuwa a ka lwife Ovaisraeli. Ndele ye eshi a fika kuJahas ye e lidenga nOvaisraeli. 24 Ndelenee Ovaisraeli ve mu taataa neongamukonda, noshilongo shaye sha nangalwa okudja kuArnon fiyo okuJabbok, fiyo okOvaammoni, osheshi ongaba yOvaamori ya li ya pamekwa neehote. 25 Osho ngaha hano Ovaisraeli va nangala oilando ei aishe, nOvaisraeli va kala moilando aishe yOvaamori muHesbon nomomikunda dasho adishe. 26 Osheshi Hesbon sha li oshilando shaSihon, ohamba yOvaamori. Ye okwa li e lidengifa ohamba yonale yOvamoab, nokwa kufa meke laye oshilongo shaye ashishe fiyo okuArnon. 27 Onghee hano ovatoti voitevo otava ti:
“Ileni kuHesbon!
Oshilando shaSihon nashi tungwe,
nashi pamekwe nohotekuma!
28 Osheshi omundilo wa dja muHesbon,
elaka lomundilo mohotengulu yaSihon.
Oo wa lungwinifa po Ar shOvamoab,
oonakukalamo moikulundudu yomuArnon.
29 Woo ove, Moab!
Onye mwa xula po, ovanhu vomuKemosh!
Ovana vasho ovamati she va yandja ovainhapo
novana vasho oukadona she va efa
va ninge eenghwate daSihon, ohamba yOvaamori.
30 Fye twe va umba fiyo okuDibon, Hesbon sha wa po,
ndele fye twa tokifa fiyo okuNofag nomundilo fiyo okuMedeba.”
31 Osho ngaha hano Ovaisraeli va nangala oshilongo shOvaamori.
Og ohamba yaBasan tai tewa
32 Ndele Moses okwa tuma ko eendadi va ka lave Jaeser, ndele ove va ta ndele va nangala omikunda dasho; ndele ye okwa taataa mo meenhele davo Ovaamori venya va kala ko. 33 Opo nee Ovaisraeli va aluka ko ndele va ya nondjila yokuBasan. Ndele Og, ohamba yaBasan, oyo pamwe nomatanga ayo aeshe ovakwaita ova ya oku va shakeneka kuEdrei ve ke va lwife. 34 Opo nee Omwene okwa lombwela Moses ndee ta ti: “Ino mu tila, osheshi ame nde mu yandja meke loye pamwe novanhu vaye aveshe noshilongo shaye ashishe. Ndele u noku mu ninga ngaashi wa ningile Sihon, ohamba yOvaamori, ei ya kala muHesbon.” 35 Ndele vo ove mu ta, ye mwene novana vaye ovamati novanhu vaye aveshe fiyo inapa xupa nande umwe. Ndele va nangala oshilongo shaye.
© Oshikwanyama Bible Revised © Bible Society of Namibia, 2008, 2012.
