Nehemia ta pupaleke omutengi woikolo yeehepele
1 Ndele ovafyoona novakainhu vavo va popyaana pombada ovakwao Ovajuda; 2 ndele vamwe tava ti: “Fye tu nokuyandja ovana vetu ovamati noukadona ombabyona opo tu mone oilya tu lye tu kale nomwenyo!” 3 Ndele vakwao tava ti: “Fye twa li tu nokuyandja omapya noikokola yetu yomiviinyu neengulu detu ombabyona, tu dule okulanda oilya mondjala!” 4 Ndele vamwe vali tava ti: “Fye otwa yandja omapya etu noikokola yetu yomiviinyu eengele tu mone oimaliwa yefendelo lohamba. 5 Ndele paife; omalutu etu e li ngaashi omalutu ovakwetu novana vetu ve li ngaho ngaashi ovana vavo, ndele nande ongaha, fye tu nokuyandja ovana vetu ovamati noukadona va ninge ovapika ndele novana vetu oukadona va ninga nokuli ovapika, ndele hatu nyengwa okuninga sha moshinima osho. Nomapya etu noikokola yetu yomiviinyu ya ninga yovanhu vamwe.” 6 Ndele eshi nda uda omakemo avo neendjovo odo, ame nda handuka unene. 7 Ndele nda diladila momwenyo wange ndele nda twifa ovanamadina novakomesho eemhata ndele handi ti kuvo: “Mokuyandja eengele nye otamu nyeka mokutambula oishoshela keshe umwe kumukwao.” Naame onde va shivila oshiongalele shinene, 8 ndele handi ti kuvo: “Paenghono detu twa kulila Ovajuda vakwetu, ovo va landwa po kovapaani. Ndele nye otamu landifa po ovamwaxo, vo ove nokulilandifa po kufye?” Ndele vo ova mwena, va nyengwa okunyamukula sha. 9 Ndele nde va lombwela vali: “Osho mwe shi ninga, inashi wapala. Ndishi mu nokweenda metilo laKalunga ketu nokuli omolwesheko lovapaani, ovatondadi vetu? 10 Ame mwene yo noovakwetu novapiya vange, otwa yandja kuvo oimaliwa noilya eengele. Tu dimeni po oikolo oyo! 11 Hano nena nokuli va alulileni omapya avo, oikokola yavo yomiviinyu, omiti davo deemono neengulu davo noshitukulwa oshitifele shomoimaliwa yavo noshomoilya yavo noshomomaviinyu noshomomaadi, oyo mwe i va pa eengele.” 12 Opo nee vo tava ti: “Fye ohatu ke shi va alulila ndele itatu fininike sha kuvo. Fye ohatu ka ninga ngaashi ove we tu lombwela.” Ndele nda ifana ovapristeli ndele nde va anifa va ninge pandjovo oyo. 13 Ndele nda tukumuna yo oshikutu shange ndele handi ti: “Kalunga na tukumune omulumenhu keshe ou ita wanifa ondjovo tuu ei, meumbo laye nomwaashi e shi kwete. Ndele na tukumunwe ngaha a kale ehe na sha!” Opo nee oshiongalele ashishe tashi ti: “Amen!” Ndele va hambelela Omwene, novanhu va ninga pandjovo ei.
14 Okudja kefiku linya nda tulwa po ndi ninge omupangeli wavo moshilongo shaJuda, okomudo omutimilongo mbali fiyo okomudo omutimilongo nhatu nomutivali wohamba Artasasta, oule womido omulongo nambali, ame novamwatate inatu lya oikulya yovapangeli. 15 Osheshi ovapangeli ovo va tetekela nge, ova djuupaleka unene oshiwana ndele va kufa kusho oikulya nomaviinyu avo nosho yo eesekeli omilongo nhee doshisiliveli. Ovapiya vavo yo ova hepeka oshiwana, ndelenee ame inandi shi ninga omolwetilo lokutila Kalunga. 16 Ndele ame mwene yo nda li moshilonga shokutunga ohote nomutima aushe. Inatu lilandela epya. Novapiya vange aveshe va ongala poilonga. 17 NOvajuda ovakomesho ovalumenhu efele nomilongo nhano naavenya va dja kovapaani vomoushiinda ve uya kwaame, ova li koshililo shange.
18 Ndele osho sha longekidwa efiku keshe: Ongobe imwe, eedi hamano da ondolwa needila, oda longekidwa pakufuta kwange, ndele efiku etimulongo keshe omaviinyu e lili nae lili mahapu unene. Ndele inandi pula eendja tadi pewa ovapangeli, shaashi oshilonga sha djuupaleka unene ovanhu ava. 19 Kalunga kange, dimbulukwa ashishe osho nda ningila ovanhu ava, shi etele nge ouwa.
© Oshikwanyama Bible Revised © Bible Society of Namibia, 2008, 2012.
