Omadina ovatungi veehotekuma daJerusalem noivelo yasho
1 Nomupristeli omukulunhu Eljasib okwa fikama pamwe noovakwao, ovapristeli, ndele vo ova tunga Oshivelo sheedi. Vo ove shi yapula, ndele va pangelela po omivelo. Navali fiyo okoshungo Hammea, osho ve shi yapula fiyo okoshungo Hananel. 2 Ndele popepi naye ovalumenhu vaJeriko va tunga. Ndele komesho yavo Sakkur yaImri okwa tunga.
3 Ndele ovana vaSenaa va tunga Oshivelo sheeshi. Ve shi pangela neenhikifo ndele va pangela omivelo dasho noiti ya shindjakana noiidilifo yasho. 4 Ndele polwamba lavo Meremot yaUria yaHakkos okwa tungulula. Ndele polwamba lavo Mesullam naBerekia yaMesesabel okwa tungulula. Ndele polwamba lavo Sadok yaBaana okwa tungulula. 5 Ndele polwamba lavo Ovatekoa va tungulula; ndelenee ovanenenhu vomuvo inava nyongameka eefingo davo mokulongela Omwene.
6 Jehoiada yaPaseah naMesullam yaBesodeja ova tungulula Oshivelo shikulu. Ve shi pangela neenhikifo ndele va pangela omivelo dasho noiti ya shindjakana noiidilifo yasho. 7 Ndele polwamba lavo Melatja, Omugibeon, naJadon, Omumeroni, ovalumenhu vaGibeon novaMispa va tungulula fiyo okolukalwapangelo lomupangeli woshilongo shOkouninginino waEufrat. 8 Polwamba laye Usiel yaHarhaja womovahambwidi voingoldo a tungulula. Ndelenee polwamba laye Hanania, umwe womovapilauli vomuvavo, a tungulula. Ndele vo ova tungulula Jerusalem fiyo okohotekuma inene. 9 Ndele polwamba lavo Refaja yaHur, omukulunhu wombinga yoshitukulwa shaJerusalem, okwa tungulula. 10 Ndele polwamba lavo Jedaja yaHarumaf okwa tungulula, a shaama nongulu yaye. Ndele polwamba laye Hattus yaHasabneja okwa tungulula. 11 Malkia yaHarim naHassub yaPahat-Moab, va tungulula Ombinga onhivali nosho Oshungo yediko lokuteleka omingome. 12 Ndele polwamba laye Sallum yaHallohes, omukulunhu wombinga yoshitukulwa shaJerusalem, okwa tungulula pamwe novana vaye oukadona.
13 Hanun noonakukalamo vomuSanoa va tungulula Oshivelo shefilu. Ve shi pangela neenhikifo ndele va pangela omivelo dasho noiti ya shindjakana noiidilifo yasho, nosho yo ekuma eemeta eyovi limwe fiyo okOshivelo shoushosho. 14 Ndele Malkia yaRekab, omukulunhu woshitukulwa Bet-Hakerem okwa tungulula Oshivelo shoushosho. Ye okwe shi tungulula nokwa pangela omivelo dasho noiti ya shindjakana noiidilifo yasho. 15 Ndele Sallum yaKolhose, omukulunhu woshitukulwa Mispa, okwa tungulula Oshivelo shofifiya. Ye okwe shi tungulula nokwe shi tungila onduda nokwa pangela omivelo dasho noiti ya shindjakana noiidilifo yasho. Nosho yo ekuma tali di kEtale laShela lekungulukilo lomeva poshikunino shohamba, nofiyo okeendodo tadi di koshilando shaDavid. 16 Komesho yaye Nehemia yaAsbuk, omukulunhu wombinga yoshitukulwa Bet-Sur, okwa tungulula fiyo okonhele ya shaama neembila daDavid nofiyo oketale lafewa nofiyo okOngulu yovaladi. 17 Komesho yaye Ovalevi va tungulula: Rehum yaBani; polwamba laye Hasabja, omukulunhu wombinga yoshitukulwa Keila, okwa tungulula onhele yoshitukulwa shaye. 18 Komesho yaye oovakwao, Bavai yaHenadad, omukulunhu wombinga yoshitukulwa oshitivali Keila, okwa tungulula. 19 Ndele komesho yaye Eser yaJosua, omukulunhu waMispa, okwa tungulula onhele onhivali ya shaama nonhele oyo omo tamu londwa kongulu yoiti nokutya, okolonela yomekuma. 20 Komesho yaye Baruk yaSabbai okwa tungulula noudiinini unene onhele onhivali: okudja kokolonela yomekuma fiyo okoshivelo shongulu yomupristeli omukulunhu Eljasib. 21 Komesho yaye Meremot yaUria yaHakkos okwa tungulula onhele onhivali okudja koshivelo shongulu yomupristeli omukulunhu Eljasib fiyo opexulilo longulu yaEljasib.
22 Ndele komesho yaye ovapristeli, ovalumenhu va dja koluhaela laJordan, va tungulula. 23 Komesho yaye Benjamin naHassub va tungulula onhele ya shaama nongulu avo. Komesho yaye Asaria yaMaasea yaAnanja a tungulula pongulu yaye. 24 Komesho yaye Binnui yaHenadad, okwa tungulula onhele onhivali okudja kongulu yaAsaria fiyo okokolonela yomekuma nofiyo opokolonela. 25 Palal yaUsai monhele ya shaama nokolonela yomekuma noshungo yopombada yokongulu yohamba, pehale lokomesho yodolongo. Komesho yaye Pedaja yaParos. 26 Novayakuli votembeli va li va kala koshikulundu Ofel fiyo okonhele ya shaama nOshivelo shomeva, kombinga yokoushilo noposhungongulu tai tumbu. 27 Komesho yavo Ovatekoa va tungulula onhele onhivali, okudja konhele ya shaama noshungo inene ya tumba fiyo okEkuma laOfel.
28 Kombada yOshivelo sheenghambe ovapristeli va tungulula, keshe umwe pongulu yaye. 29 Komesho yavo Sadok yaImmer a tungulula pongulu yaye. Ndele komesho yaye Shemaia yaSekanja, omunangeli wOshivelo shokOushilo okwa tungulula. 30 Komesho yaye Hanania yaSelemja naHanun, omona omutihamano omumati waSalaf, va tungulula onhele onhivali. Komesho yavo Mesullam yaBerekia okwa tungulula pokandjuwo kaye. 31 Komesho yaye Malkia, umwe womovahambwidi voingoldo, okwa tungulula fiyo okongulu yovayakuli votembeli nokovalandifi, konhele ya shaama nOshivelo shenangelo nofiyo okondjuwo yokombada yokolonela. 32 Ndele pokati kondjuwo yokombada yokolonela nOshivelo sheedi ovahambwidi voingoldo novalandifi va tungulula.
© Oshikwanyama Bible Revised © Bible Society of Namibia, 2008, 2012.
