MARKUS 9 - Oshikwanyama Bible (OKYB)

Jesus ta vemifwa

1 Ndele Ye okwa tya kuvo: “Oshili handi mu lombwele: oku na vamwe vomwaava ve li ofika apa itava makele efyo, fimbo inava mona ouhamba waKalunga tau uya neenghono dao.”

2 Omafiku ahamano eshi a pita po, Jesus okwa kufa Petrus naJakob naJohannes, ndele okwe va twala komhunda ile, ve ke likalele mouwike. Ndele Ye okwa shituka moipafi yavo. 3 Ndele oikutu yaye ya ninga itoka tootoo ya vilima, nokape na omuyelifi kombada yedu ta shiiva okutokifa ngaha. 4 Ndele ova holokelwa kuElia naMoses, ndele vo ova popya naJesus. 5 Ndele Petrus okwa hovela okupopya ndele ta ti kuJesus: “Rabbi, poima apa ope tu wapalela, tu dikeni po hano omatwali atatu, limwe oloye, limwe olaMoses nalimwe olaElia.” 6 Ndele kakwa li e shii eshi ta ti, osheshi ova haluka. 7 Ndele ope uya oshilemo she va tuvikila, nomoshilemo omwa dja ondaka ya tya: “Ou Omona wange omuholike, mu udeni.” 8 Ndele opo tuu opo, eshi va tala, va kevauka, inava mona nande umwe, oJesus aeke e li navo.

9 Ndele eshi tava londoloka komhunda, okwe va kumaida vaha hepaululile nande omunhu eshi ve shi mona ko, fimbo Omona wOmunhu ina nyumuka koufi. 10 Eendjovo odo ove di kwata nawa, ndele ova kala tava pulafana: Okunyumuka koufi mbela otaku ti ngahelipi? 11 Ndele ove mu pula tava ti: “Omolwashike ovanongo vomishangwa hava ti kutya, Elia oku nokuuya tete?” 12 Ye okwe va lombwela: “Heeno, Elia ote uya tete, ndele ta tula aishe peenhele dayo. Ndele ongahelipi hano Omona wOmunhu a tongwa momishangwa kutya, Oye e nokuhepekwa nokudinwa? 13 Ndele ohandi mu lombwele: Elia okwe uya nee, ndele ve mu ninga osho ve shi hala, ongaashi a tongwa momishangwa.”

Okuveluka kwomunashinona

(Mat. 17:14-21Luk. 9:37-43a)

14 Ndele vo eshi ve uya kovalongwa, ove va hanga ve li mokati kovanhu vahapu, ovanongo vomishangwa tava tu eemhata navo. 15 Ovanhu aveshe, eshi tuu ve mu mona, ova haluka, ndele ove uya kuye nokweendelela, ndele tave mu kundu. 16 Ye okwe va pula: “Eemhata tamu tu navo, odashike?” 17 Ndele umwe womongudu okwe mu nyamukula: “Omuhongi, onda eta kwoove omumwange omumati e nomhepo ye mu fitika ondaka. 18 Nakeshe opo tai mu kwatele, otai mu nate po, ndele ta tutumike onhutu mokanya, ndele te likeshe, ndele ta lenduka. Hano onda lombwela ovalongwa voye ve i te mo, ndele ova nyengwa.” 19 Ndele Ye okwe va nyamukula a tya: “Woo, oove epupi lihe na eitavelo fiyo onaini ndi nokukala punye? Fiyo onaini ndi noku mu lididimikila? Mu eteni kwaame.” 20 Ndele ove mu eta kuye; ndele eshi a mona Jesus, omhepo oye mu kama, ndele ye okwe lidenga poshi, okwa alangata, ndele okwa dja onhutu mokanya. 21 Ndele Jesus okwa pula xe: “Okwa ninga omafiku e fike peni, eshi eshi she mu hanga tete?” Ye okwa tya: “Okounona waye. 22 Luhapu ye mu undulila momundilo nomomeva, i mu nyone po. Ndele Ove, ngeenge to dulu sha, tu fila onghenda, Ove u tu kwafe.” 23 Jesus okwa tya kuye: “ ‘Ngeenge to dulu’, wa ti? Ou ta itavele, iha nyengwa kusha.” 24 Xe yokaana okwa ingida diva okwa tya nomahodi: “Onda itavela. Kwafa okuhaitavela kwange.”

25 Ndele Jesus, eshi a mona ongudu yovanhu tai uya nokweendelela, okwa hanyena omhepo ya nyata, ndele ta ti kuyo: “Omhepo ove iho popi naave iho udu, ohandi ku lombwele: Dja mo muye, ove ino uya vali muye.” 26 Ndele yo oya ingida, oye mu kama neenghono ndele oya dja mo. Ndele ye okwa li a fa a fya, vahapu ova tya: Okwa fya. 27 Ndele Jesus okwe mu kwata keke, ndele okwe mu yambula po. Ndele ye okwa fikama.

28 Ndele eshi a ya meumbo, ovalongwa vaye ove mu pula, eshi va li po ovo aveke: “Oshike hano fye twa nyengwa oku i ta mo?” 29 Ndele Ye okwa tya kuvo: “Oludi eli ihali tewa mo koshinima shi lili, okeilikano tuu alike nelidiliko.”

Okuhepekwa kwaJesus

(Mat. 17:22-23Luk. 9:43b-45)

30 Ndele vo ova dja ko oko, ndele tava pitile muGalilea, ndele Ye ina hala shi shiivike nande okomunhu. 31 Osheshi okwa longa ovalongwa vaye, ndele okwa tya kuvo: “Omona wOmunhu ota ka yandjwa momake ovanhu, ndele ovo tave mu dipaa, ndele eshi a dipawa, ndele tapa piti omafiku atatu, ota ka nyumuka koufi.” 32 Ndele ova li vehe udite ko eendjovo odo, ndele ova tila oku mu pula.

Omwene mouhamba weulu

(Mat. 18:1-9Luk. 9:46-50)

33 Ndele ove uya kuKapernaum; naashi a li meumbo, okwe va pula: “Omwa li tamu kundafana shike mondjila?” 34 Ndele vo ova mwena. Osheshi mondjila ova li tava kundafana: Omukulunhu, e dule vakwao aveshe, olyelye. 35 Ye okwa kala omutumba, ndele ta ifana po ovo omulongo navavali, ndele okwa tya kuvo: “Ngeenge ope na ou a hala okuninga wotete, oye na ninge wahauxuuninwa nomuyakuli waaveshe.” 36 Oye okwa kufa okaana, ndele te ka kaleke ofika mokati kavo. Naashi e ka papatela momake aye, okwa tya kuvo: 37 “Ou ta tambula okaana kamwe ngaashi aka medina lange, haame ta tambula, ndelenee Oye ou a tuma nge.”

38 Johannes okwe mu lombwela: “Omuhongi, otwa hanga ko umwe ou, ihe tu shikula, a ta mo eendemoni medina loye, ndele fye otwe mu kelela, shaashi ihe tu shikula.” 39 Ndele Jesus okwa tya: “Inamu mu kelela, osheshi kaku na ou ta longo oshilonganghono medina lange, ndele ta popile nge mowii diva. 40 Osheshi ou ehe na ondubo nafye, ye okwa ama kufye. 41 Osheshi ou ote mu nwefa omeva eholo limwe, omolwaashi nye ovaKristus, oshili handi mu lombwele: oye ita kala ina pewa ondjabi yaye.

Omahongaulo

(Mat. 18:6-9Luk. 17:1-2)

42 “Naau ta hongaula umwe waava vanini va itavela nge, oshiwa kuye, a mangelwe emanya loshini mofingo yaye, ye a ekelwe mefuta. 43 Neke loye ngeenge tali ku hongaula, li teta ko. Okuya momwenyo oshingudu okwe ku wapalela, ku dule okukala nomake avali nokuya moheli, momundilo ihau dimi mo, 44 omo einyo lavo ihali fi nomundilo wamo ihau dimi. 45 Nomhadi yoye ngeenge tai ku hongaula, i teta ko. Okuya momwenyo u na omhadi imwe okwe ku wapalela, ku dule okukala neemhadi mbali ndele to ekelwa moheli, 46 omo einyo lamo ihali fi nomundilo wamo ihau dimi. 47 Neisho loye ngeenge tali ku hongaula, li kolola mo. Okuya mouhamba waKalunga u na eisho limwe okwe ku wapalela, ku dule okukala nomesho avali, ndele to ekelwa moheli, 48 omo einyo lamo ihali fi nomundilo wamo ihau dimi.

49 “Osheshi keshe omunhu oku na okufingwa nomundilo, neyambo keshe oli na okufingwa nomongwa. 50 Omongwa oo omuwa, ndele omongwa ngeenge tau tutuka, otaku fingifwa shike? Kaleni mu nomongwa munye vene, nye mu kale mu nombili mokati keni.”