Jesus ta tangunine ovanaihelele
(Mat. 15:1-20)1 Opo nee puye opa ongala Ovafarisai novanongo vomishangwa vamwe, va dile kuJerusalem. 2 Ndele eshi va mona ovalongwa vaye vamwe va lya omungome nomake inaa yela, okutya, inaa koshwa, ove va tala va nyona.
3 Osheshi Ovafarisai nOvajuda aveshe ihava li fimbo inava kosha shili omake avo nokudiinina eenghulunghedi dovakulunhu vonale. 4 Ndele ngeenge va dja koshilandelo, ihava li manga inave likosha; neenghedi dimwe dihapu hava diinine okuwanifa, ongaashi okukosha omaholo noitoo noiyaxa yongopolo.
5 Ovafarisai novanongo vomishangwa ove mu pula: “Oshike ovalongwa voye ihava diinine eenghulunghedi dovakulunhu, ndele hava li nomake inaa koshoka?” 6 Ndele okwa tya kuvo: “Jesaja okwe mu xunganekela da twa, nye ovanaihelele, ngaashi kwa shangwa: ‘Oshiwana eshi ohashi fimaneke nge nomilungu,
ndele omitima dasho odi li kokule naame.
7 Ndelenee ohava fimaneke nge hamungaho
nokulonga omalongo oipango yovanhu.’
8 Otamu ekeleshi oshipango shaKalunga, nye tamu diinine eenghulunghedi dovanhu ngaashi hamu diinine omakosho eenheka nomaholo, nohamu longo vali shi lili sha fa eshi.”
9 Ndele Ye okwa tya kuvo: “Eewa, ohamu ekeleshi oshipango shaKalunga, mu diinine eenghulunghedi deni. 10 Shaashi Moses okwa tile: ‘Fimaneka xo nanyoko,’ na: ‘Ou ta tuku xe ile ina, oye na fye okufya.’ 11 Ndele nye ohamu ti: Omunhu ngeenge ta ti kuxe ile kuina: ‘Osho wa li u noku shi pewa kwaame ekwafo, osho Korban’, nokutya, oshali kotembeli. 12 Opo nee itamu efa vali a kwafe xe ile ina. 13 Osho ngaha hamu dimi po eendjovo daKalunga konghulunghedi yeni mwe i dika. Naikwao ihapu ngaashi ei hamu i ningi.”
14 Ndele Ye okwa ifana vali ovanhu ve uye kuye, ndele okwe va lombwela: “Udeni nge amushe, nye mu didilike. 15 Kape na eshi shokombada tashi i momunhu, tashi mu nyateke, eshi tashi di momunhu, osho tashi mu nyateke. 16 Ngeenge oku na ou e nomatwi okuuda, ye na ude ko.”
17 Ndele eshi a tukuka novanhu ndele a ya meumbo lonhumba, ovalongwa vaye ove mu pula efaneko olo nhumbi tali ti. 18 Ndele Ye okwa tya kuvo: “Hamba, nanye yo kamu na eendunge? Kamu udite ko mboli? Keshe osho shokombada hashi i momunhu, ihashi mu nyateke. 19 Osheshi osho itashi i momutima waye, ndelenee omedimo, ndele tashi piti mo panghedi youshitwe.” Osho ngaha a tonga kutya, oikulya aishe oya koshoka. 20 Ndele Ye okwa tya: “Osho hashi di momunhu, osho tashi mu nyateke. 21 Osheshi meni, momitima dovanhu, ohamu di omadiladilo mai, ohole yoipala, oulunga, edipao, 22 enyono lohombo, olwisho, onyanya, ekotokelo, oihole, efupa, eshekokalunga, elinenepeko, oupwidi. 23 Owii aushe ou tau di meni lomunhu, ndele tau nyateke omunhu.”
Jesus ta velula omona wOmukaanan
(Mat. 15:21-28)24 Ndele Ye okwa dja ko oko, okwa ya komikunda daTirus naSidon. Ndele Ye okwa ya meumbo lonhumba, ndele ina hala shi shiivike kovanhu. Ndele okwa nyengwa okuhondama. 25 Osheshi diva omukainhu umwe, e nokanona okakadona ke kwetiwe komhepo ya nyata, eshi e mu uda kutya, okwe uya po, okwa wila poshi keemhadi daye. 26 Ndele omukainhu ou a li Omugreka, a dalelwa moshikandjo shaFoinikia shomuSiria, okwe mu indila a te mo ondemoni momona okakadona. 27 Jesus okwa tya kuye: “Efa ounona va kute tete, osheshi inashi wapala okukufa omungome wounona noku u ekela keembwena.” 28 Ndele ye okwe mu lombwela a tya: “Heeno, Omwene, eembwena ohadi li koshi yoshitaafula shoshililo oundjaumukile vounona.” 29 Ndele Ye okwa tya komukainhu: “Omolwondjovo ei, inda, ondemoni oya dja mo momumwoye okakadona.” 30 Ye okwa ya keumbo nokwa hanga okaana ka nangala komutala, ondemoni oya dja mo muko.
Omufitamatwi ta velulwa
(Mat. 15:29-31)31 Ndele Ye okwa dja ko vali komikunda daTirus nokupitila muSidon, ndele okwa ya kefuta laGalilea, ta ende mokati kaDekapolis. 32 Ndele ova eta kuye omufitamatwi ehe shii okupopya nawa, nove mu indila a tenheke eke laye kuye. 33 Ndele Ye okwe mu kufa movanhu, a twa ominwe daye momatwi aye, a fiya omate, ndele ta kumu elaka laye. 34 Ndele okwa tala keulu, ta fuda mokule ndele ta ti: “Efata!” nokutya: “Fituluka!” 35 Omatwi aye a fituluka nelaka laye la manguluka ndele ta popi nawa. 36 Ye okwe va kelela vehe shi lombwele nande omunhu, ndele nande okwe shi va kelela shili nokukumaida, ove shi hepaulula. 37 Ovanhu ova haluka unene va tya: “Aishe okwe i ninga nawa, ovafitamatwi ohe va udifa ko novafitandaka ohe va ningi va popye.”
© Oshikwanyama Bible Revised © Bible Society of Namibia, 2008, 2012.
