MARKUS 3 - Oshikwanyama Bible (OKYB)

Jesus ta velula eke lomulumenhu novanaudu vamwe

1 Ye okwa ya vali moshinagoga, ndele mo omwa li omulumenhu e neke la kukuta. 2 Ndele vo ove mu nangela va tale ngeenge te mu velula efiku lEshabata, opo va dule oku mu hokololifa. 3 Ye okwa lombwela omulumenhu ou e neke la kukuta: “Fikama, u ehene oku.” 4 Ndele okwa tya kuvenya: “Osho inashi kelelwa efiku lEshabata oshilipipo: okulonga ouwa ile okulonga owii? Okuxupifa omwenyo ile oku u dipaa?” Ndele vo ova mwena. 5 Opo nee Ye okwa keuka e va tala nehandu, okwa nyika oluhodi omolwoukukutu womitima davo, ndele okwa tya komulumenhu ou: “Nana eke loye.” Ye okwe li nana, ndele eke laye ola veluka. 6 Ovafarisai ova dja mo, ndele ove mu kundafana diva nOvakwaherodes nokutya, ve mu dipae.

7 Ndele Jesus okwa ya vali novalongwa vaye komunghulo wefuta novanhu vahapu vomuGalilea novomuJudea ove mu shikula. 8 Nosho yo muJerusalem nomuIdumea nolanghele kwinya yaJordan nomoshikandjo shaTirus naSidon omwa dja ovanhu vahapu ve uya kuye, eshi va uda osho ashishe a ninga. 9 Ye okwa lombwela ovalongwa vaye ve mu diininine okawato popepi omolwongudu yovanhu, ihe mu fininike. 10 Osheshi Ye okwa velula vahapu, onghee aveshe ovo ve nouyehame, ove lifininika va ehene kuye ve mu kume. 11 Neemhepo da nyata eshi de mu mona, oda wila poshi koshipala shaye, ndele tadi ingida tadi ti: “Oove Omona waKalunga.” 12 Ye okwe di hanyena neenghono, dihe mu holole.

Jesus ta ifana ovayapostoli omulongo navavali

(Mat. 10:1-4Luk. 6:12-16)

13 Ye okwa londa komhunda, ndele okwa ifana kuye ava Ye mwene a hala, ndele vo ove uya kuye. 14 Ye okwa tula po ava omulongo navavali, ovo e va luka ovayapostoli, va kale puye, Ye e va tume, va ka udife, 15 ndele va kale ve nepangelo lokuta mo eendemoni.

16 Ndelenee ava omulongo navavali e va tula po, ovava: Simon, ou e mu luka Petrus, 17 naJakob yaSebedeus naJohannes, ondenge yaJakob, ovo e va luka Boanerges, tali ti: Ovana vengungumo lodula, 18 naAndreas naFilippus naBartolomeus naMateus naTomas naJakob yaAlfeus naTadeus naSimon omuladi, 19 naJudas Iskariot, oye tuu ou e mu kengelela.

Okushekwa kwOmhepo Iyapuki

(Mat. 12:24-32Luk. 11:15-23Luk. 12:10)

20 Ye okwe uya keumbo. Ndele opa li pa ongala vali ovanhu vahapu unene, onghee inava dula okulya omungome. 21 Ndele vakwao eshi ve mu uda, ova ya ko ve ke mu kwate, osheshi okwa tiwa: “Ota i eenghwengu.” 22 Novanongo vomishangwa ovo va dja kuJerusalem ova tya: “Ye oku kwetiwe kuBelsebul, neendemoni ote di te mo neenghono domukulunhu weendemoni.” 23 Ye okwe va ifana kuye ndele okwe va lombwela momafaneko ta ti: “Satana ota dulu ngahelipi okuta mo Satana mukwao?” 24 Ndele ngeenge ku noshilongo tashi litwile ondubo, oshilongo osho itashi kala po vali. 25 Neumbo ngeenge tali litwile ondubo, eumbo olo itali kala po vali. 26 NaSatana ngeenge te lihangakene, ndele te litwile ondubo, oye ke na vali eenghono okukala po, ota xulu po. 27 “Ndele kape na ou ta dulu okuya meumbo lomunaenghono noku mu luwa oinima yaye, ngeenge ina manga tete omunaenghono ou, opo nee te mu lu eumbo laye.

28 “Oshili handi mu lombwele: ashishe otashi diminwa po ovana vovanhu: omatimba nomasheko, nande a kale mahapu unene. 29 Ndelenee ou ta sheke Omhepo Iyapuki, oye ke nekufilo lomatimba fiyo alushe, osheshi ye oku na oushima wetimba laalushe.” 30 Osheshi vo ova tya: Oye e kwetiwe komhepo ya nyata.

Ovamwaina vaJesus

(Mat. 12:46-50Luk. 8:19-21)

31 Ina novamwaina ove uya po, va li ofika pondje, ndele tava tumu kuye tave mu ifana. 32 Ndele ongudu yovanhu oya li omutumba ye mu ongalela, ndele oye mu lombwela tai ti: “Tala, nyoko novamwanyoko ove li pondje tave ku kongo.” 33 Ye okwe va nyamukula ndele ta ti: “Meme novamwameme oolyelye?” 34 Ndele okwa tala ava va li omutumba puye okwa tya: “Tala, meme novamwameme ovava. 35 Osheshi ou ta wanifa ehalo laKalunga, oye omumwatate nomumwameme nameme.”