Jesus ta velula oshingudu
(Mat. 9:1-8Luk. 5:17-26)1 Ndele eshi pa pita omafiku amwe, okwa ya vali kuKapernaum. Ndele eshi a udika nokutya, Ye oku li meumbo, 2 ovanhu vahapu ova ongalela ko diva, noposhivelo kapa li vali onhele. Oye okwe va udifila ondjovo. 3 Ndelenee ope uya ovanhu va eta kuye omunhu oshingudu a humbatwa kovalumenhu vane. 4 Ndele vo eshi va nyengwa kouhapu wovanhu oku mu eta kuye, ova ulula onduda omo a li, ndele ova kulukifa poshi olutala oko kwa nangala omunhu oshingudu.Ova ulula onduda omo a li, ndele va kulukifa poshi olutala. 5 Jesus eshi a mona eitavelo lavo, okwa tya koshingudu: “Omumwange, omatimba oye otaa dimwa po.” 6 Omwa li mu novanongo vomishangwa vamwe va kala omutumba, ndele ova diladila momitima davo: 7 “Ota popi ngahelipi ngaho? Ota sheke Kalunga. Olyelye ta dulu okudima po omatimba, ke fi umwe aeke, Kalunga?” 8 Jesus okwe shi koneka diva momhepo yaye kutya, vo ove lidiladilila ngaha, ndele okwa tya kuvo: “Oshike tamu diladilile eshi momitima deni? 9 Eshi shipu shi dule shikwao oshilipipo, okulombwela oshingudu: ‘Omatimba oye a dimwa po’, ile oku mu lombwela: ‘Fikama, kufa po olutala loye u ende?’ 10 Ndele opo mu kale mu shi shii, Omona wOmunhu oku na epangelo okudima po omatimba kombada yedu,” okwa tya koshingudu: 11 “Ohandi ku lombwele: Fikama, kufa po olutala loye ove u ye keumbo leni.”
12 Ye okwa fikama, a kufa po diva olutala laye, ndele okwa ya pondje moipafi yaaveshe, aveshe ova kumwa, va hambelela Kalunga ndele tava ti: “Oinima i fike apa inatu i mona nale.”
Mateus ta ifanwa
(Mat. 9:9-13Luk. 5:27-32)13 Ndele okwa shuna kefuta nongudu aishe yovanhu ye uya kuye, ndele te va longo. 14 Ndele mokukoyelela po Ye okwa mona po Levi yaAlfeus, e li omutumba pongulu yomafutilo opeengaba, ndele okwa tya kuye: “Shikule nge.” Ye okwa fikama ndele te mu shikula.
15 Ndele opa ningwa, eshi a li omutumba poshililo meumbo laye, ovafutifi novalunde vahapu ova lya yo pamwe naJesus novalongwa vaye, osheshi ovo ve mu shikula, ova li po vahapu. 16 Ndele ovanongo vomishangwa vomOvafarisai eshi ve mu mona ta li pamwe novafendelifi novalunde, ova tya kovalongwa vaye: “Oha li pamwe novafendelifi novalunde?” 17 Jesus eshi e di uda, okwa tya kuvo: “Ava ve li nawa, itava pumbwa omuveluli, ovanaudu ovo tuu aveke. Ame inandi uya okwiifana ovayuki, ndelenee ovalunde.”
Elidiliko loikulya
(Mat. 9:14-17Luk. 5:33-38)18 Ovalongwa vaJohannes novOvafarisai ova li po have lidilike oikulya. Vo ove uya ndele ova tya kuye: “Ovalongwa vaJohannes novOvafarisai ohave lidilike oikulya, oshike ovalongwa voye ihave lidilike?” 19 Jesus okwe va lombwela: “Ookaume komuhomboli ihava dulu ndishi okulidilika oikulya fimbo omuhomboli e li puvo. Fimbo ve na omuhomboli mokati kavo, itava shiiva okulidilika oikulya. 20 Ndele omafiku tae uya nomuhomboli te va kufwa, heeno, efiku olo otave ke lidilika oikulya.
21 “Kape na ou ta vandeke oshikutu shikulu noshivando shipe. Ngeenge te shi ningi, oshivando shipe otashi pombaula po oshikutu, ndele ombululu tai ningi inene i dule yonale. 22 Ndele kaku na ou ta dili omaviinyu mape momakutu makulu, ndelenee ngeenge, ongaha omaviinyu otaa pombaula omakutu, nomaviinyu otaa hepa ashike. Ndelenee omaviinyu mape naa ye momakutu mape.”
Epololo loilya mEshabata
(Mat. 12:1-8Luk. 6:1-5)23 Ndele opa ningwa, eshi a taulula momapya, efiku lEshabata, ovalongwa ova hovela okuteya omasha mokweenda kwavo. 24 Opo Ovafarisai ova tya kuye: “Tala, oshike tava ningi eshi sha kelelwa mefiku lEshabata?” 25 Ye okwa tya kuvo: “Nye inamu lesha mboli David eshi a ningile, eshi kwa li a hepa nokwa fya ondjala, ye mwene naavenya va li puye? 26 Nhumbi a ya mongulu yaKalunga pefimbo lomupristeli omukulunhu Abjatar, ndele ta li omingome detaliko inadi pitikwa okuliwa kwaava vehe fi ovapristeli nonhumbi e di pa ava va li puye?” 27 Ye okwa tya kuvo: “Eshabata ola shitilwa omunhu, hamunhu a shitilwa Eshabata. 28 Hano osho ngaha Omona wOmunhu Oye mwene wEshabata.”
© Oshikwanyama Bible Revised © Bible Society of Namibia, 2008, 2012.
