Jesus koshipala shaPilatus
(Mat. 27:14Luk. 23:2-3Joh. 18:29-38)1 Hano eshi tuu kwa ka sha, ovapristeli ovakulunhu novakulunhu novanongo vomishangwa, oshiongalele ashishe shovakulunhu osha tokola, ndele vo ova mangifa Jesus, ndele tave mu twala, ve ke mu yandje kuPilatus. 2 Ndele Pilatus okwe mu pula: “Oove ohamba yOvajuda?” Ye okwe mu nyamukula ta ti: “Heeno, ngaashi to ti.” 3 Ovapristeli ovakulunhu ove mu pa omatimba mahapu. 4 Opo Pilatus okwe mu pululula ndele ta ti: “Ito nyamukula sha. Tala, eshi tave ku pe omatimba mahapu.” 5 Ndele Jesus ina nyamukula vali sha, ndele eshi sha kumwifa Pilatus.
Jesus ta yandjwa
(Mat. 27:15-26Luk. 23:17-25Joh. 18:39—19:16)6 Ndelenee pomafiku oshivilo opa kala onghedi yoku va mangululila omukwatwa umwe, keshe ou va hala. 7 Ndelenee okwa li ku nomulumenhu umwe a mangwa, edina laye Barabas, a kwatelwa pamwe novakolokoshi vamwe, va li va dipaa omunhu moukolokoshi wavo. 8 Ndele eengudu dovanhu mokwiingida mokule oda hovela okwiindila Pilatus, ye e di ningile ngaashi ha ningi shito. 9 Pilatus okwe va nyamukula ta ti: “Omwa hala ndi mu mangululile ohamba yOvajuda?” 10 Osheshi okwa li e shi shii kutya, ovapristeli ovakulunhu ove mu ningila ondubo. 11 Ndele ovapristeli ovakulunhu ova shushumika ovanhu va indile kutya, ne va mangululile Barabas. 12 Opo Pilatus okwa popya vali ta ti kuvo: “Ondi na okuninga ngahelipi naau, tamu mu ti, Ye Ohamba yOvajuda?” 13 Vo ova ingida vali: “Mu valela komushiyakano.” 14 Pilatus okwa tya kuvo: “Owii owashike hano a ninga?” Ndele ova ingida pombada: “Mu valela komushiyakano.” 15 Ndele Pilatus eshi a hala okuwapalela ovanhu, okwe va mangululila Barabas, ndele okwa dengifa Jesus neeshokoto, ndele te mu yandje a valelwe komushiyakano.
16 Ovakwaita ove mu twala meni longulu oyo tai ifanwa pretorium, ndele ova ifana etanga lavo alishe lovakwaita. 17 Ndele ove mu djaleka oshikutu shitilyana, ova tunga oshishani shomakiya, ndele tave shi tula komutwe waye, 18 ndele ova hovela oku mu kunda: “Kundwa Oove, Ohamba yOvajuda.” 19 Ove mu denga nolumbungu komutwe, ndele ve mu fiila omate ndele tave mu kundu nokutwa eengolo. 20 Ndele vo eshi ve mu sheka, ove mu dula oshikutu shitilyana, ndele tave mu dike oikutu yaye mwene. Ndele vo tave mu twala, ve ke mu valele komushiyakano.
Jesus ta valelwa komushiyakano
(Mat. 27:32-56Luk. 23:26-49Joh. 19:17-30)21 Ndelenee vo ova fininika omulumenhu umwe, ta ende po ta di kepya, Simon Omukireni, xe yaAleksander naRufus, e mu humbatele omushiyakano waye. 22 Vo ove mu twala konhele, edina layo Golgata, tali ti: onhele yoshala sholukwe. 23 Ndele vo ove mu pa omaviinyu mwa tulwa oimbodi ilula, ndele Ye ine a nwa. 24 Opo nee ove mu valela komushiyakano, ndele vo va tukulilafana oikutu yaye noku i umbila oshihoololifo, kutya otai ningi yalye nalye. 25 Otundi ei ve mu valela komushiyakano oya li onhinhatu. 26 Ndele okwa tulwa eshangelo lokushiivifa etimba laye la tya: “Ohamba yOvajuda.” 27 Pamwe naye opa valelwa ovakolokoshi vavali, umwe kolulyo laye, nomukwao okolumosho laye. 28 Omushangwa ou owa twa: Ye okwa valulilwa movakolokoshi.
29 Ndele ava va pita po, ove mu sheka, tava pukapuka komitwe, tava ti: “Hamba ove, oove tuu ou to ngumauna po otembeli, ndele to i tungulula momafiku atatu, 30 likwafa mwene, Ove u dje ko komushiyakano.” 31 Nosho yo ovapristeli ovakulunhu novanongo vomishangwa ove mu sheka, nokulombwelafana tava ti: “Okwa li ha kwafa ovanhu, ndelenee Ye okwa nyengwa okulikwafa. 32 Kristus, Ohamba yaIsrael, na dje ko komushiyakano paife eshi, tu shi mone, fye tu itavele.” Naavo yo va valelwa komushiyakano pamwe naye, ove mu sheka. 33 Ndele otundi onhihamano omilaulu da tuvikila edu alishe fiyo otundi onhimugoi. 34 Otundi onhimugoi Jesus okwa ingida mokule: “Eeli, Eeli, lama sabaktani?” 35 Ndele vamwe ava va li po ofika eshi ve shi uda, ova tya: “Tala, Ye ota ifana Elia.” 36 Opo nee umwe okwa endelela ndele ta yaveke oshiyavo momeva malula, ndele te shi tu koshihati, ndele te mu nwefa ta ti: “Mweneni, tu tale, Elia ngeenge te uya oku mu kufa ko.” 37 Ndelenee Jesus okwa ingida mokule nokwa yandja omwenyo waye. 38 Opo tuu etukulifo lotembeli ola pombauka okudja pombada fiyo oposhi, 39 ndele omukulunhu omunefele wovakwaita, ou kwa li a kala ofika e mu taalela, eshi a mona nhumbi Ye ta fi ngaha, okwa tya: “Omunhu ou okwa li shili Omona waKalunga.”
40 Ndele okwa li yo ovakainhu va li ofika kokule tava tale. Mokati kavo omwa li Maria Magdalena naMaria, ina yaJakob munini naJoses naSalome, 41 ovo va li have mu shikula, nohave mu yakula, eshi a li muGalilea novakainhu vamwe vahapu, ovo ve uya pamwe naye kuJerusalem.
Jesus ta pakwa
(Mat. 27:27-61Luk. 23:50-55Joh. 19:38-42)42 Ndele onguloshi eshi ye uya, noshaashi kwa li efiku lelilongekido, okutya, efiku la tetekela Eshabata, 43 omukwashiongalele shovakulunhu a fimana, Josef wOkuarimatia, ou a li a teelela ouhamba waKalunga, okwe uya, e linyatipalifa komwenyo, ndele ta i kuPilatus, ndele ta indile ko oshimhu shaJesus. 44 Pilatus okwa kala a kumwa, ngeenge Ye okwa fya nale nokuli, ndele okwa ifana omukulunhu omunefele, ndele te mu pula, ngeenge Ye okwa fya nale. 45 Ndele eshi e shi uda komukulunhu omunefele, okwa yandja nee oshimhu kuJosef. 46 Ndele ye okwa landa oshiyata sholiina, ndele te mu kufa ko, ndele te mu tonyene moshiyata sholiina ndele te mu nangeke mombila ya hangika ya hokelwa memanya, ndele okwa alangatifila po emanya poshivelo shombila. 47 Ndele Maria Magdalena naMaria, ina yaJoses, ova tala opo Ye a nangekwa.
© Oshikwanyama Bible Revised © Bible Society of Namibia, 2008, 2012.
