MATEUS 3 - Oshikwanyama Bible (OKYB)

Johannes ta udifa ndele ta shashe

1 Momafiku enya Johannes Omushashi okwa holoka, ndele ta udifile mombuwa yaJudea 2 ndele ta ti: “Lidilululeni, osheshi ouhamba weulu we uya popepi.” 3 Osheshi Oye tuu ou a xunganekwa komuxunganeki Jesaja, eshi ta ti:

“Ondaka yomwiingidi tai udika mombuwa:

‘Longekidileni Omwene ondjila,

mu yelakanifileni omalila.’ ”

4 Ndele Johannes okwa li ha djala oshikutu sholududi longamelo, nekwamo loshipa moshiya shaye; eendja daye odo oshipaxu nomaadi eenyiki. 5 Opo nee Jerusalem naJudea ashishe nomikunda adishe daJordan va ya kuye, 6 ndele tava shashelwa kuye momulonga waJordan eshi va hepaulula omatimba avo.

7 Ndelenee eshi a mona Ovafarisai nOvasadukai vahapu ve uya keshasho laye, okwa tya kuvo: “Oludalo lomayoka nye, olyelye e mu longa okuya onhapo ehandu olo tali uya? 8 Imeni hano oiimati ya wapalela elidilululo, 9 nye inamu diladila, otamu dulu okulitongela munye vene mu tye: ‘Otu na tate yetu Abraham.’ Osheshi ame ohandi mu lombwele, Kalunga ota dulu okushitila Abraham ounona momamanya aa. 10 Ndelenee ekuva ola tulwa nokuli kefina lomiti; hano keshe tuu omuti ihau ima oiimati iwa, otau kewa po, ndele tau ekelwa momundilo. 11 Ame ohandi mu shashe nomeva mu lidilulule, ndelenee ou ta di konima yange, e dule nge eenghono, ame inandi wana nande oku mu humbatela eenghaku daye. Oye te mu shashe nOmhepo Iyapuki nomundilo. 12 Oye e noshiyelifo meke laye, ndele ta kombo oshipale shaye, noilya ote i tuvikile momaanda aye, ndelenee olungu ote li xwike po nomundilo ihau dimi po.”Oye e na oshiyelifo meke laye, ndele ta kombo oshipale shaye.

Jesus ta shashwa

(Mark. 1:9-11Luk. 3:21-22)

13 Jesus okwa dja muGalilea ndele ta i komulonga waJordan kuJohannes, a shashwe kuye. 14 Ndelenee Johannes okwe mu anya ndele ta ti: “Ame onda pumbwa okushashwa kwoove, ndelenee ove to uya kwaame!” 15 Ndelenee Jesus okwe mu nyamukula ndele ta ti kuye: “Itavela tuu nena, osheshi osho oshe tu wapalela okuwanifa ouyuki aushe.” Opo nee ye e mu itavela.

16 Ndele Jesus eshi a shashwa okwa dja momeva diva, ndele tala, eulu la yeuluka, ndele a mona Omhepo yaKalunga ya fonghuti ya kuluka ndele tai uya kombada yaye. 17 Ndele tala, ondaka ya dja meulu ndele tai ti: “Ou Omona wange omuholike, onde mu hokwa.”