Okuhandukilwa kwovapristeli
1 Ndele ovapristeli nye, omhango ei paife oyeni. 2 Nye eshi itamu udu ndele itamu tambula momitima deni mu fimanekife edina lange, Omwene womatanga ovakwaita ta ti, onghee ohandi ka tuma efingo mokati keni ndele handi lundulula omanangeko noupuna eni, ndele taa ningi efingo. Heeno, Ame onde a finga nokuli, shaashi nye inamu tambula sha momitima. 3 Taleni, Ame ohandi ka handukila omaludalo eni, ndele handi ka ekela oshandja koipala yeni, heeno, oshandja shoivilo yeni. Ndele onye vene yo tamu ka ekelwa konduba yoshandja. 4 Ndele nye otamu ka shiiva, nokutya Ame onde mu tumina omhango ei, opo ehangano lange naLevi li kale la pama, Omwene womatanga ovakwaita ta ti. 5 Ehangano lange naye ola li omwenyo nombili, nonde li mu pa a kale e netilo. Ndele ye okwa tila nge nokwa kakama molwedina lange. 6 Elongo la yuka la kala mokanya kaye. Noipupulu inai monika momilungu daye. Ye okwa enda pamwe naame nombili nonouyuki, ndele ovanhu vahapu ye e va alula mowii. 7 Osheshi omilungu domupristeli di nokutuvikila okushiiva nomokanya kaye tamu ka kongwa elongo, osheshi ye omutumwa wOmwene womatanga ovakwaita. 8 Ndelenee nye mwa kanduka mo mondjila, vahapu mwe va pundukifa molwelongo leni. Nye mwa teya po ehangano laLevi, Omwene womatanga ovakwaita ta ti. 9 Osho hano naame yo ohandi ke mu ninga ovadinwa novashundulwa poshiwana ashishe, osheshi nye itamu diinine eendjila dange ndele tamu kala mu nokatongotongo melongelo.
10 Fye katu na mbela Tate umwe aeke? Fye inatu shitwa mbela kuKalunga kamwe akeke? Omolwashike hano fye hatu kala nokulitongola ndele hatu teya po ehangano lootate? 11 Juda okwe liteeka nomuIsrael nomuJerusalem mwa ningwa oixuna. Osheshi Juda okwa shekifa otembeli yOmwene, ei Ye e hole, ndele ye okwa hombola oukadona voshikalunga shokoilongo. 12 Omulumenhu ou ta longo ngaha, Omwene ne mu hanaunine momatwali aJakob omupashukili nomupopili naau ta eta eyambo kOmwene womatanga ovakwaita.
13 Ndele natango ohava ningi ngaha: Nye otamu tuvike oaltari yOmwene nomahodi nokulila nokufudaana, osho ngaha Ye ita punguluka vali komayambo noita dulu vali oku a tambula nohokwe momake eni. 14 Ndele nye otamu pula: Omolwashike? Omolwaashi Omwene Ye ondobwedi pokati keni nomwalikadi womounyasha woye, ou we mu tekuka, nande ye omukainhu woye nomwalikadi womohombo. 15 Ndele kape na umwe e shi ninga, ou e na natango oshixupe shOmhepo. Olyelye ou umwe? Ye okwa konga oludalo la udanekwa kuKalunga. Pashukileni hano nawa omhepo yeni, paha kale nande umwe te liteeka omwalikadi womounyasha waye. 16 Osheshi Ame ohandi tondo eteyo lohombo, Omwene Kalunga kaIsrael ta ti, ndele handi tondo omunhu ta djala oukolokoshi ngaashi oshikutu, Omwene womatanga ovakwaita ta ti. Hano pashukileni nawa omhepo yeni ndele inamu kala neteke.
17 Nye otamu lolokifa Omwene neendjovo deni. Ndelenee tamu pula: Nashike hatu mu lolokifa? Shaashi ohamu ti: “Keshe ou ta ningi owii, ye omuwa momesho Omwene, ndele Ye okwe mu hokwa,” ile: “Kalunga ketokolo oku li peni?”
© Oshikwanyama Bible Revised © Bible Society of Namibia, 2008, 2012.
