Ovakainhu tava hepaululilwa kovaengeli enyumuko laJesus
1 Ndele efiku lotete loshivike ongula inene, ove uya kombila ve kwete oidimba iwa ve i longekida. 2 Ndele vo ova hanga emanya la kandulwa po pombila. 3 Ndele ova ya mo meni, ndelenee inava mona mo oshimhu shOmwene Jesus. 4 Ndele opa ningwa eshi va li po va limbililwa, tala, ovalumenhu vavali, va djala oikutu tai vilima ova kala ofika puvo. 5 Ndele vo ova haluka ndele va fidimika oipala yavo poshi.
Vo ova tya kuvo: “Oshike tamu kongo omunamwenyo mokati kovafi? 6 Ye ke mo omu, okwa nyumuka, dimbulukweni eendjovo e di mu lombwelele fimbo a li kuGalilea, 7 eshi a tile: ‘Omona wOmunhu e nokuyandjwa momake ovalunde nokuvalelwa komushiyakano, nefiku etitatu e nokunyumuka.’ ” 8 Ndele vo ova dimbulukwa eendjovo daye. 9 Ndele ova aluka ko kombila ndele aishe ei ove i hepaululila venya omulongo naumwe noovakwao aveshe. 10 Ndelenee ava ve shi hepaululila ovayapostoli ovo ava: Maria Magdalena naJohanna naMaria ina yaJakob novakainhu oovakwao pamwe navo. 11 Ndele eendjovo daava ove di tala da fa eengano, ndele inave di itavela. 12 Ndele Petrus okwa fikama ndele ta lotokele kombila, ndele eshi a vandamena mo okwa mona mo oikutu yoliina, ndele okwa shuna keumbo a kuminwa eshi sha ningwa po.
Jesus ta holokele ovalongwa vavali tava i kuEmaus
13 Ndele tala, efiku olo vavali vomuvo va enda tava i komukunda edina lao Emaus, ku neekilometa omulongo naimwe okudja kuJerusalem. 14 Ova kundafana aishe ei ya ningwa ko. 15 Opa ningwa fimbo tava kundafana ndele tava konakona, Jesus mwene okwa ehena kuvo, ndele okwa enda pamwe navo. 16 Ndele omesho avo okwa tuvikwa, vehe mu koneke.
17 Ndele Ye okwa tya kuvo: “Otamu kundafana shike mokweenda kweni?” Vo ova kanghama ve noipala ya nyika oluhodi. 18 Ndele umwe wavo, edina laye Kleopas, e mu nyamukula ta ti: “Oove auke omunailongo wa menekela muJerusalem, ino uda ei ya ningilwa mo pomafiku aa?” 19 Ndele Ye okwa tya kuvo: “Oshike?” Vo ova tya kuye: “Osheshi sha ningwa Jesus Omunasareti, a li omuxunganeki omunaenghono nomoilonga nomeendjovo koshipala shaKalunga noshovanhu aveshe, 20 ndele ovapristeli ovakulunhu novapangeli vetu ve mu yandja a tokolwe a ka fye, ndele ve mu valela komushiyakano. 21 Ndele fye twa li twe mu lineekela nokuteelela Oye ou e nokukulila Ovaisraeli, nokuli nena efiku etitatu ei eshi ya ningwa. 22 Ndelenee ovakainhu vamwe vomufye ove tu limbilika. Ova ile ongula inene kombila 23 ndele vo inava mona mo oshimhu shaye, ndele ove uya va tya ova mona emoniko, ovaengeli ve va lombwela oku na omwenyo. 24 Ndele vamwe vomufye va ya yo kombila, ndele ova hanga pe li ngaashi ovakainhu va hepaulula, ndele Ye mwene inave mu mona.”
25 Ndele Ye okwa tya kuvo: “Woo nye, omalai novafi vounye keemwenyo okwiitavela aishe ei ovaxunganeki ve i popya. 26 Hayo tuu ei Kristus kwa li e noku i humbata nokuya moshinge shaye?” 27 Ndele Ye okwa hovela muMoses nomovaxunganeki aveshe, ndele okwe va fatululila adishe de mu tiwa momishangwa adishe.
28 Vo eshi va fika komukunda winya tava i ko, Ye okwa ninga a fa a hala okukoyelela po. 29 Ndelenee vo ove mu fininika va tya: “Kala pufye, onguloshi nokuli, netango otali ningine mo.” Ye okwa ya mo a kale puvo. 30 Ndele eshi a kala omutumba poshililo pamwe navo, Ye okwa kufa omungome ndele okwa pandula, e u pambula ndele okwe u va pa. 31 Opo nee omesho avo okwa pashuka, ndele ve mu dimbulukwa. Ye okwa henuka po puvo. 32 Ndele vo ova tongafana: “Omitima detu inadi xwama tuu mufye, eshi a popya nafye mondjila ndele okwe tu fatululila omishangwa!”
33 Ndele pefimbo tuu olo ova fikama ndee tava shuna kuJerusalem; ndele ova hanga ko omulongo naumwe novakwao va li pamwe navo. 34 Vo ova tya: “Omwene okwa nyumuka shili, okwa monika kuSimon.” 35 Navo yo va hepaulula eshi sha ningwa mondjila nanhumbi ve mu koneka pepambulo lomungome.
Jesus ta holokele ovalongwa vaye muJerusalem
36 Ndele fimbo va tonga odo, Ye mwene okwa kala ofika mokati kavo ndele ta ti kuvo: “Ombili nai kale nanye.”
37 Vo ova haluka, va tila ndele va li ve shii ove wete oshilulu. 38 Ye okwe va lombwela: “Oshike mwa tila ngaha, noshike omadiladilo a tya ngaha a penduka momitima deni? 39 Taleni omake ange neemhadi dange mu koneke nge nokutya, Aame mwene ndi li po. Kumeni nge nye mu tale, osheshi oshilulu kashi na onhumba nomakipa, ngaashi mu wete nge ndi a kwete.” 40 Ndele eshi e di tya okwe va ulikila omake aye neemhadi daye. 41 Ndele eshi inave mu itavela natango omolwehafo nonghumwe, Ye okwa tya kuvo: “Omu kwete sha shokuliwa?” 42 Vo ove mu pa okanhumba koshi ka yofwa nokashila keenyiki. 43 Ndele Ye okwe ka tambula ndele okwe ka lya moipafi yavo.
44 Ndele Ye okwa tya kuvo: “Oyo ei nda popya meendjovo odo nde di mu lombwelele fimbo nda li punye, eshi nda tile aishe ei ya shangelwa nge momhango yaMoses nomovaxunganeki nomomapsalome oi nokuwanifwa.” 45 Opo nee Ye okwe va fatululila eendunge davo okushiiva omishangwa. 46 Ndele okwa tya kuvo: “Eshi sha shangwa, Kristus okwa li e nokuhepekwa nokunyumuka koufi efiku etitatu 47 ndele medina laye elidilululo nedimepo lomatimba oli nokuudifilwa oiwana aishe nokuhovela muJerusalem. 48 Ndele nye eendobwedi daai aishe. 49 Ndele taleni, Ame ohandi ke mu tumina osho sha udanekwa kuTate, ndele nye omu nokukala moshilando eshi fiyo tamu djalekwa eenghono dokeulu.”
Jesus ta i meulu
50 Ndele Ye okwe va twala fiyo opopepi naBetania, ndele ta yelula omaoko aye, ndele okwe va nangeka noupuna. 51 Ndele fimbo te va nangeke noupuna, Ye okwa tukuka navo ndele okwa yelulilwa meulu.
52 Ndele vo ove mu ilikana nokutwa eengolo, ndele ova shuna kuJerusalem nehafo linene. 53 Ndele va li alushe motembeli nokuhambelela Kalunga.
© Oshikwanyama Bible Revised © Bible Society of Namibia, 2008, 2012.
