LUKAS 23 - Oshikwanyama Bible (OKYB)

Jesus ta hokololifwa koshipala shaPilatus noshaHerodes

1 Ndele oshiongalele shavo ashishe osha fikama ndele ove mu twala kuPilatus. 2 Ndele vo ova hovela oku mu pa omatimba tava ti: “Ou otwe mu mona ta twifa ovanhu ondubo ndele ta kelele okuyandja efendelo komukesari, ndele Ye mwene ota ti Oye Kristus, ohamba.” 3 Pilatus okwe mu pula ndele ta ti: “Oove ohamba yOvajuda?” Ye okwe mu nyamukula ta ti: “Heeno ngaashi to ti.” 4 Ndele Pilatus okwa lombwela ovapristeli ovakulunhu nongudu aishe: “Ame nghi wete etimba momunhu ou.” 5 Ndele vo ova diinina oku mu fininika va tya: “Ye omupiyaanifi wovanhu noku va longa muJudea ashishe, eshi a hovela muGalilea, fiyo opapa.”

6 Ndele Pilatus eshi e di uda, okwa pula: “Omunhu ou ngeenge Omugalilea.” 7 Ndele eshi e mu uda Ye owoshikandjo shaHerodes, okwe mu tuma kuHerodes, osheshi naye yo a li muJerusalem momafiku enya. 8 Ndele Herodes eshi a mona Jesus, okwa hafa pombada, osheshi oye a hala nonale oku mu mona, osheshi okwe mu kundana, ndele okwa hala a ulikilwe kuye edidilikokumwifa. 9 Ndele okwe mu pulapula neendjovo dihapu, ndele Oye ine mu nyamukula nande. 10 Novapristeli ovakulunhu novanongo vomishangwa ova fikama ndele ove mu pa etimba va fya ouladi. 11 Ndele Herodes pamwe novanhu vaye, ove mu dina noku mu sheka, ndele eshi ve mu djaleka oshikutu tashi vema, okwe mu shunifa kuPilatus. 12 Nefiku olo tuu olo Herodes naPilatus ova panga oukaume, shito pokati kavo opa kala ondubo.

13 Opo Pilatus okwa ifana ovapristeli ovakulunhu novakulunhu voshilongo nongudu yovanhu 14 nokwe va lombwela: “Mwa eta omunhu ou kwaame mwa tya: ye omuhongauli wovanhu, hano taleni, ame mwene onde mu pula fimbo mu li po, ndele inandi mona momunhu ou nande etimba olo tamu li mu hokololifa. 15 Nosho yo Herodes ine li mona, osheshi ye okwe mu shunifa kufye, hano taleni oye ou ina ninga sha shoku mu pa etimba loku mu dipaifa. 16 Onghee hano nda hala ndi mu dengife ndele ndi mu efe.” 17 Ndele ye okwa li e nomhango yoku va mangululila mukeshe tuu oshivilo omukwatwa umwe.

18 Opo tuu ongudu aishe oya weelelela shimwe tai ti: “Dja po naau, tu mangululila Barabas.” 19 Ou a hangika a tulwa meti omolwepiyaaneko moshilongo nomolwedipao. 20 Ndele Pilatus okwe va lombwela vali, osheshi a hala okumangulula Jesus. 21 Ndele vo ova nyamukula nokwiingida: “Mu valela, mu valela komushiyakano!” 22 Ndele ye okwa tya kuvo lutitatu: “Owii washike Ye a ninga hano? Ame inandi mona etimba lokufya muye. Hano ngeenge nde mu dengifa, ohandi mu efa.” 23 Ndelenee vo ove mu fininika nokwiingida Jesus a valelwe komushiyakano, ndele eingido lavo ole mu finda ko. 24 Opo nee Pilatus okwa tokola, ehalo lavo li wanifwe. 25 Ndele okwa mangulula winya kwa li a idililwa mo omolwolwoodi nedipao, ndele Jesus okwe mu yandja molwehalo lavo.

Jesus ta twalwa kuGolgata

26 Ndele moku mu twala ko, ova kwata po umwe, edina laye Simon Omukireni, a hangika ta di kepya laye, ndele ove mu twika omushiyakano e u humbate konima yaJesus.

27 Nongudu inene yovanhu oye mu shikula, ovakainhu yo ovo tave mu kwenaukile notave mu lilile. 28 Ndelenee Jesus okwa punguluka ndele ta ti kuvo: “Oukadona nye Ovajerusalem, inamu lila nge, lililileni nye vene, nye mu lilile ovana veni. 29 Osheshi tala, omafiku otae uya fiku taku tiwa: ‘Ovanelao ovo eengadji, nomadimo inaa dala nomavele inaa nyamifwa.’ 30 Vo otava hovele okulombwela eemhunda: ‘Mu tu wile, noikulundudu: Mu tu tuvikile.’ 31 Osheshi omuti mutalala ngeenge tau ningwa ngaha, mukukutu otau ningwa ngahelipi?” 32 Ndele pamwe naye okwa twalwa ko yo ovalumenhu vamwe vavali, ovakolokoshi, va ka dipawe.

Jesus ta valelwa komushiyakano

33 Ndele eshi va fika konhele ei ya lukwa Oshala shoshipongolo shomutwe, oko ve mu valela komushiyakano, nosho yo ovakolokoshi ovo, umwe kolulyo nomukwao kolumosho.…oko ve mu valela komushiyakano, nosho yo novakolokoshi ovo, umwe kolulyo nomukwao kolumosho. 34 Ndele Jesus okwa tya: “Tate, va dimina po, osheshi kave shi shii eshi tava ningi.” Vo ova tukulilafana oikutu yaye ndele tave i nyanekele. 35 Ndele ovanhu ova kala ofika opo ve mu tala. Novakulunhu yo ove mu kenya va tya: “Okwa li ha kwafa vamwe, ne likwafe hano, ngeenge Oye Kristus yaKalunga, omuhoololwa ou.” 36 Novakwaita ve mu sheka yo, ve uya kuye oku mu nwefa omeva malula. 37 Ndele va tya: “Ove ngeenge ohamba yOvajuda, likwafa mwene.” 38 Ndele kombada yaye kwa tulwa yo eshangelo la shangwa mOshigreka nomOshilatina nomOshiheberi, tali ti: “OU OHAMBA YOVAJUDA.”

39 Ndele umwe womovakolokoshi ovo va endjelela okwe mu sheka ndele ta ti: “Ove ku fi Kristus, likwafa, ove u tu kwafe yo.” 40 Ndele mukwao okwa nyamukula e mu hanyena, ta ti: “Iho tila nande Kalunga, eshi u li mehandukilo eli li fike pamwe? 41 Ofye ohatu hepekwa nokuli pauyuki, osheshi hatu pewa osho twe shi lilongela, ndele ou ina longa owii nande owasha.” 42 Ndele okwa tya: “Jesus, dimbulukwe nge, ngeenge wa fiki mouhamba woye.” 43 Ndele Ye okwa tya kuye: “Oshili handi ku lombwele, onena tuu eli to ka kala pamwe naame moParadisa.”

Okufya kwaJesus

44 Ndele potundi onhihamano okwa ninga omilaulu kombada yedu alishe fiyo okotundi onhimugoi, 45 osheshi etango ola laula, netukulifo lotembeli ola tauka pokati. 46 Ndele Jesus okwa popya mokule a tya: “Tate, omhepo yange ohandi i yandje momake oye.” Ndele eshi e di tya, okwa hefa mo omhepo yaye. 47 Ndele omunefele, eshi a mona osho sha ningwa po, okwa fimaneka Kalunga ta ti: “Oshili, omunhu ou okwa li omuyuki.” 48 Nongudu aishe ya li ya ongala oku shi tala, eshi va mona eshi sha ningwa ko, ove lidenga ponhulo ndele ova shuna. 49 Ndele ovashiivikile vaye aveshe ova kala ofika kokule naye, osho yo ovakainhu venya va dile naye kuGalilea ve mu shikula ndele ova tala ashishe eshi.

Okupakwa kwaJesus

50 Ndele tala, omukwashiongalele shovakulunhu, omulumenhu muwa omuyuki, edina laye Josef, 51 womuArimatia, oshilando shOvajuda, ou a li ina itavela omhangela yavo noshiningwa shavo, onakuteelela ouhamba waKalunga, 52 okwa ya kuPilatus, ndele okwa indila ko oshimhu shaJesus. 53 Ndele eshi e shi kufa ko okwe shi mangela moshiyata shitoka shiwa, ndele okwe shi tula mombila ya li ya hokelwa memanya omo inamu pakwa shito nande omunhu. 54 Ndele efiku olo ola li lelilongekido, nEshabata ola fika. 55 Novakainhu venya va dile naye kuGalilea, ove mu shikula, ndele ova tala ombila noshimhu nhumbi sha nangekwa mo. 56 Hano eshi va shuna komaumbo, ova longekida oidimba ya nyika nawa nomaadi mawa, ndele efiku lEshabata va tulumukwa opanghedi yomhango.