Oshali yomufiyekadi
1 Ndele eshi a yelula omesho okwa mona oipuna nhumbi ya tula oshali moshikefa shomayambelo. 2 Ndele okwa mona yo omufiyekadi ohepele a tula mo ousenda vavali. 3 Ndele Ye okwa tya: “Oshili handi mu lombwele: Omufiyekadi ou okwa tula mo shihapu shi dule shaavenya aveshe. 4 Osheshi aveshe venya ova tula mo oixupe yomouyadi wemona lavo, ndele ou moluhepo laye a tula mo oipalwifa aishe ei kwa li e i kwete.”
Okuhanaunwa po kwaJerusalem nexulilo lounyuni
5 Ndele vamwe eshi va popya otembeli nhumbi ya wapekwa nomamanya a wapala ndele ya wapalekwa noiyandjiwa, Ye okwa tya: 6 “Omafiku tae uya mwaai mwe i tala apa itapa fiwa nande emanya la tenhekwa kulikwao inali ngumunwa po.” 7 Ndele vo ove mu pula tava ti: “Omuhongi, eshi otashi ningwa naini? Nedidiliko lilipi tali holola okuuya kwayo?”
8 Ndele Ye okwa tya: “Lungameni muha pukifwe, osheshi vahapu tave uya medina lange ndele tava ti: aame ou, nefimbo ola fika. Ndelenee inamu va shikula. 9 Ndele ngeenge tamu udu omakolokoto oita nomalwoodi, inamu tila, osheshi ei oi nokutetekela, ndele exulilo inali fika manga.”
10 Opo nee Ye okwa tya kuvo: “Oshiwana noshiwana tai ka twilafana ondubo, oshilongo tashi tu ondubo noshilongo shikwao, 11 ndele otapa ka kala keenhele neenhele omakakamo madjuu edu neendjala noudu wolutapo, nomamoniko omahalwifo, nomadidiliko manene meulu. 12 Ndelenee aishe ei fimbo inai uya, otave mu kwata ndele tave mu taataa, ndele tave mu shilile meeshinagoga, ndele tave mu undulile meedolongo, ndele tave mu twala koshipala sheehamba noshovapangeli voilongo omolwedina lange. 13 Ndele eshi tashi mu pe onhele yokuhepaulula. 14 Omitima deni nadi kale hano dihe noshisho nhumbi mu nokulipopila. 15 Osheshi Ame ohandi mu pe okanya nomaunongo taa nyenge ovakondjifi veni aveshe oku mu nyamukula ile oku mu twifa eemhata. 16 Ndele nye otamu yandjwa kooxo nokoonyoko nokovamwanyoko nokovakweni nokookaume keni, vamwe vomunye tava ka dipawa kuvo, 17 ndele nye tamu ka tondelwa edina lange kwaaveshe. 18 Ndele kape na nande oluxwiki limwe lokomitwe deni tali ka kana. 19 Okelididimiko leni otamu lixupifile eemwenyo deni.
20 “Ndele ngeenge tamu mono Jerusalem sha kondekwa komatanga ovakwaita, opo nee shiiveni ehanauno laJerusalem ola fika popepi; 21 opo nee ava vomuJudea nava fadukile keemhunda naava ve li moshilando nava dje mo, naava tava hangika komikunda vaha ye musho. 22 Osheshi omafiku oo oehandu, opo aishe ei ya shangwa i wanifwe. 23 Ndelenee woo ovafimba novamwali omafimbo oo, osheshi oudjuu unene otau kala kombada yedu nehandu lokutonda oshiwana eshi, 24 ndele vo ove nokufya keememo deongamukonda, notava twalwa moupika koiwana aishe, ndele Jerusalem tashi ka lyataulwa kovapaani fiyo omafimbo ovapaani taa wana.
25 “Nomadidiliko taa ka monika metango nomohani nomeenyofi, noiwana yokombada yedu tai pangelwa koutile noihe neteelelo lasha omolwengungumo lefuta nolomakufikufi alo. 26 Ndele ovanhu tava fi kehaluko mokutila nomokuteelela ei tai hange edu alishe, osheshi eenghono domeulu otadi ka kakama. 27 Ndele tava mono Omona wOmunhu te uya ta ende moshilemo, e neenghonopangelo dinene noshinge. 28 Ndele ei ngeenge tai hovele okuningwa, taleni pombada nye mu yelule omitwe deni, osheshi exupifo leni ola ehena popepi.”
Efaneko lomukwiyu
29 Opo nee Ye okwe va lombwela efaneko: “Taleni omukwiyu nomiti adishe. 30 Ngeenge tadi hape, otamu mono nanye vene kutya, okulombo kwa fika popepi. 31 Osho ngaha nanye yo ngeenge tamu mono ei ya ningwa, shiiveni ouhamba waKalunga ou li popepi. 32 Oshili handi mu lombwele: Epupi eli itali xulu po, ei aishe fimbo inai wanifwa. 33 Eulu nedu otali xulu po, ndele eendjovo dange itadi xulu po.
34 “Ndelenee lipashukileni, omitima deni diha lolokifwe koitendele nokokukolwa nokoshisho shoipalwifa, efiku olo lihe mu vakele ngaashi omwiyo, 35 osheshi olo otali hange aveshe ava hava kala kombada yedu alishe. 36 Pashukeni hano omafiku aeshe nokwiilikana, mu mone eenghono okuya onhapo ei aishe tai ka ningwa, nokukala ofika koshipala shOmona wOmunhu.”
37 Ndele Ye okwa longa ovanhu motembeli omutenya, noufiku nokwa ya a ka nangale komhunda ya ifanwa Omhunda yEemono. 38 Novanhu aveshe ova meneka ongula ve uya motembeli oku mu uda.
© Oshikwanyama Bible Revised © Bible Society of Namibia, 2008, 2012.
