LUKAS 11 - Oshikwanyama Bible (OKYB)

Jesus ta longo okwiilikana

1 Ndele opa ningwa, Ye eshi a li monhele yonhumba ta ilikana, eshi a mana, umwe womovalongwa vaye okwe mu lombwela: “Omwene, tu longa okwiilikana ngaashi Johannes a longa ovalongwa vaye.” 2 Ndele Ye okwa tya kuvo: “Ngeenge tamu ilikana, tyeni:

‘Tate, edina loye nali yapulwe,

ouhamba woye nau uye,

ehalo loye nali wanifwe

kombada yedu yo ngaashi meulu,

3 tu pa efiku keshe omungome wetu womafiku aeshe,

4 ndele dima po omatimba etu,

osheshi nafye yo ohatu dimine po keshe tuu ou e noikolo nafye,

ino tu twala momayeleko,

ndelenee tu xupifa momunawii.’ ”

5 Ndelenee Ye okwe va lombwela: “Olyelye womunye e na kaume kaye te uya kuye mokati koufiku ndele ta ti: ‘Kaume kange, pe nge omingome nhatu, 6 osheshi kaume kange a dja mondjila e uya kwaame nondihe na eshi handi mu pakele po;’ 7 ndele winya womeumbo te mu nyamukula ndele ta ti: ‘Ino ningila nge oupyakadi, omuvelo owa patwa, nounona vange va nangala pwaame momutala, itandi dulu okupenduka ndi di ku pe.’ 8 Ohandi mu lombwele, ngeenge ita penduka e mu pe omolwoukaume, ota penduka omolwekenyeneko laye, ndele ote mu pe shi fike peemhumbwe daye. 9 Ndelenee handi mu lombwele: indileni, ndele tamu pewa, kongeni, ndele tamu mono, kongholeni, ndele tamu yeululwa. 10 Osheshi keshe tuu ou ta indile, ota pewa, nakeshe tuu ou ta kongo, ota mono, naau ta konghola, ota yeululwa. 11 Ndele olyelye womunye xe ou, omona waye ngeenge te mu indile oshi, te mu pe eyoka ponhele yoshi, 12 ile te mu indile ei, ndele te mu pe ngeno ondje?Ngeenge te mu indile ei, te mu pe ngeno ondje? 13 Hano nye ava muvai, ngeenge omu shii okupa ovana veni oipewa iwa, unene tuu Xo yeni yomeulu ota yandje Omhepo Iyapuki kwaava tave mu indile.”

Jesus te lipopile

14 Opo Ye okwa ta mo ondemoni ei ya fitika ondaka, ndele opa ningwa, ondemoni eshi ya tewa mo, omulumenhu omufitandaka okwa popya, neengudu dovanhu oda kumwa. 15 Ndele vamwe vomuvo ova tya: “Eendemoni ote di tefa Belsebul, omukulunhu weendemoni.” 16 Ndele vamwe ova hala oku mu yeleka ndele ove mu pula edidiliko lomeulu. 17 Ndele Ye eshi kwa li e wete omadiladilo avo okwe va lombwela: “Keshe tuu oshilongo ngeenge shi nondubo musho vene, otashi hanauka po, nongulu otai wile ikwao. 18 Ndele Satana ngeenge e nondubo muye mwene, oshilongo shaye otashi kala po ngahelipi? Ngaashi tamu ti, eendemoni ohandi di tefa Belsebul; 19 Ndele eendemoni ngeenge handi di tefa mo Belsebul, ovana veni otave di tefa mo lyelye? Onghee vo otava ningi ovatokoli veni. 20 Ndelenee shimwe ashike, eendemoni ngeenge handi di tefa nomunwe waKalunga, opo nee ouhamba waKalunga owe uya kunye.

21 “Omunaenghono ngeenge a homata oiti yaye, ndele ota kelele eumbo laye, emona laye ola amenwa. 22 Ndelenee ngeenge taku di ou e mu dule eenghono ndele te mu te, ote mu nyeka oilwifo yaye, kwa li e i lineekela, ndele ta tukula oshihakanwa e shi mu nyeka. 23 Ou ehe li pamwe naame, ye oku na ondubo naame, naau ita ongele pamwe naame, ye ota hanauna po.

24 “Omhepo ya nyata ngeenge tai di momunhu otai pumauka meenhele dihe nomeva, tai kongo etulumuko, ndele eshi itai li mono, otai ti: ‘Ohandi ka shuna meumbo lange nda dile mo.’ 25 Ndele ngeenge tai i mo, otai li hange la kombwa nola wapekwa, 26 yo otai i ndele tai ka kufa eemhepo dikwao heyali, edi di i dule mowii, notadi uya ndele tadi kala mo, nohauxuuninwa yomunhu ou otai ningi ii, i dule yotete mowii.”

27 Ndele fimbo kwa li ta tongo odo, omukainhu umwe womongudu a popya mokule ta ti: “Edimo le ku humbata oli na elao nomavele aa wa nyama.” 28 Ndele Ye okwa tya: “Oshili, ovanelao ovava tava udu eendjovo daKalunga ndele tave di diinine.”

Edidiliko laJona eshi tali ti

29 Ndelenee eengudu dovanhu eshi da ongala, Ye okwa hovela okupopya ta ti: “Epupi eli lii hali pula edidiliko, ndele itali pewa limwe li lili olo tuu eli lomuxunganeki Jona alike. 30 Osheshi ngaashi Jona a li edidiliko kOvaninive, osho nOmona wOmunhu ta kala edidiliko kepupi eli. 31 Ohamba omukainhu yokoumbuwanhu tai holoka petokolo lovalumenhu vepupi eli, ndele tai va pe etimba, osheshi yo oya dile keexulo dedu i ude eendunge daSalomo, ndele tala, ou e li apa, e dule Salomo. 32 Ovalumenhu Ovaninive otava ka nyumuka efiku letokolo, nepupi eli, ndele tave li pe etimba, osheshi vo ove lidilululifwa keudifo laJona, ndele tala, ou e li apa, e dule Jona.

Eisho oshela yolutu

33 “Ndele kape na omunhu ta tema olamba, ndele te i tula mekololo ile koshi yoshimbale, ndelenee ote i tula koshikwatelwalamba, opo ovo have uya mo va mone ouyelele.Kape na omunhu ta tema olamba, nde te i tula mekololo ile koshi yoshimbale. 34 Eisho loye olo olamba yolutu. Eisho loye fimbo li li nawa, nolutu loye alishe oli na ouyelele, ndele ngeenge olii, nolutu loye li nomilaulu. 35 Lungama hano, ouyelele womeni loye uha kale omulaulu. 36 Hano olutu loye alishe ngeenge la yela, muhe na nande ombinga i li momulaulu, otali ningi ouyelele auke, ove wa fa wa minikilwa komutemo wolamba.”

Ekondjifo loihelele yOufarisai

37 Ndele fimbo a popya edi, Omufarisai umwe okwe mu ifana komwisha, Ye okwa ya mo ndele a kala omutumba poshililo. 38 Ndele Omufarisai eshi a mona Ye ine likosha, eshi a ka lya, okwa kumwa. 39 Ndelenee Omwene okwe mu lombwela: “Nye Ovafarisai, ohamu kosho eholo netiti kombada, ndele meni leni omu yadi enyeko nowii. 40 Omalai nye, ou a shita eshi shokombada, haye tuu a shita eshi shomeni yo? 41 Eshi shomeni shi yandjeni oikwafa yeehepele, aishe notai mu koshokele.

42 “Ndelenee woo, nye Ovafarisai, eshi hamu yandje oitimulongo yombidi noyoidimba noyeembidi adishe, ndele hamu pitilile ouyuki nohole okuhola Kalunga, eshi oshi nokuwanifwa naashinya kashi na okweefiwa. 43 Woo nye Ovafarisai, eshi mu hole oipundi yokomesho moshinagoga nokupopifwa pomalandelo. 44 Woo nye ovanongo vomishangwa nOvafarisai, eshi mwa fa eembila dihe wetike, novanhu tava ende kombada yado, ndele vo kave shi shii.”

45 Opo umwe womovanongo vomishangwa a hovela okupopya ndele ta ti kuye: “Omuhongi, eshi to popi ngaha, oto tu fifa ohoni.” 46 Ndele Ye okwa tya: “Woo nanye yo ovanongo vomhango, eshi hamu twike ovanhu omitengi didjuu okuhumbata, nye vene ihamu di kumu nande okamunwe keni kamwe. 47 Woo nye, ovo hamu wapeke eembila dovaxunganeki, vo ova dipawa kooxo. 48 Hano osho ngaha onye eendobwedi doilonga yooxo, ndele mwe i itavela, osheshi vo ove va dipaa, ndele nye otamu tungu eembila davo. 49 Onghee ounongo waKalunga tau ti: ‘Ohandi va tumine ovaxunganeki novayapostoli, navamwe vomuvo otave va dipaa, navakwao tave va taataa,’ 50 epupi eli opo li pulwe ohonde yovaxunganeki aveshe ya tilwashi okeshito lounyuni, 51 okohonde yaAbel fiyo okohonde yaSakaria a dipaelwa pokati keyambelo notembeli. Heeno, ohandi mu lombwele oyo otai ka pulwa kepupi eli.

52 “Woo nye ovanongo vomhango, eshi mwa nyeka ko oshapi younongo, nye vene inamu ya mo, naavo va hala okuya mo, omwe va kelela.”

53 Ndele eshi e va lombwela oinima ei, ovanongo vomishangwa nOvafarisai va hovela oku mu fininika noku mu pula oinima ihapu, 54 noku mu nangela, va mone sha oku mu pa etimba.