Jesus ta tumu ovalongwa omilongo heyali
1 Ndelenee konima yaai Omwene okwa hoolola omilongo heyali nokwe va tuma oovavali noovavali ve mu tetekelele koshilando nokomukunda keshe ye mwene a hala okuya ko. 2 Ndele Ye okwe va lombwela: “Eteyo olo olihapu, ndele ovalongi ovo ovanini, ilikaneni hano Omwene weteyo a tume ovatei meteyo laye. 3 Indeni ko! Tala, ohandi mu tumu ngaashi eedi mokati komambungu. 4 Inamu ya nande nokakutu koimaliwa ile nekutu ile neenghaku, inamu kunda nande omunhu mondjila. 5 Ndele ngeenge tamu i meumbo, tyeni tete: ‘Ombili nai kale meumbo eli.’ 6 Ndele ngeenge omu na omona wombili, ombili yeni otai mu kalelele, ndele ngeenge kamu na, otai mu alukile. 7 Ndelenee meumbo tuu omo kaleni mo, mu lye nye mu nwe osho ve shi kwete, osheshi omulongi okwe lilongela ondjabi yaye. Inamu pitapita eumbo neumbo. 8 Ndele ngeenge tamu i moshilando ndele tave mu tambula, lyeni osho tamu shi pewa, 9 novanaudu ve li mo va veluleni, nye mu va lombwele: ‘Ouhamba waKalunga wa ehena popepi nanye.’ 10 Ndelenee ngeenge tamu i moshilando omo itave mu tambula, indeni komapandavanda asho nye mu tye: 11 ‘Nondwi yomoshilando sheni ya kanyatela keemhadi detu, ohatu i mu pupulile, ndelenee kaleni mu shi shii, ouhamba waKalunga wa ehena popepi nanye.’ 12 Ndele ohandi mu lombwele, oSodom tashi ka ninga hixwe efiku olo shi dule oshilando osho.
13 “Woo ove, Korasin! Woo ove, Betsaida! Osheshi ngeno muTirus nomuSidon mwa ningilwa oinenelonga ei ya ningilwa munye, ngeno ve lidilulula nokukala omutumba momakutu nomomute. 14 Ndelenee Tirus naSidon oi na oupu i mu dule efiku letokolo. 15 Naave yo Kapernaum, ino tumbilwa tuu fiyo omeulu? Oto ka kulukila fiyo omoshovafi.
16 “Ou te mu udu, ota udu nge, naau te mu dini, ota dini nge, naau ta dini nge, ye ota dini ou a tuma nge.” 17 Ndele venya omilongo heyali va aluka nehafo ova tya: “Omwene, eendemoni oda dulika kufye omolwedina loye.” 18 Opo Ye okwa tya kuvo: “Onda mona Satana a wa meulu ngaashi oluvadi.” 19 Taleni, onde mu pa eenghono okulyata omayoka neendje nokupangela eenghono adishe domutondi, na kape na eshi tashi mu etele oshiponga. 20 Ndele inamu hafela eshi eemhepo tadi dulika kunye, hafeni omadina eni eshi a shangelwa meulu.
Ehafo laJesus
21 Mokafimbo tuu oko Jesus okwa hafela pombada mOmhepo Iyapuki ta ti: “Ohandi ku hambelele Tate, Omwene weulu nowedu, osheshi oinima ei owe i holeka ovanaendunge novanongo ndele owe i hololela ava va fa ouhanana. Heeno, Tate, osheshi osho she ku wapalela. 22 Aishe onde i pewa kuTate ndele kaku na ou ta shiiva Omona, Tate Oye tuu aeke, ndele kaku na ou ta shiiva Tate, Omona Oye tuu aeke, naau Omona a hala oku mu hololela.”
23 Ndele Ye okwa pungulukila kovalongwa vaye aveke ndele okwa tya: “Omesho taa mono ei mwe i tala oku na elao. 24 Osheshi handi mu lombwele, ovaxunganeki vahapu neehamba va li va hala okumona ei tamu i tale, vo inave i mona, nokuuda ei tamu i udu, vo inave i uda.”
Omusamaria omunamutimanghenda
25 Ndele tala, omunongo womhango umwe a fikama e mu yeleka ta ti: “Omuhongi, ondi na okulonga shike opo ndi fyuulule omwenyo waalushe?” 26 Ndele Ye okwa tya kuye: “MOmhango omwa shangwa ngahelipi? Oho lesha mo ngahelipi?” 27 Ndele Ye okwa nyamukula ta ti: “Hola Omwene Kalunga koye nomutima woye aushe, nomwenyo woye aushe, neenghono doye adishe, neendunge doye adishe; nomukweni ngaashi ove mwene.” 28 Ndele Ye okwa tya kuye: “Wa nyamukula sha yuka, shi wanifa opo to kala u nomwenyo.” 29 Ndelenee winya okwa hala okulimonikifa omuyuki ndele ta ti kuJesus: “Omukwetu olyelye?” 30 Ndele Jesus okwe mu nyamukula ta ti: “Omulumenhu wonhumba a dja muJerusalem ta i kuJeriko nokwa hangika kovanyeki, ve mu dula aishe, ndele ve mu denga, ndele ova ya ve mu fiya po e na okamwenyo kanini. 31 Nomupristeli wonhumba a hangika ta ende nondjila ei, okwe mu mona, ndele okwe mu pitilila po. 32 NOmulevi osho yo; eshi e uya poima opo, okwe mu mona ndele okwe mu pitilila po. 33 Ndelenee Omusamaria umwe a enda nondjila ei, eshi e uya po, okwe mu mona, ndele okwe mu fila onghenda. 34 Ndele okwa ya kuye, a manga oipute yaye, a tila po omaadi nomaviinyu, okwe mu londeka koshilondwa shaye, ndele okwe mu twala kongulu yovaenda ndele te mu xungu. 35 Ndele mefiku la shikula mokufikama kwaye, okwa kufa eedenari mbali, okwe di pa mwene weumbo lovaenda ndele okwa tya: ‘Mu xunga, ndele ngeenge itadi wana, ohandi ku pe mokwaaluka.’ 36 Hano paendunge doye elipipo mwaava vatatu a li mukwao womunhu ou a hangikile kovanyeki?” 37 Ndele ye okwa tya: “Oyou e mu fila onghenda.” Jesus okwa tya kuye: “Naave yo inda u ka ninge ngaha.”
Jesus meumbo laMarta naMaria
38 Ndele eshi va ehena ko vali, Ye okwe uya komukunda wonhumba, nomukainhu umwe edina laye Marta okwe mu tambula meumbo laye. 39 Ndele ye okwa li e na omumwaina Maria a kala omutumba peemhadi dOmwene, ndele ta pwilikine eendjovo daye. 40 Ndelenee Marta okwa viyauka unene noilonga yeyakulo, nokwe uya po, ta ti: “Omwene, ku na ko na sha mboli, omumwameme eshi ta viyaukifa nge aame andike, mu lombwela a kwafe nge.” 41 Ndelenee Omwene okwe mu nyamukula ta ti: “Marta, Marta, ove to lipe oshisho noupyakadi noinima ihapu. 42 Ndelenee shimwe ashike sha pumbiwa. Maria okwe lihoololela ombinga iwa itai mu kufwa.”
© Oshikwanyama Bible Revised © Bible Society of Namibia, 2008, 2012.
