Eemhango develombediyambo nodepanduloyambo
1 Omhango yokuvelombediyambo oyei; oyo iyapukielela: 2 “Monhele tuu oyo hava tomene exwikiloyambo, ve nokutomena yo okuvelombediyambo, ndele ye e nokushamina ohonde keembinga adishe doaltari. 3 Ndele e nokuyamba omakaadi aeshe omuyo nokutya, omakaadi okomushila nomakaadi aa e li kombada yomandjadja, 4 neefiyo adishe mbali nomakaadi okudo nokaxulixuli kokexuli e noku ka kufa pamwe neefiyo, 5 nomupristeli e noku i xwika po koaltari ngaashi omundiloyambo wOmwene. Olo okuvelombediyambo. 6 Ovalumenhu vomovapristeli nave li lye. Lo oli na okuliwa monhele iyapuki. Lo oliyapukielela. 7 Ngaashi sha pangelwa etimbayambo, osho yo okuvelombediyambo. Omhango imwe aike kuwo. Omupristeli ou ta kwatakanifa nalo, ye ota pewa oshitukulwa shaye. 8 Nomupristeli ou ta yambe exwikiloyambo ponhele yaumwe, na pewe ekungha lexwikiloyambo ye e li yamba. 9 Neendjayambo keshe tadi telekwa mefiya naaishe ya kangwa moshipana ile koshipeleki, otai ningi yomupristeli ou e i yamba. 10 Neendjayambo keshe da pilulilwa omaadi ile dikukutu otadi ningi dovana aveshe ovana ovamati vaAron, daau nodaawinya.”
11 Nomhango yepanduloyambo vo tave li etele Omwene, oyo ei: 12 “Umwe ngeenge ta eta ehambeleloyambo, ye e na oku i eta pamwe nehambeleloyambo oikuki ihe nonhafi, ya pilulilwa omaadi noikuki ya lalakana ihe nonhafi ya vaekwa omaadi noufila wa nakwa, wa lungilwa mumwe nomaadi ngaashi olumbololo loikuki. 13 Noikuki yomungome u nonhafi ye e noku i eta eeshaliyambo daye pamwe nehambelelopanduloyambo. 14 Ndele ye e nokweetela Omwene oshikuki shimwe shomoshali keshe oshaliyambo. Osho tashi ningi shomupristeli ou ta tile ohonde yepanduloyambo koshiyambelo. 15 Ndelenee ombelela yehambelelopanduloyambo laye i nokuliwa efiku tuu olo ye te li eta. Inamu xupifila sha shomuyo efiku lomongula.
16 “Ndelenee ye ngeenge ta eta eyambo ngaashi eudanekoyambo ile omulongeloyambo, nali liwe po efiku tuu olo ye a eta eyambo laye. Nefiku la shikula napa liwe po ei ya xupa po. 17 Ndelenee ei ya xupa po kombelela yeyambo i nokuxwikwa po momundilo mefiku etitatu. 18 Ndele ngeenge ombelela yepanduloyambo laye tai liwa efiku etitatu, inashi wapala noitashi wapalele omweeti wayo. Oyo ya nyata; nakeshe ou ta li kuyo e nokuhumbata ombedi yaye. 19 Nombelela ya kuma keshe eshi sha nyata itai liwa. I nokuxwikwa po momundilo. Nokupopya ombelela, keshe omunhu a yela, oye ta shiiva oku i lya, ndele haye ou a nyata
20 “Ndelenee ou ta li ombelela yepanduloyambo lOmwene, fimbo ye ina yela, omwenyo waye u nokudimwa mo muvakwao. 21 Ndele umwe ngeenge ta kumu sha sha nyata, onyata yomunhu ile oshinamwenyo sha nyata, shoixuna, ndele ta li ombelela yepanduloyambo lOmwene, omwenyo waye u nokudimwa mo muvakwao.”
Omakaadi nohonde itai liwa
22 Omwene okwa popya vali naMoses a lombwela ovana vaIsrael a tye: 23 “Inamu lya omakaadi ongobe ile odi ile oshikombo. 24 Ndelenee omakaadi oshinamwenyo she lifila nomakaadi aashi sha lika, otashi dulika oku a longifa moilonga i lili nai lili, ndelenee inamu a lya, 25 osheshi keshe umwe ou ta li omakaadi oimuna oyo hava etele Omwene omundiloyambo, oye tuu ou te a li, e nokudimwa mo muvakwao.
26 “Nosho yo inamu lya ohonde yeedila ile yoimuna meenhele deni dokukala. 27 Keshe umwe ta li ohonde keshe, omwenyo waye u nokudimwa mo muvakwao.”
28 Omwene okwa popya vali naMoses ndele ta ti: 29 “Lombwela ovana vaIsrael u tye: ‘Ou ta etele Omwene epanduloyambo laye, oye mwene e nokweeta kOmwene oshali yepanduloyambo laye. 30 Omake aye e nokweeta omaindiloyambo Omwene. Omakaadi nombadja oyo e nokweeta. Ombadja i ninge edungadungifwayambo okudungadungifwa koshipala shOmwene; 31 nomupristeli e nokuxwika po omakaadi koaltari, ndelenee ombadja tai ningi yaAron novana vaye. 32 Nye mu nokupa yo omupristeli oshilama shokolulyo ngaashi eyelulwayambo lomomapanduloyambo eni. 33 Oye ou womovana vaAron ta yambe ohonde yomapanduloyambo nomakaadi, ye ota pewa oshilama shokolulyo ngaashi oshitukulwa shaye. 34 Osheshi ombadja yedungadungifwayambo noshilama sheyelulwayambo Ame nde i tambula ehanganoyambo kovana vaIsrael, ndele nde i yandja kuAron novana vaye ovamati ngaashi oshitukulwa shavo kovana vaIsrael fiyo alushe.’ ” 35 Osho oshitukulwa shaAron noshovana vaye ovamati komundiloyambo wOmwene okudja efiku tuu linya Ame nde va ehenifa okulongela Omwene moshilonga shoupristeli, 36 osho sha tongwa kOmwene ve shi pewe kombinga yovana vaIsrael mefiku tuu olo Ye e va vaekele. Yo onghedimhango yaalushe komaludalo avo.
37 Oyo hano omhango yexwikiloyambo, yeendjayambo noyetimbayambo noyokuvelombediyambo noyeyapuloyambo noyepanduloyambo, 38 ei Omwene e i lombwela Moses komhunda, mefiku tuu linya ye a lombwelele ovana vaIsrael mombuwa yaSinai okweetela Omwene omayambo avo.
© Oshikwanyama Bible Revised © Bible Society of Namibia, 2008, 2012.
