LEVITIKUS 5 - Oshikwanyama Bible (OKYB)

1 “Umwe ngeenge ta nyono ngaha, nokutya ye nande ta udu okwaana nokwa shiiva okuninga ondobwedi yoshinima e shi mona ile e shi shiivifilwa, ndele ite shi holola, ye ota nyono, 2 ile umwe ngeenge mokuhashiiva ta kumu osho sha nyata, nge oshimuna ile oshaalangati she lifila, osho ihashi liwa, ngaha okwe linyateka nokupewa oushima, 3 ile mokuhashiiva ta kumu onyata yomunhu, ile keshe eshi tashi mu nyateke ndelenee ye e shi shiiva ndele ta pewa oushima, 4 ile umwe ngeenge ta popi nomilungu daye mokuhadiladila, mokuhashiiva ta anene okuninga shii ile shiwa, heeno, keshe eshi e shi anena, ngaashi omunhu ta dulu okwaana mokuhadiladila sha, ndelenee komesho te ke shi shiiva nokupewa oushima moshinima shongadi shomwaai; 5 heeno, ye ngeenge e noushima moshinima shongadi, ne shi hepaulule eshi a nyona, 6 na etele Omwene ofuto yokunyona kwaye odi yonghadi nokutya, okadjona okakadi ile oshikombo, etimbayambo. Nomupristeli e noku mu kwatakanifa omolwomanyonauno aye.

7 “Ndelenee ye ngeenge ohepele, ta nyengwa okweeta odi, ye e nokweetela Omwene ofuto yokunyona kwaye omalyamono avali ile eenghutyona mbali, imwe etimbayambo, ikwao exwikiloyambo. 8 Ndele vo ve noku di etela omupristeli. Ye na yambe tete oyo ya sheyelwa etimbayambo; na fingonone ofingo yayo, ndele omutwe itau kufwa ko. 9 Opo nee ye e nokushamina kombinga yoaltari ohonde yetimbayambo. Ndelenee ohonde ei ya xupa po i nokufininwa kombinga yokoshi yoaltari. Olo etimbayambo. 10 Ndelenee ikwao ye e noku i longekida ngaashi sha pangelelwa exwikiloyambo. Osho ngaha hano omupristeli e noku mu kwatakanifa omolwomanyonauno aye ye e a ninga, ndele tae ke mu diminwa po.

11 “Ndelenee ye ngeenge molwoluhepo ta nyengwa okweeta omalyamono avali ile eenghutyona mbali, ye e nokweeta eyambo lokunyona kwaye okilograma youfila wa nakwa etimbayambo. Ye aha tile ko omaadi nokuha wedele ko oitwiminifo, osheshi olo etimbayambo. 12 Ndele ye e noku u eta komupristeli, nomupristeli e nokukufa mo muwo eke li yadi ngaashi edimbulukifoyambo noku li xwika po koaltari kombada yomundiloyambo wOmwene. Olo etimbayambo. 13 Osho ngaha omupristeli e noku mu kwatakanifa omolwomanyono ye e a ninga moshinima shongadi shoinima ei, ndele sho otashi ke mu diminwa po. Oufila oo tau xupu po nau ninge eendjayambo domupristeli.

Ehandukulukifo

14 “Omwene okwa popya vali naMoses ndele ta ti: 15 Omunhu ngeenge ta tauluka nomolwoungone ta nyono nokukufa sha shomwaayo ya yapulilwa Omwene, na etele Omwene ofuto odi ondume ihe noshipo yomoimuna opakuyeleka kwaye moisekeli oisiliveli pakushikula kwoisekeli yetwali liyapuki, ehandukulukifo. 16 Ndele ye e nokufuta eshi e shi kufa mo moinima ya yapulwa nokuwedela ko oshititano shondjele yasho ndele ne shi pe omupristeli. Omupristeli ye eshi e mu kwatakanifa ngaha mokuyamba odi yehandukulukifo, ye ote ke shi diminwa po.

17 “Umwe ngeenge ta nyono nomokuhashiiva ta ningi sha eshi sha shilikwa kOmwene, ndele ta pewa ombedi ndele e nokuhumbata okunyona kwaye, 18 opo nee ye e noku ku etela moimuna yaye pakuyeleka kwaye odi yondume ihe noshipo. Nomupristeli e noku mu kwatakanifa omolwepuko laye lomokuhashiiva ndele tali mu diminwa po. 19 Olo ehandukulukifo, shaashi ye okwa velwa ombedi kOmwene.”