LEVITIKUS 4 - Oshikwanyama Bible (OKYB)

Etimbayambo

1 Omwene okwa popya vali naMoses: 2 “Umwe ngeenge ta nyono omolwounyengwi oshipango shimwe shomoipango yOmwene, ndele ta ningi eshi ihashi ningwa, 3 ngaashi ngeenge omupristeli a vaekwa ta nyono ndele ta ningi oshihopaelelwa shii kovanhu, omolwokunyona kwaye e nokweetela Omwene ongobe yomhedi onyasha ihe noshipo etimbayambo; 4 ndele ye e nokweeta ongobe yomhedi koshivelo shetwali leongalo koshipala shOmwene ndele e nokutenheka eke laye komutwe wongobe yomhedi nokutoma ongobe yomhedi koshipala shOmwene. 5 Opo nee omupristeli omuvaekwa e nokukufa mohonde yongobe yomhedi noku i eta metwali leongalo, 6 nomupristeli e nokutwa omunwe waye mohonde nokushamina ohonde luheyali koshipala shOmwene, komesho yoshitukulifoyata shetwali liyapuki. 7 Omupristeli e nokupolola yo ohonde keembinga doaltari oyo i li metwali leongalo, etwimino ledimba liwa koshipala shOmwene; ndele ohonde aishe yongobe yomhedi ei ya xupa po e noku i tila koshi yoaltari yexwikiloyambo oyo i li poshivelo shetwali leongalo; 8 nomakaadi aeshe ongobe yomhedi yetimbayambo e noku a kufa mo, omakaadi aa e li kombada yomandjadja nomakaadi aeshe aa e li momandjadja, 9 neefiyo adishe mbali nomakaadi okudo nonokaxulixuli e noku i kufa pamwe neefiyo, 10 ngaashi ya kufwa mongobe yomhedi yepanduloyambo; nomupristeli e noku i xwika po koaltari yexwikiloyambo. 11 Ndelenee ekungha longobe yomhedi nombelela aishe yayo nomutwe nomakondo nomandjadja noshandja, 12 ongobe yomhedi aishe ye e noku i twalwa pondje yonhanda konhele iyela, oko omute hau ekelwashi, ndele ye e noku i xwika po nomundilo woikuni; monhele opo hapu tilwashi omute hau ekelwashi, yo i nokuxwikwa po.

13 “Eongalo alishe laIsrael ngeenge tali nyono omolwokuhashiiva ndele vo mokunyona koshipango shimwe shOmwene ova ninga eshi ihashi ningwa, 14 nomanyonauno oo va ninga taa shiivika, eongalo nali ete ongobe yomhedi onyasha etimbayambo koshivelo shetwali leongalo, 15 novakulunhu veongalo ve nokutenheka omake avo komutwe wongobe yomhedi koshipala shOmwene, nongobe yomhedi i nokutomenwa koshipala shOmwene. 16 Opo nee omupristeli omuvaekwa e nokutwala ohonde imwe yongobe yomhedi metwali leongalo, 17 nomupristeli e nokutwa omunwe waye mohonde noku i shamina luheyali komesho yoshitukulifoyata koshipala shOmwene, 18 ndele ye e nokupolola ohonde keembinga doaltari ei i li metwali leongalo koshipala shOmwene. Opo nee ta tileshi ohonde aishe ei ya xupa kombinga yokoshi yoaltari yexwikiloyambo, i li poshivelo shetwali leongalo; 19 ndele ye e nokukufa mo omakaadi aeshe noku a xwika po koaltari, 20 nokuninga ngaashi hashi ningwa ongobe yepanduloyambo naai osho i na okuningwa. Osho ngaha e nokuninga nayo; nomupristeli e noku va kwatakanifa ndele omanyono tae ke va diminwa po. 21 Opo nee tava ka twala ongobe yomhedi pondje yonhanda noku i xwika po ngaashi ongobe yomhedi inya yotete ya xwikwa po. Olo etimbayambo leongalo.

22 “Omupangeli ngeenge ta nyono, ta ningi eshi Omwene Kalunga e shi shilika mokuheshii sha, ndele te limono ombedi, 23 ile omanyonauno aye e a ninga ngaha ngeenge a dimbulukiwa kuye, ye e nokweeta oshikombo shihe noshipo nokutya, oshikombo oshindume, osho eyambo laye, 24 ndele ye e nokutenheka eke laye komutwe woshikombo, noku shi dipaela monhele omo vo hava tomene exwikiloyambo koshipala shOmwene. Olo etimbayambo laye. 25 Opo nee omupristeli e nokukufa nomunwe waye ohonde yetimbayambo noku i polola keembinga doaltari yexwikiloyambo. Ndelenee ohonde ya xupa po e noku i tilashi kombinga yokoshi yoaltari yexwikiloyambo. 26 Ye e nokuxwika po yo omakaadi aeshe koaltari ngaashi omakaadi epanduloyambo. Osho ngaha omupristeli e noku mu kwatakanifa omolwomanyonauno aye, ndele tae ke mu diminwa po.

27 “Ndele umwe womovanhu vomoshilongo ngeenge ta nyono molwokuhashiiva, ye ta ningi eshi sha shilikwa kOmwene ndele ye ta mono ombedi yaye, 28 ile omanyonauno aye aa e a ninga e a dimbulukwa, opo nee ye e nokweeta oshikombo shihe noshipo nokutya, oshikadikombo etimbayambo laye omolwomanyonauno aa e a ninga; 29 ndele ye e nokutenheka eke laye komutwe wetimbayambo nokudipaela oshikombo eshi etimbayambo monhele yexwikiloyambo. 30 Opo nee omupristeli e nokukufa nomunwe waye ohonde yasho noku i polola keembinga doaltari yexwikiloyambo. Ndelenee ohonde aishe ya xupa po ye e noku i tilashi kombinga yokoshi yoaltari. 31 Nomakaadi aeshe ye e noku a kufa mo ngaashi omakaadi epanduloyambo a kufwa mo, nomupristeli e noku a xwika po koaltari edimba liwa kOmwene. Osho ngaha hano omupristeli te mu kwatakanifa, ndele omatimba aa tae ke mu diminwa po.

32 “Ndelenee ye ngeenge ta eta etimbayambo laye okadjona, ye e nokweeta okakadi kehe noshipo, 33 ndele ye e nokutula eke laye komutwe wetimbayambo noku ka dipaa ngaashi etimbayambo monhele muyo hava tomene exwikiloyambo. 34 Opo nee omupristeli e nokukufa nomunwe waye ohonde yetimbayambo noku i polola keembinga doaltari yexwikiloyambo. Ndelenee ohonde aishe ya xupa po, e noku i tilashi kombinga yokoshi yoaltari. 35 Nomakaadi aeshe ye e noku a kufa mo ngaashi omakaadi odi yepanduloyambo haa kufwa mo, nomupristeli e noku a xwika po koaltari komundiloyambo wOmwene. Osho ngaha hano omupristeli e noku mu kwatakanifa molwomanyonauno aye e a ninga, ndele omatimba aa tae ke mu diminwa po.