Omaudaneko
1 “Inamu li ningila oikalunga. Ndele inamu lidikila oshihongwafano ile ongudimanya, ndele inamu dika moshilongo sheni emanya mulo mwa pandelwa omafano opo mu li nyongamene kulo. Osheshi Aame Omwene Kalunga keni. 2 Diinineni omashabata ange, tileni etwali lange liyapuki. Aame Omwene.
3 “Nye ngeenge tamu ende meenghedimhango dange ndele tamu diinine oipango yange noku i wanifa, 4 opo nee Ame ohandi ke mu lokifila odula pefimbo liwa nedu tali yandje oshishipo nomiti domoixwa tadi yandje oiimati yado. 5 Nefimbo lokuxwa tali xulile pekolo leeviinyu, nekolo leeviinyu tali fiki fiyo okefimbo lokukuna, ndele tamu ka lya omungome weni wa wana, ndele tamu ka kala nawa muhe nombudi medu leni. 6 Ame ohandi ka yandja yo ombili moshilongo, opo mu shiive okunangala nokutulumukwa paha kale sha tashi mu etele omahaluhalu. Naame ohandi ka taataa mo oilyani ii medu leni neongamukonda itali ka pumina mo. 7 Ndele nye otamu ka taataa ovatondadi veni, ndele vo otava ka wila po keongamukonda komesho yeni. 8 Vatano veni tava ka taataa efele, nefele leni otava taataa omayovi omulongo, novatondadi veni otava ka wila po keongamukonda komesho yeni. 9 Noshipala shange ohandi ke shi mu taalelifila ndele handi mu pe oludalo ndele tamu hapupala. Nehangano lange nanye Ame ohandi ke li pameka. 10 Nye otamu ka lya oilya ikulu youdwaali ndele tamu ke i tilashi ponhele yaai ipe. 11 Ndele Ame ohandi ka dika etwali lange liyapuki mokati keni, ndele itandi ke mu nyonyodola nande. 12 Naame ohandi ka enda mokati keni nokukala Kalunga keni, nanye otamu ka kala ovanhu vange. 13 Aame Omwene Kalunga keni ou nde mu pitifa mo medu laEgipiti, opo muha kale ovapika vavo. Ndele Ame onda teya eendjoko deni opo nye mu ende mwa yukilila.
Omalondwelo
14 “Ndelenee nye ngeenge itamu udu nge nokuwanifa oipango aishe ei, 15 nongeenge tamu ekeleshi eenghedimhango dange nongeenge eemwenyo deni tadi nyonyodola omalombwelo ange, opo muha wanife oipango yange aishe, ndele tamu teya po ehangano letu nanye, 16 opo nee naame yo handi mu ningile eshi, nokutya: Ame ohandi ke mu tumina omahaluhalu, oidinda nolwiidi nomesho taa ka twikifwa nomwenyo tau liekelele. Nye otamu ka kuna yo oshimha ombuto yeni, osheshi ovatondadi veni tave ke i lya po. 17 Ndele oshipala shange Ame ohandi ke shi mu taalelifila nehandu, opo nye mu tewatewe kovatondadi veni. Novatondadi veni tave ke mu pangela, ndele nye otamu ke litwala onhapo nande pehe na ou te mu taataa.
18 “Ndele nye natango tuu ngeenge itamu pwilikine nge, opo Ame ohandi mu handukile luheyali molwomatimba eni. 19 Ndele Ame ohandi teya po elinenepeko leni, neulu leni handi li kukutike ngaashi oshivela, nedu leni ngaashi oshikushu. 20 Neenghono deni tamu di hepifa oshimha, osheshi omapya eni itaa ka eta oipalwifa yao, nomiti domoshilongo itadi imi.
21 “Ndele nye ngeenge tamu lundukile nge ndele itamu pwilikine nge, Ame ohandi ka hapupalifa luheyali oiponga kombada yeni molwomatimba eni. 22 Noilyani yomoixwa Ame ohandi ke mu tumina, ndele yo tai mu nyeka ovana veni nokumana po oimuna yeni, ndele handi xupipike omuvalu weni, opo eendjila itadi endwa vali. 23 Ndele nye ngeenge natango tuu itamu dulika komalondwelo ange, ndele tamu anye nge, 24 naame yo ohandi ke mu anya yo noku mu denga luheyali omolwomatimba eni. 25 Ndele Ame ohandi mu tumine eongamukonda. Lo otali ka wanifa ehandu lange molweteyo lehangano, ndele nye ngeenge tamu shuna moilando yeni, Ame ohandi ka tuma oudu wolutapo mokati keni, ndele nye tamu ka yandjwa momake ovatondadi veni. 26 Ame ngeenge handi kufa po ekwafelo lomungome, ovalikadi tava ka teleka omungome weni moshikololo shefiya limwe noku mu alulila omungome weni pashiyelekifo. Ndele nye otamu ka lya ndelenee itamu ka kuta.
27 “Nye ngeenge natango tuu itamu pwilikine nge, ndelenee tamu anye nge, 28 Ame ohandi ke mu anya moupyuhandu ndele Ame ohandi ke mu handukila luheyali omolwomatimba eni. 29 Ndele nye otamu ka lya ombelela yovana veni ovamati ndele tamu ka lya ombelela yovana veni oukadona. 30 Ndele Ame ohandi ka tokeka oikulundu yeni yomayambelo nokuteya po eengudi deni detango, noimhu yeni ohandi ke i ekela kombada yoimhu yoikalunga yeni. Nomwenyo wange otau ke mu nyonyodola. 31 Noilando yeni Ame ohandi ke i ninga eenduba doikulukuma, neetembeli deni handi ke di tokeka ndele itandi hokwa edimba loitwiminifo yeni. 32 Heeno, Ame mwene ohandi ka tokeka oshilongo, opo ovatondadi veni, ava tava ka tula mo musho, otava ka kanghwa. 33 Ndele Ame ohandi ke mu halakanifila mokati koiwana noku mu taataa neongamukonda. Noshilongo sheni tashi ka ninga omuulu noilando yeni tai ka ninga eenduba doikulukuma. 34 Opo nee edu tali ka tulumukifwa molwomashabata alo, momafiku aeshe lo tali kala la tokekwa, nanye fimbo mu li medu lovatondadi veni. Opo nee edu tali ka tulumukifwa nokwaalulilwa omafiku etulumuko lomashabata. 35 Olo li nokutulumukwa omafiku e fike pokutokekwa kwalo. Efimbo letulumuko edu inali li mona momashabata eni fimbo nye mwa kala mulo. 36 Ndele venya tava ka fyaala mo mokati keni, Ame ohandi ke va pa momitima davo omahaluhalu medu lovatondadi valo nokulinyenga kwefo likukutu taku va twala onhapo. Ndele vo otava ka ya onhapo ngaashi omunhu ta i onhapo eongamukonda, ndele tava wile po nande kapehe na umwe te va taataa. 37 Ndele vo otava ka wilafana ngaashi eongamukonda tali iwa onhapo, nande kape na umwe ou te va taataa. Ndele nye itamu dulu okulipopila moipafi yovatondadi veni. 38 Ndelenee nye tamu ka halakanifwa moiwana, nedu lovatondadi veni tali ke mu lya po. 39 Ndele ava tava ka xupa po mokati keni otava ka fila mo moilongo yovatondadi veni molwokuhenouyuki kwavo, heeno, okufya omolwokuhenouyuki wooxe pamwe navo.
Kalunga iha dimbwa ehangano lavo naJakob
40 “Opo nee vo otava hepaululile nge omatimba avo nomatimba ooxe eshi vo va li ve liteeka nge ndele va li va anya nge. 41 Opo naame yo nda li ndi noku va anya noku va twala medu lovatondadi vavo. Opo omitima davo inadi pita etanda ngeenge tadi lininipike, va mone ekwatakanifo lomatimba avo. 42 Opo nee Ame ohandi dimbulukwa ehangano letu naJakob, nosho yo handi ka dimbulukwa ehangano lange naIsak nosho yo ehangano lange naAbraham, ndele handi ka dimbulukwa edu yo. 43 Ndelenee tete oshilongo shi nokweefwa kuvo ndele shi nokutulumukifwa molwomashabata asho fimbo vehe mo tashi kala sha tokekwa, ndele vo nava kwatakanife omatimba avo eshi va ekelashi, heeno, eshi va ekelashi omalombwelo ange neemwenyo davo, da nyonyodola eenghedimhango dange. 44 Ndelenee fimbo vo ve li yo medu lovatondadi vavo Ame itandi va ekeleshi, ndele itandi va nyonyodola, ndi va mane po ngeno ile ndi teye po ehangano letu navo, osheshi Aame Omwene Kalunga kavo. 45 Ndelenee Ame moku va halela ouwa ohandi ka dimbulukwa ehangano letu nooxekulu ava nde va pitifa mo medu laEgipiti, opo ndi ninge Kalunga kavo. Aame Omwene.”
46 Odo eenghedimhango nomalombwelo Omwene e di tula pokati kaye novana vaIsrael pomhunda yaSinai e di pele Moses.
© Oshikwanyama Bible Revised © Bible Society of Namibia, 2008, 2012.
