Eemhango doshikwatelwalamba nodomingome detaliko
1 NOmwene okwa popya naMoses ndee ta ti: 2 “Lombwela ovana vaIsrael ve ku etele omaadi eemono, omaadi mayela a yengwa molwoshikwatelwalamba, eelamba opo di kale da tema efimbo alishe. 3 Aron e noku shi pashukila pondje yoshitukulifoyata shoundobwedi metwali leongalo, opo eelamba di kale da tema okudja onguloshi fiyo ongula koshipala shOmwene efimbo alishe. Oyo onghedimhango yaalushe komaludalo nomomaludalo eni. 4 Eelamba oku noku di tula moshikwatelwalamba shoshingoli shovenevene, di teme alushe koshipala shOmwene.Aron oku na okutula eelamba moshikwatelwalamba shoshingoli shovenevene.
5 “Kufa oufila wa nakwa u teleke mwoo oikuki omulongo naivali. Moshikuki keshe mu nokukala oufila u fike peekilograma mbali. 6 Ove u noku i londakanifa meenhele mbali, oikuki ihamano monhele imwe koshitaafula sha yela koshipala shOmwene. 7 Ndele kombada yoikuki monhele keshe u nokutula oitwiminifo, oyo edimbulukifoyambo lomingome ngaashi omundiloyambo wOmwene. 8 Keshe efiku lEshabata Aron e noku i tula koshipala shOmwene efimbo alishe, ngaashi oshali yovana vaIsrael, ngaashi ehangano laalushe. 9 Ndele yo tai ningi yaAron novana vaye ovamati. Vo ove noku i lya monhele iyapuki, osheshi ngaashi iyapukielela tai ningi yaye yomomindiloyambo dOmwene, yo onghedimhango yaalushe.”
Okuhandukilwa kwovatuki Kalunga
10 Omona omumati womwalikadi Omuisraeli, xe kwa li Omuegipiti, okwa dja moshilongo pamwe nOvaisraeli, nomona womwalikadi ou Omuisraeli nomulumenhu umwe Omuisraeli va twa eemhata monhanda. 11 Opo nee omona womwalikadi Omuisraeli okwa sheka edina laKalunga nokutukana. Onghee hano ve mu twala kuMoses. Nedina la ina la li Selomit, omona omukainhu waDibri womepata laDan. 12 Ndele vo ove mu idilila modolongo fiyo va hololelwa enyamukulo lOmwene.
13 NOmwene okwa popya naMoses ndele ta ti: 14 “Twala omutukani pondje yonhanda, naaveshe ava ve mu uda ta tukana, ve nokutenheka omake avo komutwe waye. Opo nee eongalo alishe nali mu dipae nomamanya.” 15 Novana vaIsrael va lombwela u tye: “Umwe ngeenge ta tuku Kalunga kaye, ta ka humbata etimba laye. 16 Keshe ou ta sheke edina lOmwene, ota ka dipawa. Eongalo alishe li noku mu dipaa shili nomamanya. Omunailongo ngaashi yo omudalelwa mo moshilongo e nokudipawa, ngeenge ta sheke edina laKalunga.
17 “Ndele ngeenge umwe ta dipaa omunhu ye e nokudipawa shili. 18 Ndelenee ou ta dipaa oshimuna, e noku shi futa. Omwenyo omomwenyo. 19 Ndele umwe ngeenge ta tula mukwao ondjo molutu, ngaashi ye a ninga, nosho yo naanaa ye e nokuningilwa. 20 Okuteka omokuteka, eisho omeisho, eyoo omeyoo. Ondjo tuu pwaayo ye e i tula molutu lamukwao, ye e i tulwe yo.
21 “Hano ou ta dipaa oshimuna, e noku shi futa. Ndelenee ou ta dipaa omunhu, ye e nokudipawa yo. 22 Omhango imwe aike nai kale munye. Omunailongo na talwe ngaashi omudalelwa moshilongo, osheshi Aame Omwene Kalunga keni.”
23 Osho ngaha Moses okwa popya nOvaisraeli, ndele vo ova twala omutukani pondje yonhanda ndele ve mu dipaa nomamanya. Novana vaIsrael va ninga ngaashi Omwene a lombwela Moses.
© Oshikwanyama Bible Revised © Bible Society of Namibia, 2008, 2012.
