LEVITIKUS 22 - Oshikwanyama Bible (OKYB)

Eemhango dovapristeli mokulya kwavo eeshaliyambo

1 Omwene okwa popya vali naMoses, 2 a lombwele Aron novana vaye ovamati: “Kaleni mwa lungama mokutambula kweni eeshali diyapuki dovana vaIsrael, odo tave di yapulile nge, opo muha shekife edina lange liyapuki. Aame Omwene. 3 Va lombwela nokutya, keshe ou womoludalo leni alishe ta ehene fimbo ine liyapula keeshali diyapuki edi ovana vaIsrael tave di yapulile Omwene, omwenyo ou u nokudimwa po koshipala shange. Aame Omwene. 4 Nande umwe womoludalo laAron, ou e noudu woshilundu ile etiko lomaxu, ita dulu okulya keeshali diyapuki fimbo ina fetwa mo. Naau ta kumu umwe ou e linyatekifa koshimhu ile ta kumu ou e netiko lomaxumbuto, 5 ile umwe ou ta kumu keshe epuka tali tumbanga, ndele te linyateke ngaha kulo ile ta kumu omunhu ou e linyatekifa kukeshe eshi tashi nyateke omunhu, 6 omunhu tuu ou ta kumu kusha sha nyata, ye e nokukala ina yela fiyo onguloshi, ye ita shiiva okulya eeshali diyapuki fimbo ye ine likosha nomeva. 7 Ndelenee etango ngeenge la ningina, ye ota ka kala a yela. Opo nee ta shiiva okulya eeshali diyapuki, osheshi odo eendja daye. 8 Ye aha lye sha shomoinamwenyo ya nyanyaulwa, opo ehe linyatekife kusho. Aame Omwene. 9 Onghee hano vo nava diinine eenghedimhango dange, vaha nyone molweeshali diyapuki ndele vaha fye omolwado eshi ve di nyateka. Aame Omwene ou te va yapula. 10 Osho yo edi itadi liwa kwaava inava yapulilwa oupristeli. Omukalele womupristeli naau te mu longele ita dulu okulya eshi shiyapuki. 11 Ndelenee omupristeli ngeenge te lilandele omupika noimaliwa yaye, ye ta shiiva okulya kusho; naau a dalelwa meumbo laye. Vo nava lye eendja daye. 12 Ndelenee omona okakadona komupristeli ngeenge ta hombolwa komuyeni, ita dulu okulya eeshaliyambo deeshali diyapuki. 13 Ndelenee omona okakadona komupristeli ngeenge ye omufiyekadi ile a hengwa, ndele ehe noludalo ndele ta shuna keumbo la xe ngaashi a li mounyasha waye, opo nee ta dulu okulya eendja da xe. Ndelenee omuyeni nande umwe ita dulu oku di lya.

14 “Ndele umwe ngeenge ta li eeshali diyapuki ndele ine shi shiiva, ye e nokuwedela po oshititano, nosho okwaalula komupristeli eshi shiyapuki, 15 Ovapristeli vaha nyateke eeshali diyapuki dOvaisraeli odo tadi twalwa kuvo koshipala shOmwene, opo Ye e di tambule, 16 vo vehe va vele eembedi vo ngeenge tava li eeshali diyapuki, osheshi Aame Omwene, ou te va yapula.”

Eyambelo kOmwene lihe noshipo

17 Omwene okwa popya vali naMoses, 18 a lombwele Aron novana vaye ovamati novana aveshe vaIsrael a tye: “Keshe umwe womeumbo laIsrael ile womovanailongo vomokati kOvaisraeli, ou ta eta eyambo pamaudaneko aeshe avo neeshaliyambo adishe dokehalo liwa, odo tave di etele Omwene exwikiloyambo, 19 vo ve noku di eta ngaha, opo va wapalele Omwene nokutya, oshinima oshindume shihe noshipo ngee eengobe ile eedi ile oikombo. 20 Inamu eta sha shi noshipo shokolutu, osheshi sho itashi ke mu wapaleka. 21 Ndele umwe ngeenge ta yambele Omwene meengobe ile meedi epanduloyambo opo a wanife eudaneko laye ile eyambo lehalo liwa, opo nee eyambo li nokukala lihe noshipo, opo li kale la wapala. Mulo muha kale nande oshipo. 22 Eshi sha twika ile eshi sha teka ile eshi shi noinhimbu ya fipatela ile oidinda ile omakoko ile omavangwa taa nyu, inamu i etela Omwene noinamu yambela Omwene sha shomuyo omundiloyambo koaltari. 23 Ndelenee ongobe ile odi ngeenge i noshinhimbu shile unene ile shixupi unene, to dulu oku i yamba eyambo kehalo liwa. Ndelenee ngaashi eudanekoyambo itai mu wapalele. 24 Inamu yambela Omwene oshinamwenyo sha lutulwa mokufengenyena ile mokutetwa. Moshilongo sheni inamu shi ninga, 25 ndele meke lomunailongo inamu lilandela oinamwenyo ya tya ngaha mu i etele Kalunga keni ngaashi eendja, osheshi yo inai wapala, oi noshipo. Omolwayo nye itamu ka wapalela Omwene.”

26 Omwene okwa popya vali naMoses ndele ta ti: 27 “Okatana okandume ile okadjona ile okakombwena ngeenge ka dalwa, naka kale omafiku aheyali pu ina, ndelenee okefiku etihetatu nokomesho ko otaka wapalele okuningila Omwene exwikiloyambo. 28 Ongobe nodi ile oshikombo inamu i dipaa pamwe noludalo layo mefiku limwe alike. 29 Ndele ngeenge tamu etele Omwene ehambeleloyambo, nye mu noku li yamba ngaha mu wapalele Omwene. 30 Mefiku tuu limwe alike li nokuliwa. Inamu xupifa po sha shomongula. Aame Omwene.

31 “Diinineni oipango yange noku i wanifa. Aame Omwene. 32 Inamu shekifa edina lange liyapuki, Ame opo ndi shiive okukala Omuyapuki mokati kovana vaIsrael. Aame Omwene, ou te mu yapula, 33 ou e mu pitifa mo medu laEgipiti opo ndi kale Kalunga keni. Aame Omwene.”